piše: Jadran Šantić-Šangarelo
Evo san doša lipo odmorit stare kosti na more ma e, da je bilo, nemoš se ošervat a da te ćakod ne trisne iza uva.
E dobro ste čuli svako malo nova pizdarija i to od lokalne do državne pulitike, pa judi moji nemoreš od tega uz najboju voju pobić.
Kad san van se javija sa zanjon štorijon iz metropole mislija san e sad ču bome malo odmorit ma za gospu blaženu onega ča je izumislija rič odmor tribalo bi nalupat jerbo od te riči nima ni slova. Ma bilo bi vrime da počnen sa mojin batudaman.
Najviša apsurdna situacija se događala u Saboru ovi dana i to na opću sramotu demokracije. A zašto?
Zato jerbo je vlast u ruke uzurpira ona prodana duša Plenković i ka despot Franjo Tahi smjenija ministre. Doša je spašavat fotelju onemu MARIĆU koji je doša iz Agrokora sa plaće od 100000 ijad kuna na 14000 kuna ode ka da j… lud zbunjenoga.
Meni je to malo za sumnju a neznan jeli i vaman dragi štioci. Lomila su se kopja radili su kako pametni tako i blentavi umovi i govornici. Otvorena je butiga za kupovinu i prodaju glasov i to bez posredikov ča je najveća blamaža stranke ZNA SE. Vela je sramota bome i za onega manjinca sa velikin apetiton za vlast Pupovca dok ga je uredno slidija oni bujne kose Radin iz Istre. A ostali da ne spominjen onega SDP-ova judu Sauhu koji je jedan bezprizoran farabut. Kako se oduvik znalo bez obzira na obostrano pjuvanje između stranke ZNA SE i Pupovca oni su uvik bili u koaliciji vlasti a isto tako je ti prijetvorni stvor bija za koaliciju sa SDP-om kad je ovi vlada. Pa judi moji takega kameleona bez obraza nima na ciloj baloti zemajskoj. Da ga nima tribalo bi ga izumislit i stavit u libre o pulitike sa masnin sloviman: PARTNER ZA SVE PULITIČKE OPCIJE I STRANKE – samo da je na vlasti.
I na kraju jadna li je država di premijer ka despot kaže da nije važno jema li HDZ većinu u Saboru ili ne a takav apsurd se nije čuo od Luja XIV za kojega je maksima bila Država to sam ja. Mora bit da je Plenki pobrka vrime u kojemu se nalazi. Bila bi prava nepravda po lipemu ne spomenit onega mlađahnoga Pernara. Svaka mu čast jerbo mu je svaka besida jemala težinu i koliko je velika istina u njegovomen otvorenomen napadanju oni koji su to zaslužili da se barenko jedan pobunija, ma ke, gospe mi svi su mučali ka zaliveni. Još jednon bravo mali Pernar.
Još bi malo oko izbori jerbo bi bila velika falinga kad se ne bi dotakli onega muzuvira sa lisičijon facon Vrdoljaka iz HNS-a za kojega se zna da mu je guzica jako široka i da voli sigurno sidit na više katrigi, a za očekivat je da če se sutra rado uhljebiti u krilu HDZ-a.
Na kraju bi bilo jako nepošteno ne spomenit malega Beru i nekad časni SDP.Pa ti momak je zaluta u pulitiku ka guska u maglu jerbo za stranku kojon je na čelu nima ni karizmu a da o autoritetu i ne govorin.Ja bi stavija na čelo onega visokega braćanina Ranka Ostojića koji jema i muda i forcu a i karizmu da SDP-u vrati ugled i status borbene i poštene radniške stranke.
