Anđelka Korčulanić
Ja san more, ja san more,
od valova gradin dvore.
Ja san u´je, plavac, pina,
meka duša materina.
.
Ližen rane, sve zaličin,
sve uza me manje boli.
S lipoton se svojon dičin,
pismu kitin cviton soli.
Grȋjē, že´je, sve mi kaži,
pokora san, nada, vira.
Ja san sve ča život traži,
za sriću san prava mira.
Jeman sve ča tebi triba,
od mornarā čuvan kosti,
snove, tajne, jata riba…,
od plača san i radosti.
Ne zamiri ka´ poludin
i vazmen ti srcu drago,
ka´ se smirin jopet nudin,
svu milinu, svoje blago.
Ja san more, ja san more,
od valova gradin dvore.
Ja san u´je, plavac, pina,
meka duša materina.