LUPEŠKA MAČJA POSLA

ŠTORIJE IZ MALOG MISTA
piše: Jadran Šantić Šangarelo 
Kako je lito vrime o pasji vručina isto tako je i vrime  o tradicionalnega druženja  po kultnin štacijaman koja se nalaze uvik na rivi i to u svin našin malin dalmatinskin mistiman. Kako se na tin požicjuniman ka po pravilu nalaze šentade uvik su pune i zauzete sa starijin judiman koji po ko zna koji put pričaju barufe iz mlaji dan i puste misne zajebancije.

Baš san ariva sa mora di san kala jedan parangalić o 150 udic za ugora lipo san veza brod i partija da ču doma, kad tamo ispod stare ogromne kostele skupila se jarpa svita. Stariji ništo pripovidaju a mlajarija se ceni o smija. Ni mi vrag da mira pa san okreni rutu do kosltele da čujen i ja ča je to tako smišno. I kad su se malo svi doveli u red o smija, a bilo je i oni ča su se zacenili priča jedan ne bi ga tija imentovat jerbo bi se najidi  kako je u jednu kuču o fameje Korljan ma ni reka o koje a jema ji puno davno živija i jedan lipi, pametni i furbasti mačak. Beštija o jedno 3-4 kila piza a koji je bi poznat ka lupež. Da lupež bome bi je prava prifrigana lopina.

Kako su u stara vrimena žene bile više u kući i oko špakera bome kuvalo se u svaku kuču i kad bi proša kroz kaletu po vonjiman si zna u koju je kuču toć o mesa di se frigaju kumpiri u kojoj se friga riba a di vonja lipa juva i dok bi doša do doma prošla te voja jist jerbo si se zakusija lipi vonji. Oti mačak o kojemu je rič u ovemu dilu štorije zva se Miki jerbo su se u ona doba  deboto svi mački po našin mistiman u Dalmaciju zvali Miki. Kako su boje fameje jemale i boju spizu a za blagdane se blagovalo delicije tako je jednon za božić u susidstvu tega mačka kurbinoga sina jedna susida šjora Mira stavila točat jedan obilati bakalr u široku teču da ga more sutra dan dobro namlatit i omekšat pa onda na bilo a i na brudet skuvat.

Ma ni vrag crn koliko je vengo koliko ga situacije napravu i tako ti mačak zvani Miki je nanjuši vonj o bakalara i vražiji nos neda mira. Najpri se vrtija oko te susidne kuče i ujedanput je kroz ponistru o kužine koja je bila otvorena da nebi kuča vonjala na bakalar uletija ti muzuvir lopina furbasta i iz široke teče uvatija ti veliki bakalar za rep i biž put svoga dvora. Ma šjora Mira ga je na vrime opazila i digla dreku ma Miki ne pušča bakalar i vuče ga po cesti doma, a šjora mira u panici i bisu vazela metlu i udri svon forcon po Mikiju ma luda beštija ne pušča i poslin velike borbe je ipak izgubi bitku sa metlon o šjore Mire. Poslin tega neslavnoga lopovskega pohoda u velikomen krugu je zaobilazi susidnu kuču a kad bi sreja šjoru Miru da bi petaman vitra i ne bi ga u temu momentu ni vrag uvati.

I sad štorija gre naprid pa pslin 40 godin u istu fameju Korljan jema mačak ma ovi se zove Micko. Nije to obični mačak vengo mačak sa pedigreom koji jema krštenicu rodovno stablo ma kako je  danas tehnika uznapredovala  utirali su mu čip ispo kože i uvik ga se more sa posbnin makinjan pronač. Ti mačak je doputova sa pašošon iz Bosne i puno lipo se prilagodi u nas u Dalmaciju. Lipo je naresta i boga mi je posta pravi pravcati lovac. Nima dana kad on svomen gazdi kojega nesmin imentovat jerbo bi se ofendi ispri vrat ne ostavi miša,štakora guščericu zmiju a u zanju je počeja lovit repce i druge letače.

I da vrag ne umre i ovi mašak Micko voli ukrest lipi bokun spize. Nečete virovat u istu kuču priko puta poslin 40 godin mačak o istoga gazde je uletija kroz ponistru o kužine popeja se na stol di je susida ostavila sebi meso za obid lipo seja na stol i navalija jist njezin obid . Kad je dotična gospođa poslin nikoga vrimena došla u kužinu jemala je ča i vidit ti vražiji mačak Micko poija jon je skoro sve ča je ostavila za obid. Digla ona dreku i štracon iz kužine počela mavat prema njemu a on bogami se ni baš puno pripa pa je zgrabija još jedan bokun mesa i pobiga kroz ponistru kroz koju je i uliza u kužinu.

Eto štioci moji da ni smišno bilo bi tragično ma opet kako to život čini štorije a more bit da se oni prvi mačak Miki koji je davno krepa sada nanovo reinkarnira  u mačka koji  se sad zove Micko. Šoma dela šoma i ja san pod kostelon čuja ovu batudu i evo san van je zabilužija na kartu, jerbo nebi bilo dobro da se zaboravi.

Živi i veseli bili pozdravja vas vaš morski čovik Šangarelo iz pakleno vruče Dalmacije.