piše: Jadran Šantić Šangarelo
Evo štioci moji kad bi ja bija ka radio Mileva i jema sto ušiju moga bi pisat romane a ne ove malešne štrorije iz našega malega mista.
Nima dana ma ke dana ure da se ništo smišno joli tragično ne dogodi u naše malo misto.
Živila je ovod jarpa svita o kojemu se moglo govorit kroz zajebanciju ma i za ozbiljno samo ja ne stignen na sva događanja a kad mi ćakod ispripovidu ja do kuće zaboravim barenko pola.
Evo sad ćete reć da je moj prijatej Frane medij za zajebe. Nije vengo su to sve nesriknje okolnosti oko njega a on ni baš jako žvelat da bi se škapula od svi dežgracij.
Kako je naše malo misto jedno od ritki koje jema spušćalište za brode i bome u koso je napravjeno po zanatu kako bog zapovida na toj kosini se brzo uvatidu algena onemu dilu izmeju plime i oseke i postane klizavo tako da ako neznaš, joli ako ne paziš moreš bome popuznit i obalit trticon, leđiman a moreš dobro zabatit i ćivericon pa dobit i potres o možjani. E to se prav za prav dogodilo našemen Frani.
A kako?
Lipo bomen jerbo ne sluša one sa iskustvon. Jedno jutro je čistija ciple ispo naše peškarije u čistemu moru i triba je zagazit za oprat ji ma ni mu se dalo ulizat po sitnemu žalu da mu malešni piljci ne uđu u šandale a ni tija obadat Vedrana da ne gre na istezalište jerbo če past i opizdit luduron i tvrdoglavo je krenija niz tu kosinu i bome noge popuzle a Frane je učinija deboto salto i tresnija na škinu. Srića za gospu da se ni slomija i dobi pootres o možjani vengo je pasa lišo i stalno je ponavja da ga ništa ne boli.
Evo odma druga pegulasta zgoda isto a o kome će ako ne o Frani. Jerbo je on ovo lito izgleda dežurni za pegule.
Kako mu je brod vezan za korpo morto priko bove a ne uz mul u Bristu on svaki dan gre do broda i nase sa malešnin gumenjakon. Kako se zna da ni baš žvelat a bome jema i 70 lit u guzici njegov rođak Vedran ga je lipo svitova kako se iz broda uliza u gumenjaka da se ne pade u more. E kad bi Frane obada ne bi bilo dežgracij.
Jedno jutro je ariva sa kafe iz našega malega mista lipo i šesno veza brod za bovu i gre u gumenjaka doma ma ne onako kako ga je rođak svitova vengo naopako na svoj način i eto ti belaja. Gumenjak se odmaka od broda i Frane je osta visit u ariju između gumenjaka i svoga broda a kako ni moga tako dugo izdurat upa je u more i onda nastupa zajeb.
Mučija se da uskoči u gumenjak ma on je svaki put ispuza i naš junak je malaksa a da ga ni vidi jedan Auštrijanac koji se kupa i skočija u pomoč moga se naš Frane nedaj bože i utopit. Sva šćeta u toj avanturi je bila ča mu se mobitel lipo okupa i skvasija pa unatoč sušenju na suncu ni proradi.
Moran ovu štoriju svršit ma još je jedan sitni detalj o Frani.
Išli su on i Vedran do Bagina mosta u Ercegovinu na marendin i tamo teče lipa friška voda ispo mosta .Ma kako je bilo jako teplo oni su se dva upotili i Frane se iša umit. Saša je lipo do vode i zavatija sa svojin veliki šapaman vodu i ne skidajući očale koje stalno nosi zarad vida umija se priko nji .
Eto štioci dragi ukratko san van ispripovidija ća se sve događalo u naše malo misto od zanjega puta.
Živi i veseli bili pozdravja vas vaš morski čovik Šangarelo