piše: Jadran Šantić Šangarelo
Zna san puno puti reč za sebe da nisan baš niki tukac i da san puno puti u životu napravi prave stvari koje san zna odilit od pizdarija. Je to se i događalo prin ovi ludi vrimena kada ti pulitika ka stara i iskusna kurba zna udrit u možjane i kada te ka matunon iza kantuna niko udre u glavetinu prisudon koju su donili kurbe ustavni suci.
Po njiman marčapiju triba podržavat i uspješne aktere marčapije a posebno one državne triba slavit ka zaslužne laureate koji su unaprid birajući mašu ustavni sudac sebi pripremili zakonski odstup od prisuda da su KRIVI ZA RATNO PROFITERSTVO.
Pa judi moji štijen kako u Jutarnji list tako i u Slobodnu Dalmaciju di judi o pameti i znanja itaju drvje i kamenje na one spodobe u crnin mantijan i svi ji iz isti razlog proglašiju neprijatejiman naroda i države jerbo če sigurno ostat nigdi notano da je po prvi put u judskoj povjesti u jednoj državi ustavni sud dosudi presudu kontra ustava.
Ja mislin da jin triba napisat povelje za pamet i to na latinskemu jeziku i na Sorboni jin ji uručit a kopije ostavit za povjest legalizirani privara i lopovluka. Cili maša svita sa kojiman san se čuja smatra da je ovin ćinon lupešćine bačena mrlja na poštenje našega pravosuđa i ako DORH, USKOK, državni odvjetnici i poštena intelektualna maša ne dignu galamu i zatraže poništenje ovake presude, unda ćemo stvarno upast u pravna govna iz koji se nikad nećemo izvadit.
Smatran da bi tribalo pokrenit akciju široki razmjera i na kraju zatražit referendum u kojemu NAROD i PRAVDA traže da svi, ma baš svi, suci u crnin mantijan odstupe iz ustavnoga suda a da mantije zadrže i da se jave šjor Bozaniću za zaštitu dijacezena jerbo su i oni u crno pa su ista maša.
Proštija san niki dan kolumnu našega drčnega profešura Ive Banca u kojoj je udrija iz svi kaluni po šjor Anti Tmiću i to samo zato ča je nota da naša prisidnica paraderka jema različite aršine po pitanju ocjena i pristupa ANTIFAŠIZMU, jedne doma a druge kad je vanka. Pa zar su svi ludi i glupi u našen narodu koji pratidu TV i štiju foje i nisu svjesni tega pa Banac oče od nas napravit pizdu da ne vidimo i pored svoji očiju. Judi moji ako je i od profešura Banca priko načina je.
Da bi zaokruži ovu nota bene sudsku lakrdiju i lopovluk moran reč da svak od nas ko jema potribu tražit pravdu na sud sada dolazi u situaciju da drče ka gosposki čuko o straja i neviruje u stanje pravde u hrvata i hrvatskega pravosuđa. Ajme ti nan majko.
Da bi se ošerva na još jednu marčapiju moran se dotaknit onega našega mladega ministra Lalovca. Bidan uleti je lakovjernu u rat sa financijskin lopinama i u prvu kontru je zabi gol ma ovi su ga čekali i u sačekuši mu uvalili lažnjake pa mu uredno priko fiskalni blagajni kredu lovu svaki drugi dan na način da storniraju dil prometa a naš ministar je osta inkantan jerbo ni zna sa kakvin će narodon mora igrat utakmice.
I ja stari kenjac znan da se teško mogu izbrisat podaci upisani u kompjutere jerbo sve ostavja traga na serveriman i nadan se da naš Lalovac jema meštre hakere koji će lipo sve lupeže pronać i unda ji lipo tužit uz masne globe pa ji zatvorit poslove i od imovine se naplatit.
Pa cili svit iz povjesti uči i zna da AL KAPONE ni svrši u bajbok jerbo je ubija cilu regimentu svita vengo zato ča je utaji državi porez.
Duboko se u duši nadan da če moj mladi susid ministar lalovac iz našega malega mista stat na kraj onima koji kredu iz državni jasal.
Ja bi kad bi jema vlast u ruke ka vlastodržac doni befel u kojemen bi proglasija fiškale državnin dušmaniman i odma jin zapritija doživotnin bajbokon ako budu branili lopine na štetu države ka ča sad rade oni „elegantni“ šjor Prodanović i njegova umjetna gospoja koja prkosi godinan, Jadranka Sloković.
Znan da bi to bilo priviše jerbo zakon kaže svak je navin dok mu se ne dokaže suprotno i to triba poštivat ma jopet se cili naježin kad vidin ča radidu pojedini fiškali.
Moran ovod apostrofirat čudo neviđeno a to je da ustavni sud kaže kako je USKOK i DORH a bome i sdac triba bivšemu premijeru šjor Sanaderu eksplicite dokazat da je bi dužnosnik . Pa za gospu blaženu i boga dragega ča je on bi ako ne dužnosnik ni ka prisidnik vlade bi portir joli škovacin. Ma zamislite apsurda i kurbanjske sudačke pokvarenosti.
I još pa da zkjučin ni mi kjaro di su išli na fakultet i koje pravo su studirali profešuri Novoselec i Derenčinović kad o istoj temi podastiru različita tumačenja zakona iste drževe.
I puka bi ka čvrčak da se ne dotaknen proslave 20 godin naše OLUJE. Mi nesmimo bit ka oni ča su nas napali i koji slave sve svoje povjesne poraze, mi moramo slaviti naše pobjede jer jemamo ča slavit i to bez ikakvega srama i straja od bilo koga, a oni ča smo ji pozvali da se sa nama site svega a nisu i neče doći neka se zamisle jer to samo o njiman govori kakvi su prijetvorni i bojidu se pritnji iz Srbije koju podržava i velika Putinova Rusija.
Jemali smo ovu sezonu stravične požare i ni se nikoga uvatilo ni optužilo zato ja pridlažen da nan u Dalmaciju šjor BANDIĆ pomogne i pokloni nan dil kanera ča snimaju metropolu i virujen da bismo unda te bolesnike i kriminalce lakše ulovili. Prirodi triba stoljeće da se rekupera a nadan se da će ti palikuće nastradat od svoga dila paljenja.
Štioci moji živi i veseli bili a i ove vrućine pribrodili.
Pozdravja vas vaš morski čovik ŠANGARELO.