Izgleda da su se desničarske utvare uzjogunile unutar stranke ZNA SE i uz pomoč one lipuškaste Brune Esih kojon dojam lipote kvari ( kako mu tepaju) najjači desničar Hasanbegović kojemu ružnoča i govorna mana ne smetaju da uz pomoč pobočnika bajnega generala za kojega foji notaju da jema tri ( 3 ) pensije šjor Glasnovića daju glas za spas dvojca Marić – Plenki. Poza tin odma izlazu meju jude sa novon liston za lokalne izbore . Pa to je da popizdiš i pukneš od muke. Da se ne bi zaudobilo isti ti general sa tri pensije kako piše u foje je ucjenija RH za puste miljune kun ne bi li zadovoljija svoju bazu U BH i HVO koji su dobrin dilom spašavali HDZ ,a on je meju oniman koji bi tukli cokulan u glavu i pucali iz livorvera u dušmane koji nisu na njiovoj liniji a da ne spominjen oživjavanje endehazije. Majko moja za smrznit se o straja i jada.
Evo ponovo se događaju skandali prilikon obilježavanja DANA POBJEDE NAD FAŠIZMOM I NJEGOVIN TRABANTINA. I gle čuda u u momen rodnemu Splitu koji je u zanje vrime dobija epitet desnega uredno je obilježen i proslavjen ti veliki dan koji je izvuka čovječanstvo iz ralja mraka i fašističlega terora,dok u metropoli nije niko bi iz državnega vrja na obilježavanju da bi svojin dolaskon „ uveličali proslavu „. A šta drugo reč doli SRAMOTA i na koji su način pale maske sa kojiman se kroz demokraciju sakrijedu oni koji bi fašizam vratili na scenu i „oživili lik i djelo“ Šjor Ante Pavelića. A za nevirovat je koja je to oholost da se tako javno otkrivaju ikao ji u svitu pratu i osuđuju njiove postupke.Moji splićani zovedu da se svi oni koji nisu na liniji NDH a bili su branitelju uključe u udrugu u kojoj je veteranka domovinskega rata tajnica Eleonora Mandić.
I ka zadnja tema ove štorije je Časni plagijator joli pripisivać Milijan Brkić zvani Vaso. On udre ka iz najjačega kaluna i to ka dokazani useljenik u RH svojon batudon uperenoj ka onemu kameleonu Pupovcu a bome i sviman ostaliman koji nisu na Vasinoj liniji neka se isele jerbo oni iako su u vlasti sa strankon ZNA SE neće krojit našu državnu Hrvatsku pulitiku. Sad mi ne gre u glavu kako dični Vaso na popis oni koji tribaju partit ni stavi i sebe jerbo je i on došljak.
I jutros štijen u foje kako su u Austriju 21 udruga i pulitićka stranka dale zahtijev vlasti da se zabrani dolazak ustašije iz ervatske na poje kraj Blaiburga. Malo če bit komično gledat kako se naš Plenki koprca jer kako je bi u Jasenovcu mora bi doč i u Blaiburg a ako to ne učine ne piše mu se dobro jerbo će ga njegovi desno orjentirani i neoustaški usmjereni razapet ka isukrsta na križu. Neznan kako če ovi Plenkijev ples po žici svršit oče li past pa se ne ustat joli če ka maška o 9 života i to priživit.Vidit ćemo i to čudo koje more postat i svjetsko.
Moran se barenko malo taknit predizborni aktivnosti u naše malo misto jerbo i ode vrije. SDP lipi plakate a HDZ-ovi sateliti ji uredno paraju i tako dan za danon. No nota bene ćuja san ništo dobro od dva tri simpatizera i člana stranke ZNA SE koji su eksplicite rekli da će ovi put glasat za kandidata SDP-a jerbo je kandidat SDP-a mali jako kvalitetan ,školovan ,poduzetan, sposobna i nadasve pošten tako ako ne budu poznati opsjenari iz stranke ZNA SE umišali svoje trikove moga bi SDP dobit izbornu utakmici i poslin dugo vrimena zabit gol suprotnoj momčadi. NO neovisno o svemu misto nan je raskopano i sve se ka ništo radi ma samo radi izbora .
Eto štioci dragi živi bili i veseli pozdravja vas vaš morski čovik Šangarelo.