Natalija Bajer
Gda su videli kak Te nemre
Ta žuka čaša zaobijti
Su Te ostavili i pobegli
Da ne bi i sami nastradali
.
Kak negda dok hodil si svetom
Tak je se i denes
Nedužne se i nemoćne zapira
I krvave škude lakomo prigrče
Kej nesu mogli zube stisnuti
Za Tobum pojti
Unda gda si od trnja venec nosil
I greje naše otkupljival
Da su ostali vuz Te
Morebit ovoga denešnjega zla
Ne bi bilo
Bi se spasili da Te nesu zatajili
Slab je denešnji bogečki čovek
Nemre kak Ti si mogel
Za nas trpeti
Samo ne razmem zakej se čudi
Kmice velike
Tera je se dugša i črnejša
I ne samo od šeste
Do devete ure ništa moči videti
Preleva se pošast na nas
I prek nas
Pak jadne, betežne i žalosne
F pomrčine nas drži
I badava je
Isusek premili
Kej se i Zemla potresa
Jednak kak i gda su Tebe raspeli
Čovek još navek nikej ne zna
I da sebe popraviti mora
Da bi Tvoju žrtvu zaslužil
Ne razme.