Marko Jareb
Baba bi ka’ triba napalila kandelu.
U je’nu čašu bi ulila vodu, ne do vrha.
Pri vrhu bi ulila prst maslinova ulja.
Onda bi u čašu stavila lumin ki bi pliva na ulju.
Vazela bi šuferine i upalila kandelu.
Kandela bi gorila cili dan.
Da se ne ugasi tribalo je nadolivati ulja.
Znala je baba i višje dan’ držati upaljenu kandelu.
Ka’ si mlad onda ne pensaš o tomu
za ke je baba palila kandelu. Za mater oli za oca.
Ka’ dojdeš u nike godine počneš i ti paliti
kandelu ka i baba.
Siguro je baba palila kandelu za svoje pokojne.
Eto dojde vrime da nima višje babe i da niki
drugi za nju mora paliti kandelu.
Dobro je dokle je tako.
„Dokle ima ne’ko za koga svoga upaliti
kandelu, još smo na rodnoj grudi,
barenko u mislima, ma di bili.“