Nama treba malo mira
Božica Jelušić
Nama treba malo mira,
Gda nam jogenj šuška v hiži.
Vani veter v granju svira:
K Božjoj strani mi smo bliži.
Dok po zidu sence plaze,
I na nogi palec bibra,
V srcu čutiš svetlokaze:
Ne znaš kaj su strah ni štibra.
Grab, nerod i bukovina:
Plešu plami, iskre, parte.
V loncu bažul i slanina,
V lajdlu pisma, slike, karte.
Se se otpre vu širinu,
Od detinjstva do starosti.
Na sneg nek se brige zrinu:
Peč nam greje stare kosti.
I gda kruglja se okreče,
Kak mački su dnevi sivi.
Nama treba malo sreče:
Da pri hiži jogenj živi!
5. siječnja 2014.