Vanja Škrobica
molajte me da promatran
zvizde i pivan psalme š njima
dlanon ću pomazit
mladi misec
jerbo ćutin jedinstvo sa svemiron
ne gledajte u pod,
podignite pogled:
planete se sudaraju
spajadu
nestaju
rađaju se nove
a mi, doli na zemji,
borimo se ćapat
svoje misto pod suncen
ne vidimo rađanje i umiranje
u galaksiji
beskrajnoj
vječnoj
veličanstveno plavoj
otvoreno je veliko nebo
u njemu jema mista za sve
i ne bojte se ča zvizde padalice ostavjadu ponekad
friž na nebu
to one samo slikaju
sudbinu svita
do jučer san i ja, ka i vi,
vidila svemir u sebi
sad vidin sebe u svemiru
2017.