Štorije iz malog mista
piše: Jadran Šantić Šangarelo
Svi bome znamo da je Zagreb odavna promoviran ka glavni grad Dalmacije. Sad se moredu niki zapitat a kako, zašto?
E sad ču van ja to lipo spjegat. Kako je u Dalmaciju uvik bilo puno pametnoga svita a napose onega gladnega i žednega znanja i nauke, uvik se tilo odit na velike skule u metropolu Hrvatske oliti Zagreb.
I kad se sve skupa zbroji onda je bogami po Dalmacije odilo na male i vele skule u Zagreb i ka pametan svit …gori i ostalo.
Neki su jubovali sa purgerican pa se oženili …drugi su ka dobri študenti odma poslin fakulteta našli posal i tako je samo u zdanji sto godin po Dalmacije okupiralo Zagreb… pa radi tega u Dalmaciju judi govoru da je Zagreb glavni grad Dalmacije.
Jema oni jako pametni koji su se i daje bavili naukon i velikim skulan pa su dobili magisterije doktorate i postali su velika imena ka znanstvenici, profešuri i akademici …ma da više ne nabrajan.
Ma dalmacija nebi bila ća je kad nebi bilo i zli jezikov koji su odma dali svoje „filozofsko“ mišljenje da …svi oni ća nisu uspili u Splitu partili su za Zagreb.
E sad …poslin ovega uvoda moran prić na stvar i pripovidit van štoriju o momen prijateju Mačku koji je fetivi Gračanin, a bome žive u Zagreb i njegovomen prijateju Jošku Stipiću zvanome „Mujni“ koji je isto fetivi Gračanin a i on, ka ča se razumi, žive u Zagreb.
Ta dva muzuvira …moran ji tako nazvat, jerbo su oba puni funcutarij i zajebancije…više se druže liti u Gradac vengo zimi u Zagreb, ma kako su oba penšjunati na moru su sedan osan miseci.
A sad da van spjegan štoriju.
Mujnoga svi zajebaju da svaki dan u Gradac gre na noge 10 kilometri tamo vamo da bi u Konzuma koji je na suprotnu bandu o njegove kuče kupi jeftini kruv na akciji. Ovo ča san van reka jema veze sa ovon štorijon.
Vozina ja nikidan moga prijateja mačka u ošpidal u Vinogradsku na vižite o srca jerbo če morat na operacjun i kad san triba doč po njega isprid ošpidala vidin da čakulaju on i Mujni.
Stanen ja sa auton kraj nji i vidin da se događa niki zajeb. Čujen ja da Mujni govori Mačku:
-Nemoj ovo nikomen reč u Gradac jerbo če me do smrti zajebavat, popizdit ču o muke ako se ovo sazna.
Ulazi Mačak u auto i odma ka po komandi mi spjega kako je srija Mujnoga isprid njegove kuče, jerbi isi žive u Vinogradsku kraj ošpidala i kako ga je Mujni tija pozvat na piće, ma onda je počeja piupkat žepe od trenerke i ustanovi da nima pinez i popizdi je pa je Mačka moli da če ga odvest na marendu ako nikomen ne reče.
Eto štioci moji ća van je život? Mujni je zvrši skule u Zagreb radi svoj cili vik bija je u rat i ranjen ma ni traži pensiju, oženi je Slavonku i mora bit da ga je ona učinila škrtunom a more bit da je samo racionalan.
U nas u Dalmaciju stari judi kažiju da su Boduli oli ti ga otočani i oni sa Pelješca škrti gore o Molijerova škrca, a vidite ča su metropola i Slavonka učinila o našega Mujnoga.
Bi san s njin u društvo puno puti ma se nisan lacnija njegova pića oli kave. Šta češ …ni čovik kriv, ma je isto zasluži da ja narodu prijavin njegovu sramotu možda če drugi put vazes pineze sa sebon i platit onu obečanu marendu i piće.
Eto moran reč i ovo Mujni ni nikad ništa vazeja nije se obogati žive u malemu stanu o četrdeset kvadrati …ma jema Dalmatinac koji su se dobro snašli u metropolu i bome se dobro fudrali za tri pokoljenja ka naš dični Nadan Vidošević …oli poznati doktor Ivo Sanader .
Ma sad da ne nabraj sve vi to znat eka i ja i do nove štorije živi i veseli bili štioci moji.
Pozdravja vas vaš morski čovi Šangarelo.