Dubravka Borić
Kunen ti se, Kate,
vroti’ će se Marin, tebi, vamo.
Šaj mi pisma i čekoj me
dokle čaguod stečen namo.
…Onda ćemo, Kate,
na ‘vien škoju sritno živit
i uzote, lipo moja,
na ‘vien škoju, jo ću umrit.
Vapuor je zatrumbeto tega jutra nikoliko putih.
Iz lipega svuoga mista, portili mladići
„trbuhon za kruhon“
priko bila svita.
Lancuni u bondi
mohali,mohali…
Šudarići bili
suze istirali.
Kroz buže i komišure vitar sviri.
Kruov protapanoje. Ni’ zid cidi.
Škure rasušene. Pitura požmarila.
Na pragu od kuće, ra’cvala murtila.
Mladići gledoli
za rojenon valon.
U njuon ni sve nojlišje
i nojdražje ostalo.
Sve ča sjalo,
sve daje bilo.
Sve ča sjalo,
sve veće blidilo.
A vapuor …bez dušie-
-ništa ga se to ne tiče.
Od škoja sve daje,
i daje se miče.
I ni mu rad klietvih
pukla pripela,
ča je Kati put Amerik ‘
Marina odvela.
Od Ognjene zemjie
do nesrićne Arjentine,
ni počivali, ni uživali.
Somo su žgobovali.
Od zvizdie Danice,
do Večernjice,
u potu i muki
kupali su lice.
Za pašoj pul doma
nikad nisu imali:
ni Onte, ni Keko, ni Miko, ni Pjerin.
Ni Bjuondo, ni Crni, ni lipi Marin.
Pakete doma nisu impoštovali.
Na zojnu …ni pisma nisu pisali.
U tujini ostarili;
u tujini ostali.
Sa storega kampanela,
jedno jutro, zabreco je zvuon i
lino…lino…zvoni.
Ču se do Amerik’,
a u kućici od stinjie
kroz ponistricu s cvićen,
sve svitlilo u Katie
od luminih i šterik.
Kroz buže i komišure vitar zavije.
Kruov protapanoje. Zide oblije.
Škure rasušene. Pitura požmarila.
Na pragu od kuće, usahla murtila.
Manje poznate riječi:
škoj-otok
vapuor-parobrod
zatrumbetat-zatrubiti,zasvirati,
misto-mjesto,naseobina
portit-odlaziti,otići
lancuni-plahte
bonda-strana,predio uz brdo
šudarići-maramice
buže-rupe
komišure-uzdužne rascjepine
protapanovat-prokišnjavati
škure-drveni zatvori na prozorima
pitura-boja,farba
požmarit-posvijetliti od sunca,promijeniti boju
murtila-vrsta cvijeća,murtela
vala-uvala
pripela-propela
Arjentina-Argentina
žgobovat-truditi
pašoj-novac za putnu kartu
impoštat-poslati poštom pošiljku
kampaniel-zvonik
zabrecot-javiti zvonjavom sa zvonika smrt osobe rođene u mjestu
stinja-kamen
ponistrica-prozorčić
cviće-cvijeće
lumini-plutajuće svjećice u čaši s uljem
šterike-voštane svijeće
usahnut-uvenuti