piše: Jadran Šantić
Ovu san štoriju dragi štioci tija notat davno ma sve drugi put pa jopet drugi put i tako san skroz zaudobija na nju. U nas u Dalmaciju pa naravno i u naše malo misto, živedu razni bonkulovići koji su u stanju dok govore o spizi skoro pa i ubit za dobar bokun.
U Dalmaciji je na cini sve normalno ča je iz mora. Ribe, škojke, raci, lignje a bome i obotnice, one jemadu posebnu cinu i načine spravjanja joli parićanja. Još dok mi je bi živ pokojni prijatej Mačak naletija san u butigu o Pivca na nike krake o Humboldtove lignje. Tija san provat ništo s njima sparićat za marendu i unda zvat ekipu pa ji zajebat da je to obotnica koju san kupi u Lea Peke jerbo je on u naše malo misto najboji lovac na obotnice.
Možda niki ni ne znaju da Humboltova lignja žive na velike dubine u ladnin moriman i da more naresti do 15 metri duga. Srićon ovi kraci su bili o manje pa ji se uspilo spakirat. I da ja ne dujin štoriju nikoliko san dan avizava jude da ču sparičat marendu kad njiman paše tako das u se svi dogovorili za subotu jerbo tada niko ne lavura pa se more i lipo bumbit.
Kako svi znadu da san ja niki meštar o vina i da se u mene doma ne more popit loše vino zapalao me da ja izaberen i kupin sve za bumbit. Kako nikad nisan parića te krake u Lea san kupi 2 kila obotnice pa san lipo naslaga kumpire hobu i krake o te gigaantske lignje u tepsiju o peke i da san sebi posla jerboa san tija dvi stvari i to da spiza uspije a i da ekipu zajeben ča je sve u tepsiji.
Nikor ni zna osin moga prijateja Mačka ča ja mutin. Lipo san otiša u Ploče u Lidla i kupija deliciju za bumbit lipo Sicilijansko crno vino “ Nero d avola” o 14 gradi a kad ga bumbiš pari da je mliko a ne vino. Za ne falit kupija san tri kartona po 6 butelja I konta san da nan je to prava mira. Lipo maslinovo uje iz Italije san isto kupi u Lidla a začine san jema u svome dvoru u pitarima koje sam sijen I prisađijen. Lipega ruzmarina vonjadu ti ruke od njega tri dana pa u moga šure Srđana friška lišča lovora mladega a jubičastu kapulu i luk san jema doma iz vlaške nabavjeno. I nisi udrija dlanon o dlan eto ti subota, a u petak navečer su svi priko mobitela provjeravali je li sutra marendin i da nisan šta zaboravija.
Sve san lipo pripremija a kruv ispo peke će kupit Šime Rosin (Bog mu da pokoj duši i on je prtija gori sa karton u jednemu pravcu). U subotu san se diga malo ranije i otiša popit kafu u Karaku ka i svaki dan da mogu trizne glave parićat peku. Niki su doznali za marendin pa su mi i prigovorili a mene nisi zva, nisan ja doresta vama, dabogda van prisilo. Taki su van naši judi u malin mistima, da čovik jema restoran bi bi malešan jerbo bi se brzo napunija pozvanin a bome I onin manjamuktašiman, koji jema najviše a oni nikad ništa ne paričaju i nikoga ne zovedu na spizu. Kad san doša doma žena mi je moja jubav namistila stol za goste i otišla do rodice Sinajke u Bošac i ostavila nas na miru da lipo blagujemo. Tamo nigdi oko 10 i po počeli su dolazit a iz peke lipi vonji zavladali kučon I svaki ko je ariva popija je bićerin pelješke travarice iz dubokoega smrzavanja, Pa i ja sa svakin tako da su se niki lipo pošprucali i prije spize.
Eto ga doša ja moment da se spiza stavi na stol I počne blagovat. Svi su navalili ka das u došli iz Bijafre, mastili su jin se brci kurilo je vino ka na špinu I svi su falili kuvara I spizu.
II
E kad se i tepsija pomazala počelo je, a di si kupi ovu hobu ma kolika je bila asti boga ča su kraci bili debeli ma meki ka pamuk, mora bit da si je po starinsku dobro izlupa batićen joli lazanjuron I tako daje i tako daje. Mislin se ja ča ču i gren jin priznat da nije sve naša obotnica vengo da su oni debji bili kraci o jedne furešte Humboltove lignje. Ma koga ti zajebaješ znamo mi ča je hoba nemoreš nas privarit, spjegaj ti to komen drugemu i sve tako. Kad je nestalo vina počelo se pomalo društvo ridit I svaki me je na vrata pita an jeli istina ča si reka i di sito kupi.
Sviman san reka da san kupi u Pivca kod maloga od Stipe Jelačića. Pasalo je par dan a mne na mobitel zove iz Pivca mali Jelačić, Šjor Šangarelo sva količina kraci se rasprodala čak mi je i jedan ugostitej bija u nabavu i kupija 10 kili. Pasalo je od tada dosta vrimena i jedan put poza pekon mi je ostalo par komadi o kraci Humboltove lignje. Kako san svaki dan na more a u te dane nije ništo dobro grizlo, uzmen ja te krake i nadijen na udice o samolovki i bacin u luku kraj potoka di slatka voda uliza u more.
Sutra ujutro nisan baš žurija vengo san najpri popija kafu u Karaku pa polako partija izvadit samolovke a baci san ji 6 na svakoj po 3 odice. Brzo san doša do pošte i počeja potizat konope od samolovki. Prva ništa ma nima ni kraka o lignje. Druga jedan mali ugorić od kila. A na sljedečoj me skoro srce izdalo, potižen ja a ništo mi kontrira i trese sa menon ka da niman 103 kila. Ma nećeš ti mene zajebavat vengo ja tebe i vuci, vuci kad ono na prvu uicu ugor debel ka moja šaka, drugi malo manji i na treću udicu ništa. Na ostale tri san izvadija još 5 ugori tako da san jedva doša sebi ča o sriće ča od adrenalina. Motaju se ugori po brodu jerboa ji nisan uspija zaklat ma kad san to obavija bila je puna kanta o jupola.
Lipo san se vrati u porat armiža brod i u malo misto iša popit travaricu sa prijatejon Osviton. Sidimo i pijuckamo a ugore san ostavija u brod. Pita on mene jeli čakod bilo? Je moj Osvite je ma mora bi u tebe izvagat koliko jema. A čega ča si ulovi i ja oden po kantu sa ugorima i moju boršu u kojoj držin kjuče o broda temperin i još nike sitnice.
Kad smo mekli na balancu u kužini zinija san i ja i on jušto 19 i po kili. Kad san partija doma svako malo san mora na rivi stat i pokazivat ulov svi su bili zabzeknuti a bome i ja jerboa nikad nisan toliko ribe ulovi a na manje udic.
Eto štioci moji živi bili i veseli pozdravja vas vaš morski čovik Šangarelo. I da ovi put ne bi zaudobija kako smo vidili da se jube kraci o Humboltove lignje i ugori nadivajte krake na male parangaliće i samolovke.
Sritna van lovina bila.
Zagreb, 19.01.2022 god.