KO JE ODE LUD A KO ZBUNJEN

piše: Jadran Šantić Šangarelo
Nisan Van se dragi štioci javija okad san ka lastavica sletija na naše lipo Jadransko more. Je judi moji ovod je uvik lipo i kad je lipo i kad je ružno ka kad lije kiša, pogled sa terace na peljško neretvanski kanal liči dušu i tilo.

Eto poza ovin malešnin uvodom moran odma krenit kontra svi bandiri. Kako sigurno svi znate za naše poznate šatoraše na čelu sa šjor Glogoškin i šjor Klemon i njiovu bunu i pritnje dizanjen u ariju savske ulica paleči boce plina a da ne rečen pripremu za revoluciju moran se ipak dotaknit niki stvari. Ružne su bile slike za vidik kako na TV tako i sutra dan u sve foje u državi. Ljudi koji su stvarali ovu državu i slobodu dave i tuku vlastitu policiju koja samo radi svoj posal.

Scenarij koji je napravjen ka domaći rad u krugu tako kažu mnogi stranke Zna se nije baš upalija jerbo se nije nikoga uspilo potirat sa Markova trga ni sa misti u vladi kako je bilo rečeno kad mi dojdemo na Markov trg mnogi če sa njega otići.

Još me ne gre u glavu da je oni bivši specijalni policjot Klem bija među prviman koji su tili zadavit onega našega mladega specijalca a on za gospu ka od brda odvaljen sve je to stoički podnija bez da je primjenija fizičku silu a jema za to force i viška. Moran samo reč SRAMOTA ma neznan oče li se ko od odgovornih huškača zasramit jerbo izgleda da ti nimaju ni prst obraza a njiman je samo važno pošto poto ovu vladajuču garnituru srušit sa vlasti i cina nije bitna.

Kako san van zna spjegat i do sada da svaki dan štijen po dva tri foja tako puno puti naletin na niki interesantan članak. Evo prin dva dana san u jedne foje proštija članak šjor Tihomira Dujmovića za kojega bi moga reč da je bi ka Gebelsov uradak kontra legalno izabrane vlasti. Udrija šjor Dujmovič kontra prisidnika vlade, kontra cile vlade i kontra sveukupne koalicije a bome i odma kontra oni koji su te jude izabrali jerbo po njemu to nije narodna vlast.

Meni sad ništa ni kjaro pa bi moli da mi niko prosvitli možjane i spjega čigova je to vlast i vlada koju je izabrala večina naroda u našu lipu Hrvatsku ako nije narodna. Dajte šjor Dujmović ajte lovit rake govanare ča bi van u mene u Split reklo kad baljezgate pizdarije. Boje bi van bilo da se uozbiljite i da promislite da ni narod pizda i da mu vi morete prodat rog za sviču. Moran se zapitat u koju je radionu joli pulitičku kužinu vaš članalk šjor Dujmović napravjen a vas se ka glasnogovornika jedne političke minorne opcije istaklo da narodu obznanite istinu jerbo je narod neuk i neinformiran a vi ste tu da ga prosvitlite. Malo morgen.

E sad ka vječna zvizda repatica jopet nan se svojin svitlečin repon ukaza štovani stari šjor Joža Manolić največa enigma naših prostora koji je vlada špijan u četiri države i svaku prominu je priživi bez imalo straja za vlastitu glavu. Svaka čast izgleda da je neuništiv ma jopet je u pozicjunu da drugima koji su se uspavali u falšoj sigurnosti uz podršku ultra desni jurišnika zagorča život i zapapri političku karijeru.

Jo ovo zanje uvik volin čut kako to pompezno zvuči politička karijera majko moja koje je to veliko jaje mučak. Najprin je šjor Joža najavi ove dane izlazak knjige njegovih memoara i vidi vraga iz cile mase dokumenata niko ga je natira da reče kako je naš mladi največi po funkciji bivši špijun šjor Karamarko radi za Udbu pa unda da je radi za udbu i pokojni šjor ministar Gojko Šušak ma da ga je u svoju zaštitu stavi sam bivši prešidente Tuđman.

