Marica Žanetić Malenica
Mȅni Baba i mȅni Mȁt
nisu kako ján skȕle vȅle svršȉle
jerbo sirotinja tadar u skȕle ni hodȉla,
a pametne žínske ȍbe su bile.
.
Mȅni Baba i mȅni Mȁt
nisu kako ján imale svoj sôlad,
a po cile dane doma su fatigȁle,
ćūtȉle i nevȍju i glad.
Mȅni Baba i mȅni Mȁt
nisu ki ján imale Facebook i laptop,
noću su jad i muku u duši
veživȁle u vȅli grȍp.
Mȅni Baba i mȅni Mȁt
s ovega svīta rano su pârtīle,
a ján se pitan jesú lȉ za živjȅnja svojega
barîn malo srȉtne bíle.
…
2. nagrada na čakavskom na Recitalu “Josip Ozimec” Marija Bistrica 2024.