tekst: Jadran Šantić Šangarelo
Puno nji će reć on je stari čovik pa ga svaka stvar smeta ma je šipak, poznajen ja regimentu stari i stariji o mene koji se ne ošervaju na ono ča mene pritišče i muči.
Evo u ovu lipu i najlipju našu jemamo dušmane ma sad iznutra koji i ne spavaju vengo stalno smišjaju kako lipu našu vratit u doba crnila, ustašije i jubitejstva dr. Ante i crni stranic povijesti koje je on ispisa sa pjačkon ubojstviman i prodajom majke zemlje a bome su pridonili i oni čiji potomci i daje streme njegovoj pulitici.
Bilo bi me lako notat na kartu ono ča je vezano za tu bulumentu da ni i oni igrači ka ča je šjor Bandić koje niko na svitu nemore razumit ma jema on svoje poturice koje se njemu priklanjaju a jema i oni kojiman on podilazi pa i po cinu morala i časti koje on doduše i nima.
Sad bi u ovemu nizanju tribalo jako pametno najavit onega ča stalno ka i popi križa prste i na jedan najperfidniji i pokvaren način dipli u ariju obečavajući svakomen sve a posebno hosovcima koji su mu prirasli srcu i koje ne smi iznevirit jerbo če ga užgat ka šuferin a bome su mu to i poručili. Je da i je bilo samo ka šaka jada na prosvjedu ma gospe mi jema nas puno koji se bojidu njiovi poruka.
Moran napomenit da je bože mi oprosti i oni serator Milanović pustija da projde na pečatu stranke čije članove moreš izbrojit na prste ma simpatizeri su jin brojni oni njiov ZDS pa se danas funcut Plenki vadi na to i on nemore ništa prilomit priko kolina jerbo su mu ruke vezane, a njegov ministar lipo nas neupućene avizaje da triba najpri donit zakon pa unda skidat ploču u Jasenovcu. Bogami moran reč da se u stranki Zna se sve radi po propisiman i to od pjačke i privatizacije do podržavanja ekstradicije pod hitno „največega dušmanina hrvatskega naroda “maršala Josipa Broza Tita. E vidi se da je oni vlaj Milanović sve to zamutija misleći da čedu za njega glasat i livi i desni. Ča bi mi u Split rekli, a e.
Kažu da riba smrdi uvik o glave pa moran reč da je ovi iz pogane mlake za održat vlast proda dušu onemu velikemu ervatu Hasanu i onoj lipuškastoj Bruni ma je odma odlučija oživit I.L. Ribara i sedan sekretari SKOJ-a. Ni mi jasno kako če to sad odigrat i očeli dat autogol sebi zapravo joli iz ofsida?
Ja mislin da je oni visoki ma izbleušeni Bero zna svoj posal bija bi izveja jude na ulice ma bez plinski boca i javno se pobunija kontra gazde iz Pogane Mlake, možda bi tada sve bilo drukčije i drug Tito bi još bija na svomen mistu. Kažu u pravosuđu da je svak nevin dok mu se ne dokaže krivnja a ja bi bi najsritniji kad bi Hasan, Bruna, biskup Košić , Plenki i ostali iz redov desnice sakupili vjerodostojne dokumente iz koji bi mi svi saznali i progledali o kojin je to zločiniman drug Tito izda befel iz kojega je vidno i da ga je potpisa. Ja bi ga prvi osudija i to javno ma odma bi podastra javnosti sve gadarije i razbojstva dotura Ante i njegovi pobočnika i krilnika.
Moran se dotaknit i naši susidi Bosanac kojima su se otvorili apetiti za našin moren i oni bi pod mus zabranili gradnju pelješkoga mosta a to bi izgledalo ka da mi njiman u njiovu dvoru isprid kuće zabranimo gradit garažu a bez nje bi jin auto nastrada od krupe. Mala usporedba a moga san reč ajmo mi tražit Neum jerbo je to u davnini bi naš teritorij dok ga ona pokvarena svita iz Dubrovnika ni prodala.