Bome ni meni ne bi bilo drago ma ako je to očita laž koja je uperena kontra mene i moje“ političke karijere„ ja bi odma odgovori kontra tega i napa autora iz svi moguči oružji ma naš šjor Karamarko je lipo doma sta cilu šetemanu i smišlja strategiju obrane i onda bombastično najavi da če tužit šjor Jožu jerbo su to same laži.

Ni to baš zvučalo ono ča bi u narodu rekli sa puno force vengo sve ka malo sramežljivo a stari lisac Joža je sve prihvatija i lipo mirno odgovorija da je to dobar put jerbo se na sudu uvik more dokazat istina. Jo koji retern, ma koji punat, ma ke punat AS od starega muljatora. Ma bravo šjor Joža.

Zadnje velike vijesti su ka i uvik bile o dolasku svetega oca Pape u Sarajevo. Moran reč da mi je ovi Papa Frane jako drag ka i oni veliki pokojni Vojtila samo ča ovi izgleda robustnije uvik reče otrešito ča misli. Održa je največu propovid ovega stolječa na kojoj mu tribaju zavidit svi na svitu koji se bave pulitikon spletkaman i ratoviman. Jako me je seimpatično bilo vidit da Papa Frane ne pati od grandioznosti pa je lipo izolirbandon veza svoj pastirski ščap kad mu je puka i ni ga minja sa nikin skupin a najviše me oduševi kad se ni vozi blindiranin autima ka naš bivši premijer koji je sad u blindiranomen prežunu.

Bilo je malo degutatntano slušat komentar onega prvaka stranke zna se u BiH Čovića koji se šprda sa papinin tonobilon, pa to mogu raditi samo ljudske nule a ne velikani koji če svojin diliman zadužiti svit i biti upisani u povjesne libre cilega svita ka nazaboravne veličine jake po svojoj svetosti i velikim djelima. I ka vrhunac svega Papa Frane pridlaže da se najveći krščanski blagdan Uskrs slavi na isti dan kako za katolike tako i za krščane pravoslavne ispovjesti. Evala sveti Oče svaka ti je na mistu i miritaš sve hvalospjeve na svitu jerbo je i ovo jedan dokaz tvoje veličine i dobri dila za pomirenje sih i svakoga.

Jako me se dopala papina opservacija na vidilice i Gospu kad je reka da Gospa ni šalterska službenica koja ordinira po utvrđenemu oratoriju. Neka Međugorje ostane svetište dapače ma isto triba sa miron pristupit Gospi i njenin „ ukazanjiman“. Ja smatran da nemore nikakvi komešju od popi i fratri sa biskupinam i kardinaliman iz cilega Vatikana donit dekret ka ča je bilo prin „ Javilo iz štaba nema Boga“ nije bilo ukazanja joli je bilo i točka, triba ostavit narodu da on živi sa i u svojin uvirenjiman.

I na kraju da van ne bi bi dosadan samo još jedna delikatna tema a to je fašizam u Hrvata kojega ka perjanicu nose ultra desni jurišnici pa nan ionako teško brime povjesti pritvaraju u velike pize oko nog sa kojman nas žele bacivat u največe dubine mora. Kukasti križ taj simbol največeg stradanja svita u povjesti uz sveprisuti pozdrav sa dignuton rukon Za Dom spremni koji nas svrstavaju u red fašističkih zemaja koje se i poslin 70 godin još nisu odrekle crne prošlosti.

Utakmica bez drukeri na tribinan tribala nan je otvorit oči kako nas svit kažnjava i onda iz nike radionice koju podržavaju štovateji fašističke i ustaške ideje i političari i stranke i strančice zanemarivog broja članova napravi ovakovu psinu koja je ka roketa obašla svit i učvrstila ionako loše mišljenje o nama da smo zemja nastala na fašističko ustaškim zasadama. Neznan dokad vako i do kada če vlast tolerirati huliganizam navijački potpomognut političarima sumnjive prošlosti. Ako policija svojin brzin djelovanjen ne pronađe autore i idejne začetnike ove sramote u svitu nan se loše piše a izbacivanje iz daljnjega takmičenja če nan bit najmanja briga.

Eto štioci moji zdravi i veseli bili pozdravja vas vaš morski čovik Šangarelo.