EU u naše malo misto
piše: Jadran Šantić Šangarelo
Jo judi moji koja je to euforija bila koje su sve ideje padale domaćin judiman na pamet da je nike i ludura o ti ideja zabolila. Moran reć da naš dalmatinski mali čovik iz naši mali mista jema uvik razne ideje ka sakrivene karte u rukavu.
Evo prin nego krenen na glavnu temu moran se pofalit sa idejon moga dragega prijateja Šime Rosina o kojemen san van već pripovida. Dunkve, ti moj prijatej jema sedandeset dvi godine i gospe mi dobro ji nosi. U mladosti je bi pravi Kazanova a o sporta najviše se bavija vaterpolon i plivanjen tako da i danas užežin prvega maja počne sezonu plivanja koja traje sve do kasne jeseni.
Uvik je ruta ista od otela Marko Polo do našega lipega porta i gostione „Naše malo misto“ di je zna dikod iz mora popit gemišt i jopet nazad do Marka Pola.
Zašto van spominjen Šimu …zato jerbo je on idejni tvorac mini maratona koji se je pliva u čast ulizanja u EU od Brijeste na Pelješcu do Komarne na kopnu.
Cili ti svečani dil je lipo organizira moj veliki prijatej Milojko Glasović iz najlipjeg malega gradića na svitu i to Opuzena u dolini …jopet najlipje i najčistije rike Neretve.
Moran van spjegat da je ti moj prijatej Milojko idejni tvorac i otac Maratona lađa na Neretvi koji je več davno priša granice Lipe naše i posta internacionalna smotra veslača u povjesnome plovilu Neretvanskoj lađi.
Moran naglasit da za ovi maraton ni Šime samo da ideju vengo je ka stari sportaš, vaterploista i plivač i otpliva dionicu od 2222 metra. Na kraju je doša među dvadesetak mlaji na ciljnu rigu peti i da bi slavje bilo uz zajebanciju još veće skupa sa njin je pliva i njegov sin Jakov koji je doša na cilj puno poslin oca.
Maraton se nazva I DUBROVNIK JE EU sa očitim aludiranjen na potribu gradnje mosta oli tunela ispo mora. Ja san dušon i tilo za tunel jerbo će bit brže gotov a i četiri je puta jeftiniji i kroz tube o tunela će se moć vozit i liti i zimi a bura gori more derat i 300 na uru ma zaludu auti mogu komodno ispo mora.
E sad da van spjegan štoriju o naslovu. U Naše malo misto je sedandeseti godin podignut spomenik paliman u NOB-u koji je učini jedan od naši najveći kipari u povjesti šjor Augustinčić a kojega je uz pomoć pripadnici jedne bojne jedne naše poznate brigade srušija misni fratar, vandal koji je svoju mržnju prena NOB-u iskali na umjetnićkomen dilu i reka je da nemore tamo niki spomenik bit na višjemu mistu i viši od crkvenog kampanela.
Moran van reč da do danas ti spomenik ni ponovo vračen na svoje misto a još ču nadožuntat da je jadan narod koji povjesne artefakte bjesomučno ruši.
U ono vrime kad je spomenik bi gotov ka za žuntu je našemen malomen mistu poklonjen i kipić o bronce malešnoga ditića koji drži u ruci onu stvar i piša a sličan je onemu poznatomen malešnemu pišaču iz Bruxellesa.
Doduše ovi naš je kažu malo viši i na lipjemu je mistu postavjen, na rivi uz samo Jadransko more.
Moran se vratit u sedandesete godine i spomenit meni jednega dragega čovika sa kojin je moja žena radila u turistički biro kad je bila srednjoškolka i studentica i koje je zaslužan ča kipić niko ni ukreja i proda ga u staro gožđe, a to van je stari dospodin šjor Jure Šutić zvani Johanov.
On je sve ove godine čuva kipić koji je spremija u sebe doma i fala mu na tomen. Dunkve vlast u naše malo misto je angažirala moga prijateja kipara Tea Bilasa da osmisli i napravi niki kipić koji če bit spomen ulizanja u EU a bome i požicjun di če se postavit kipić i bome da napravi postanemat za isti.
Teo se je sitija malešnega pišača i naša ga u šjor Jure Johanova i to je odradi najboje ča je umi i na temu mu svaka čast.
Na „trgu“ Soline ispo legendarne kostele ispo koje su se na šentadaman ispripovidile razne fjabe i di su se rušile vlade i partije i di su se prošpentavali mnogi, Teo je ukreja bil prostora u koji je ukomponira lipi postament sa bazenon i feralon na letriku koji malega pišača dok čini potribu obasjava iz vode svitlon ma samo po noći jerbo priko dana triba štedit letriku.
Moran reč da je propju sve skupa lipo i na nivou Evrope a bome da se ne zaudobi na stupu o braškega kamena sa kojega mali lipo i komodno piša lipo je notano da se ti mali postavja povodon ulizanja RH u EU.
Kako je moj prijatej Teo funcut a bome i praktičan cili je kompleks ogradi sa stupiman o braškega kamena da auti koji se liti i zimi parkiraju na Soline ne bi šporkali postament o malega pišača i unakazili lipotu biline braškega kamena.
Da bi van sve lipo spjega moran reć da se tu večer užežin ulizanja u EU mukte dilila spiza i piće na rivi i da su se dobro niki fudrali i pošprucali a još posebno kad je mukte jerbo da je tribalo svoje šolde trošit to bi bija grij.
I sad ono glavno jušto na ponoč je napravjen najlipji vatromet koji san do sad vidija i ma zamislite slali su rokete u ariju i kad bi pale u more onda bi iz mora uzličale nazad u ariju i tamo se rascvitavale, jo koji su lipi cviti o svitla bili cili porat je bi okupan razni koluriman o svitla.
Eto štioci moji da znate da je u naše malo misto ulizanje u EU dostojno proslavjeno a ča je najvažnije sad mi u Gradac jemamo malega pišača kakvi je bome i u velome mistu Bruxselles i to je ona najvažnija poveznica i poanta jerbo smo oduvik mi Evropa samo su nas bili izgubili i tribalo je proč puno vrimena i dva tri rata da se vratimo u krilo majke Evrope.
Živi i veseli bili štioci moji pozdravja vas vaš morski čovik Šangarelo