piše: Jadran Šantić Šangarelo
Ovo van moran ispripovidit jerbo bi puka ka čvrčak kad nebi cili svit dozna za ovu barufu.
U naše malo misto jema puno svita koji se bavi ribarščinon na razne načine. Postoje oni ča ribu lovidu sa udican na peškafondo . Postoje oni ča samo panulan pritražiju more i lovidu niki ništa a niki ka moj prijatej Rafo Tomić ( rođeni Tuzlak koji se priženi u naše malo misto i oženi rodicu od moje žene ) lovidu bome cilu jarpu rib.
Jema bome i oni koji samo bacijedu parangale a meju timan je najuspješniji moj prijatej Kristijan Mirko zvani Krišto, i na kraju postoje i oni ča bacijedu mrižice ,bacijedu parangale, točavaju u more vrše i samolovke e o dvojici junakov o lupeščine bit ovod rič.
Kako nisu svi judi pošteni vengo jema i sitni lupeži tako i meju ribarima postoje farabuti koji volidu ukrest ono ča drugi ulovu a ni jin ni mrsko ukrest i ribarske arte drugiman iz mora.
U naše malo misto govoru da se zna ko te marčapije čini ma jopet ji niko ni javno imenova i ja sad mislin da je to od straja da ne bi dobili kakv bubak joli još koju veču ščetu da jin po noći niko ne bi ruvina brode u portu i nedaj bože da jin ko ne učini ščetu na tonobilu. Ja kakvi san berlav i po starost ja bi to sviman napisa ka plakat i zalipi ga po cilemu našemu malemu mistu da judi znaju ko je meju njiman lupež.
Kako niman te informacije i bliža saznanja nemogu štampat taki plakat i sve gre daje po svomen ustajenome redu. Pošteni ribaju i bacijedu arte u more a lupeži jin kredu ribu iz vršava kredu jin samolovke sa ulovjenon ribon i svi ževedu na način da pošteni ronjaju a lupeži lipo jidu tuđe bokune u slast.
Ma ni vrag crn koliko ste mislili vengo još crniji. Jedan moj poznanik je strastveni ribolovac sa svin artiman od udic priko vrši i parangali do samolovki samo se ne bavi mrižican. Njemu je jedan od ti neznani junaci nočnega krivolova oliti lupeščine ukreja dvi samolovke jednu vršu a drugi je jednon zgodon pribra jedan parangal i vreti ga bez ribe u more zamršenoga.
Ti moj poznanik je veliki dešperadun i odluči je dvojici od ti možebitni nazovi lipeži vrati milo za drago ma na njegov način. Da niko nezna doveja je jednega prijateja iz Splita profesionalnega ronioca i nji dva su skovali plan a kakvi čučete sad. Pratili su oni kajičon tu dvojicu ma sve pod finton da panulaju i sinjali di su njiovi arti pa su odlučili da jin zagorčaju život. Kako je jedan od ti navodni lupeži bacija mrižice blizu kraja oni su mu po noči učinili zajeb i to tako da je oni ronilac iz Splita zaroni i donji dil mriže veza na 4-5 misti konopon od najilona debjine 14 milimetri pa drugi kraj dobro utvrdija za sike na dnu a onemu drugemu koji je bacija samolovke uzeli su lipe ribe i to dvi komarče svaka od oko dva i po kila i dva velika ugora jednega od 4 kila a drugega od pet i po. Na dvi samolovke su za udice vezali po betonski blok dvadesetpetice, a na druge dvi su mu zakačili za udice dva star postola napunjena betonon koje su prin dva dana pripremili.
Kad su to napravili ostali su na more lovit puškon po noći i lipo se ujutro vratili u porat tako da niko ni posumnje ča su cilu noč radili, a one komarče i ugore su lipo probili ostiman o puške pa su dil svoga lova i oni ča su anektirali prodali u konobu jednega našega prijateja a dil su bome doma sparičali i sa lipin biranin društvon blagovali. Ona dvojica navodni lupeži su jemali kalvariju kad su išli istezat mriže i samolovke. Padale su beštimje i kleteve a vidili su ji u tin situacijaman i lipo čuli sve ča su rekli dvojica iz našega malega mista koji su panulali ujutro blizu njiovi pošti.
Niko vrime se nisu događale lupeške barufe ma je isto jopet poslin par miseci počelo,i ajte vi sad meni spjegajte kako se rješiti te lupeške napasti. Ma skoro san zaudobi, oni ča su mu vezali mrižice mora je dovest jednega lokalnega ronioca koji je odriši mrižice ma je sviman u misto ispriča ča je doli naša, dok se oni drugi ni otkrija ča je njemu bilo.
Kako mi u Dalmaciju volimo stare mudrosti i poslovice jedna od poslovica kaže zaklela se zemja raju da se sve tajne doznaju, a tako je i oni moj prijatej iz ove štorije dozna da je oni možebitni lupež koji je u duši veči škrtun od Molijerova škrca izvadi blokete i stare postole i ostavi ji u kalu pokraj stare kuče. Žaj mi je štioci dragi ča san zaudobi par lipi štorij ma upregnit možjane i kad se lipo sitin svi detaji stavit ču na kartu i dat ji vaman da štijete, do tada živi i veseli bili pozdravja vas vaš morski čovik Šangarelo.