NEĆE GROM U KOPRIVE

piše: Jadran Šantić Šangarelo        
Dragi moji štioci evo san se vrati u žive i tribalo me je puno vrimena da jopet seden za ovu makinjetu i čakod notan vama da jemate štivo za proštit.

Puno se je ružni stvari događalo od moga zadnjega notavanja na kartu i kad bi partija sve po redu kritizirat odni bi me đava jerbo bi triba potrošit ko zna koliko vrimena i živac.

Da mi niki dežurni grintavac ne bi prigovori partit ču najpri od vlasti jerbo ča je reka moj dragi pokojni prijatej Smoje oliti zvani mali Marinko mora se uvik ronjat kontra vlasti ma jopet moraš poštivat zakone.

Mislija san da se sa kukurikavciman neču puno potizat ma gospe mi jemadu toliko greški u koraciman da igradu košarku balun bi jin bi stalno u protivnika. Moran ka prvo istaknit da su pali na ispitu državnosti, poštivanja zakonski reguli a na kraju su ispali i kukavice. Pitat če te se kako?

Bome lipo falili su od prvega dana ča nisu dežvidali oni šator u lipu Savsku ulicu glavnega grada. A zašto to nisu napravili ja ču van spjegat, zato ča nisu jemali muda i straj ji je bilo od one sakrivene desne bulumente koje se oni boje.

Ja sebe ne smatran nikin pametnin čovikon ma isto me nikako ni kjaro ko troši i okle puste pineze za održavat toliki pogon. Tribalo je nasić i ispilat a bome i iscipat puste metre drvi za grijanje kako unutra tako i vanka šatora. Poza tin triba plačat razne hotele di spavadu priko noći naši šatoraši, pa unda i autobuse koji dovozu stalno novo regrutirane snage da dežuradu oko šatora da se čini kako ji jema puno. Triba jude napit i naranit ma to traži puste šolde jerbo nečedu jin svako dan davat juvu na pjuvaku ča bi mi u Dalmaciju rekli, koliko san upoznat lipi bokuni se tamo taru jer ne bi oni šjor Glogoški ostavja prisidnicu na obid da je bila koja loša spiza, a da ne govorin ko če namirit puste bire i vina jerbo malo nji duperaju vodu osin za umivanje.

I tako moremo nabrajat do sutra i ne bi bilo kraja, a kako čujen da se i razne udruge koje se financiraju iz državnega proračuna trse koja če boje i više šoldi namaknit kako čujen tu pridnjači HVIDRA pa ispada da država iz svoji sredstava finacira prosvjed šatoraša kontra sebe jerbo je cilj šatoraša ne pravda za branitelje i zaštita njiovi prav vengo vrlo podmuklo rušenje legalni i demokratski izabrane vlasti.

Znan da jema puno svita koji jema i više informacij od mene jer ja ovo samo zakjučujen svojon kratkon pameti i kad bi ji se tajno pitalo jesu li za oli kontra prosvjeda ultra desne struje šatoraša siguran san da bi bilo barenko 80% nji kontra dok se javno ne žele o straja izjasnit. To van je ka ona iz veloga mista „ Ča jema novo ? A jema jema puno lipi stvari samo nesmin reč“

Narod je priplašen i boji se svoje sjene a svak se brine za svoju fameju jerbo je fameja najvažnija. Da o ovoj temi ne bi puno palamudija jako me potresla izjava onega Klema da se prosvjedi provode po direktivi Milanovića kontra domojubi ka da u onoj grupi judi kontra šatoraši ni bilo domojubi vengo sami dušmani a bogu fala ZNA SE ko nije za nji odma je kontra nji. Ma deboto san zaboravi čigova je policija i koga sve po zakonu mora i triba sankcionirat, dali svakoga ko čini nered joli samo one koji su na transparentu napisali mi smo građani drugega reda, a ča se tiče izjave onega bračanina koji je ministar o policije jema jedna izreka u mene u Split „ kako ni hobotnica riba tako ni bračanin ni čovik“. Čast iznimkama.

