piše: Jadran Šantić Šangarelo
Gradac/ Evo me dragi štioci moji jopet van se javjan poslin duge pauze oliti suše o pisanja ča bi neki znali reč.
Nisan se javja jerbo san bi cili angažiran na rehabilitaciji moga operiranega livega kolina.
Sad če se nač fločun pa če počet zajebancija na račun livega kolina jerbo se u nas u Split i u Dalmaciju zna reč livo za sve ono ča ne vridi u noge oli ruke.
Dunkve ja san več skoro tri miseca na more u ono naše lipo malo misto Gradac di se događaju svakakvi škorši i diškorši i di te ništa ne more iznenadit. Ma jopet jema i takvi štorij koje triba notat na kartu da ji svit more proštit i da ne učini sličan zajeb sam sebi.
Jeman jednega dragega prijateja dotura svitskoga glasa kirurga plastičara o kojemu san van več pripovida. Ti moj prijatej žive puste godine u Njemačku a svako je lito bome u svomen malemu mistu di sa svojoj smišnon i dragon ženicon Ana Marijon provodi lita i gušta u moru i đitaman sa svojin brodon koji se zove „USKOK“, a ovi zadnji je pod rednin brojen 7.
Ti moj dragi prijatej je minja brode ma je isto svakemu novemu da isto ime samo sa drugin brojen. Ovi zadnji put se odluči na priporuku razni „ meštri „ o brodi za kalafatsku firmu „ DAMOR“ u koju je kupi njiov brod oznake 700. Naoko lipi brod u koji je ugrađen motor poznate Talijanske firme „LOMBARDINI“ od 200 konji i sa tin motorn lipo je parija na more kad bi mu se dalo i po gasa.
I sad počinje štorija o golgoti tega moga prijateja sa njegovin novin brodon. Godine 2006. kad je brod kupjen vozija se samo 15 dan i to malo pa ga je moj prijatej lipo na zimovanje smistija u velu garažu Mercedes servisa o šjor Pecića u Gradac.
Po preporuci šjor Matića diretura o škvera DAMOR u maju misecu 2007. za učinit prvi servis angažira je firmu MRS koji su za ti posal lipo naplatili 4822 kune . Bome ni malo. Nakon lipo učinjenoga servisa poslin 20 dan vožnje motor je počeja gubit đire i zaustavi se na 2000 điri dok je moj prijatej dotur uvik vozi maksimalno na 3400 điri ča znači da ni makinju priforsira.
Pono poziva firmu MRS ma oni jemadu puno posla u marinaman i ne obadaju poziv pa šjor Siniša iz škvera „DAMOR“ donosi kompjuter za dijagnostiku jerbo ove nove makinje nemoreš popravit bez dijagnoze priko kompjutera. Jo ja se sičan moga pokojnega barbe Vlade koji bi stavi veliku kacavidu na blok o motora i nasloni uvo pa bi u minutu da dijagnozu.
Kompjuter je reka da je filter za ariju šporak,pa smo isti prominili i makinja je niko vrime radila ma brzo je opet izdušila i ti moj prijatej dotur je to lito promini 8 filteri o arije. Kako ni na poziv 2008 servis MRS ne dolazi u mercedesa su majstori prominili filtere o arije , uja i nafte pa je poza tin makinja radila 10 dan i jopet kolpala.
Kako je ti moj dotur bi blizu Sućurja taka je u porat i molija da mu niko promini filter za ariju. Dolazi jedan miščanin koji je škovacin a razumi se u makinje promini filter ma bome oče znat ča i kako šporkaje te filtere i ustanovi da na spoju između turbo uređaja i auspuha prilikon montaže ni stavjena brtva i tu je izlazi dim koji je šporkava filtere. Meštri o šjor Pecića mu montiraju brtvu i motor je proradi normalno.
Godine 2009 iz Njemačke zove servis MRS da mu napravu servis na suvo dok je brod u garaži ma ke ni ovi put nisu došli. Meštri iz Mercedesa tvrde da ništo nevaja sa turbo uređajen a moj prijatej uporno zove MRS i konačno mu jave da su u Dubrovnik i da če doč ali nimaju uzase kompjuter i unatoč obavjenom poslu bez kompjutera tvrde da turbo uređaj nevaja i da triba naručit novi u Italiju. A kako je bi Feragosto tamo niko ne radi i da se te godine mogu slikat jerbo uređaj neče doč vengo dogodine a kako su oni u priši lipo ostave moga dotura ka inkantana i odu svojin poslon.
Godine 2012 dolazi mu konačno MRS i čini servis uz naplatu 3023 kune ali motor i daje ne radi normalno. Kontaktiravši firmu „LOMBARDINI“ u Italiji dobije moj dotur preporuku servisera firmu ENTRADA iz Istre.
Ozbiljni momci dolaze u Gradac rade marljivo na motoru naplate 8826 kuna i odu posli probne vožnje koja je bila OK. Samo dva dana posli motor je opet krola serviseri se vračaju i tvrde da je najboje motor izvadit odnit ga u Istru i na probnomen stolu ga popravit i naštelat pa kad su sve napravili vratili se uz tvrdnju da je sad motor boji nego novi, naplate 12040 kuna i partu doma.
Poza dva dana moj ti dotur ode sa brodon ka potpora akciji za most na Pelješcu i na povratku pri jakoj tramuntani motor se ugasi i nemože se više pokrenit . Dijagnoza je bila da je pukla kopča. Prijatelji moga dotura uzmu tegalj do porta u Gradac. Poziv firmi „LOMBARDINI“ rezultira obečanjen da če oni poslat kopču mukte .
Kako je več deveti misec i moj prijatej mora u Njemačku dobiva mail od firme Moto nautic Rico iz Tribunja da je kopča kod njega i je gratis ma da če on naplatit 5000 kuna montažu. Kako moj prijatej nima alternativu plača, kopča se montira i brod gre na zimovanje u garažu. Kako je počelo lito moj prijatej arivaje iz Njemačke 14.05 2013 ča oče reč ove godine i kala brod u porat. Kako je najbliža pumpa za gorivo u Ploče parti on nalit rezervar i nakon dvi milje motor opet krola na 2000 điri a fibra motora se zaustavi na 40 stupanj.
Po povratku u porat lipo vežije brod i sav infotan traži ko če uzet mukte motor poznate i priznate firme „LOMBARDINI“ a on bi kupi novi Yanmar i ugradi ga u brod. Kako je on potroši priko 30000 kun ispada da je dobi samo račune za neučinjeni posal.
Ja štioci moji mislin da se ovod ne radi o nekvaliteti motora vengo o lošin i aljkavin serviseriman koji na brzinu zgrču lovu za fuš posal a to je nažalost svakodnevno u nas u Hrvatsku.
Moj dragi prijatej dotur je poruči sviman na moru da niko ne kupuje motor „LOMBARDINI“ a ja mislin da triba istu firmu avizat o svemu ča je proša i koja ga je golgota snašla.
Eto dragi štioci jedna ozbiljna i poučna štorija .
Zdravi i veseli bili pozdravja vas Vaš morski čovik Šangarelo.