Evo smo došli i do naši prijatej Slovenac koji oče na svu silu naše more a i zemju i u tome jin je pomoga i oni kurbanjski sud pa sada letidu po svitu i mašedu presudon ka da se ni dogodilo sranje zbog kojega smo se mi izvukli iz tega procesa jerbo su oni sami ( Slovenci) kontaminirali joli zasrali motku oko tega sudovanja. Naši pulitičari nisu nespremni da udru Slovenciman peščurinu za bezobrazluk koji izvode a posebno oni njiov ministar vanjski poslov šjor Erjavec. Jo da mi ga je 5 minuti u neki portun on bi odma poza tin bi za nas.
Danas se više niko ne sića onega dotura znanosti Tadića i njegovoga iskanja gospodarskega pojasa. Pa judi moji ti šjor Tonći Tadić je dotur znanosti i da ni zaluta u pulitici u minornu stranku moga je napravit čuda za našu stvar, jema je jako zdrave ideje za zaštitu hrvatski prava, kako na moru tako i na kraju. Ali eto zaluta je meju muzuvire pripisivače i slične pa je odma škartan iz pulitike. Baš me je žaj.
Stranka Zna se je ka i oni iz Pogane Mlake učinila kurvanjsku trgovinu da bi ostala na vlasti i tako i daje štitila lupeže, pripisivače,prevarante, falsifikatore i sve one koji na nepošten način dolazidu do bogatstava. Sad su ka uveli kažnjavanje zastupnika ma ne znaju koje ispričnice če vridit a koje ne. Možda će Njonjo tražit da mu baba napiše da ga je boli zub i eto ti isprike sa težinon babina potpisa. Mislin da će šjor Vaso i šjor Barišić ka vrsni pripisivači sami sebi potpisat ispričnice koje će njov mentor Plenki odma uvažit.
Dosta je bilo udrit desno već san se iskrivija i moran nać ravnotežu. Oni mali po svemu osin visini Bero je usra motku sa SDP-om a samin tin i oni koji su glasali za njega i sada jemamo stranku u rasulu a da pizdarija bude veća oni malešni dotur iz Staševice Ostojić stalno bacaije upojuvke i oće priko Bere da on vodi stranku. Možda bi i moga ma jebe ga Napoleonov kompleks koji mu neda uzlet pa će uvik ostat mali o kužine koji će začinjat svojin upjuvcima sve afere u SDP.
Nikad više stranka SDP neće narest da bi osvojila vlast dok se ne promini prešidente i dok stranku ne priuzme neki novi tip sa karizmon vođe, dobar organizator i narator a spreman svakomen pogledat fišo u oči sa svojin poštenjen jer je danas naš politički prostor toliko zagađen da mu onda niko ne bi moga kontrirat i to bi narod pripozna.
Moran notat i ovo tribali bi Ranko Ostojić, Tonino Picula i ostala mlada regimenta pod mus nešto poduzet i ne čekat nikakve nove izbore negih inicirat i krenit pošteno u borbu sa čišćenjem vlastitih redova a isto tako jurišat na nepoštenje sada vladajući stranak i nikad baš nikad ne nuditi ni prihvaćati bilo kakav savez sa onin Pupovcem i njegovim trabantima jerbo je on najpokvareniji političar koji samo nastoji uvik bit uz vladajuće. Triba ga totalno marginalizirat i nedat mu više da se približi vlasti svojin marifetluciman.
Tija bi se dotać i ovi pusti požari koje nisan zapamti u svomen životu a jeman bokun godin. Bilo me drago čut da će se dat ka ekstra nagrada vatrogasciman pa san odma promisli gospe moja a zašto nije krenila ideja od saborski zastupnikov da se i oni solidariziraju sa vatrogasciman i odreknu se jedne misečne plaće. To bi jin podigle cinu a judiman bi dobro došlo, ma da je bilo. Ko je vidija dilit narodu teško stečene šolde u klimatiziranin prostoriman o sabora doklen vatrogasci umiru o vrućine i dima koji i truje.
Moglo bi se promislit da su ji lako stekli. A ZNA SE – „NISU“.
Evo štioci moji deboto san se satra notavajući na ovu makinjetu pa odma boje razumin saborske zastupnike. Ni jin posal lak a o plaći se more govorit.
Pozdravja vas vaš morski čovik Šangarelo i zdravi i veseli bili.