O oviman na vlasti nebi tribalo puno govorit jerbo izgleda da su po onoj staroj narodnoj izreci stvarno zalutali u politiku ka guske u magli. Svako malo iskrsne ništo ča bi oni prominili a narod ji ferma sa referendumon. Gleda san na TV di su nabrojili 10 ionicijativa i ni jedna ni prošla pa to je za popizdit koji su to nestručnjaci koji na državnin jaslan primajući puste pineze ka plače nikad ne odgovaraju za svoje falinge koje nas obilato koštaju a uz to još i državi narušavaju ugled.

Moran još spomenit ono bužanje našega lipega Jadranskega mora. Jo judi moji koji su to kretini pustili ideju o traženju nafte. Jeman prijateja koji je visoko pozicioniran u InaGip koji me uvjerava da nima nafte za isplativu eksploataciju. Zato ja pridlažen da svi ka jedno misto na Brač prin 30-40 godin kupimo bile lancune i obučemo  se da šeici mre bit da bi to pomglo. Bi sigurno za vrime krnjevala.

Da rezimiran ovi su u svojoj nesnalažljivosti i nestručnosti usrali sviman motku a ovi ča se spremadu na vlast več su se iskazali kako su vladali tako da me je pravo straj ča če se dogodit sa ovon našon jadnon državon a i sa naman jadnin narodon jerbo nas svaka vlast jebe uzduž i popriko. Čovik je zajebena beštija koja sve izdrži i priživi pa se nadan da čemo tako priživit i ovo.

Eto dobili smo i prisidnicu koja bome kad oda bati ka da je soldat i sukladno tomen je na inauguraciji najavila da če lupat šakon o stol, bome kakva je jema i forcu zato.

Ka prvi važan državnički potez u spašavanju države i njezini  problema i reješavanju svi goruči pitanj kako o industriji tako i o zaduženju države ona je sa svojin savjetniciman zakjučila da je jedino rješenje svi zala da Milanović ka premijer odstupi  jerbo če nan odma poza njin teč med i mliko. Ne bi se tija mišat u njezine posle ma isto mislin da je  šjora gospoja pobrkala lončiće. Moran reč da jema „ jake „ svjetnike jerbo ona sigurno ne bi mogla nako studiozno izabrat goste u VIP loži za vrime inauguracije  a svi su bili ka prižence oličenje poštenja i domoljublja.

Moran se dotač onega našega dičnega najbojega državnega bivšeg špijuna šjor Karamarka jerbo mi ni jasno da njegova stranka ZNA SE prijavi u prošlogodišnjen poslovanju manjak od 10 miljuni kun a on se razbacije šoldiman kako bi mu stručnjaci po svitu i Evropi napravili plan i program za spasenje lipe naše. Isto tako se održavaju skupovi predizborne scene stranke ZNA SE koji koštaju, a ko to plača i od koji pinez?  Šjor Karamarko je izgubi par jaki igraći iz stranke sve kako  dotur Prgomet tvrdi sa svojon ultra desnon retorikon i ekstremnin odmakon sa pozicije stranke centra u ultra desnu opciju.

U vrimenu kad nan najviše triba razum i to bez podila na live i desne mi sve više srljamu u podile zahvaljujući jurišniciman ultra desne populacije kojima ništa ni sveto. U svemu ovemu kaosu nadan se da če državni aparat proradit u zaštitu države i sankcionirat sve one koji prkose vlasti i zakonu.Da se samo dotaknen naši prilipi autocesta koje bogami dobrzo neče znat ko jin je gazda i ko sa njiman upravja. Ispada da je oni sindikalista Mijat Stanić jedini pametan samo ga niko ne obadaje.

Eto štioci moji iscrpi san se jerbo se od bolesti nisan još rekupera ma isto se nadan da neče grom u koprive.

Živi i veseli bili pozdravja vas vaš Morski čovik ŠangareloEVO ME OPET