ŠTORIJE IZ MALOG MISTA
piše: Jadran Šantić Šangarelo
Jeman jednega prijateja preziva se Buljubašić i nikidan mi je ostavi na šankau našega malega mista jednu plavu kuvertu, moga je niko i promislit da je mito oli korupcija ma kako san ja sam piskaralo mene ne triba mitit jerbo od mene nima nikakve druge koristi doli smija i zajebancije. Govori mi Osvit Radić reka je Ido da češ ti sa ovin znat upravit i da to čuvaš jerbo slike triba vratit. Otvorin ja kuvertu kad unutra dvi slike u boji jedne bože te sačuvaj crne ružne ribetine i to na jednoj je uz metar i miri 45 centimetria na drugoj je otvorenega droba i lipo oćišćena a na kuverti piše vako:
Riba-pastir šijoglavac
Žive u Jadransko more do 200 metri dubine
Jemadu ji tri vrste
Nareste do 70 centimetridužine a ova je bila od 45
Jestiva je riba i jema ukusno meso
Ulovi se ritko i to najčešče po noći
Ovo su bile natuknice na kuverti a kako se u naše malo misto Gradac na moru i do sada lovilo svaki beštij u more ovo je dobra prilika da se nota još jedna ma bome jako ružna riba i o njoj napiše štorija jerbo ritki rib nima uvik i svugdi za vidit. Ovi moj prijatej Buljubašićje jedan jako duševan i drag čovik zajubjen je u ribarščinu tako za ga se more jako puno vidit na moru. Kako mi ni ispriča ništa o dotičnoj rugobi o ribe jerbo se nismo vidili ni čuli iša san se raspitat ća judi znaju o temu kako je on i di ulovi tu ribu. Ajme majko koji smo mi muzuviri fločuni i zajebanti, svaki koga san pita jema je svoju priću u kojoj je sigurno nadožunta barenko dvi beside.
Jedni su govorili da mu je niko da sliku te ribe i da je olovjena u koču, drugi govore da je on to ulovi a da ni bi ni svjestan jerbo se riba ni borila vengo se obisila ka nika stvar na udicu i on je misli da je zapeja za niko drivo dok je izvlači tunju, treči su bome lov opisali ka titansku borbu između moga prijateja Buljubašića i te rugobe o ribe dok je ni izvadi vanka iz mora i judi moji ajdete vi povirujte ča je istina a ča ni. Kako je ti moj prijatej jako vridan i zaposlen pitur nemoreš da lako ulovit ni za glavu ni za rep i onda mi je pristupi jedan miščanin koji kotira ka ozbiljan čovik od povjerenja i lipo ispripovidi ča se dogodilo.
Išlo se na more pridvečer lovit lignje na peškafodo a i na panule i u nika doba kad je pa mrak Buljubašiću se mome učinilo da mu je panula zapela jerbo mu je dobro trznilo ruku. Odma je ferma motor i počeja potizat panulu vanka ma bogami panula slabo gre vanka i on se dobro namući dok je ni izvadi skoro vanka. Kako je jema na glavi lampadinu upali je da vidi ča vuče kad tamo ništo crno i debelo skoro 20 centi a sa ružnon gubicon i velikin očiman ka u štringe. Neviruje sam sebi i jedva je pribaci priko bande o kajića pa se zableušija gledajuč a ča je ovo koja je ovo beštija o ribe? A koje je ovo vrsti ribe? A more li se jist, da ni otrovna?
Puno se pitanja postavilo dok ni doša doma i provjerija u enciklopediju o rib jerbo u nju moreš nač sve lipe i bože te sačuvaj ribe. Riba se lipo očistila i izila u slast, a ja san poslin dozna da se oni dežurni zajebanti koji uvik „sve znaju“ a u stvari su neznalice još karadu između sebe koja je riba kako se zove a jeli uvačena oli je samo slika podmetnuta i tako do u nedogled. Eto štioci moji i ovo je jedna mala kartulina sa štorijon o riban i ribariman.
Zdravi i veseli bili pozdravja vas vaš morski šovik Šangarelo.