piše: Jadran Šantić Šangarelo
Evo jutros san ka i svaki drugi petak kupija „Otvoreno more“ i skoro me kolpalo kad san doša do štorij o ribanju. Judi moji kako svaku štoriju proštijen tako san počeja i ovu i skoro da mi ni došlo zlo kad san proštija svoje prezime u štoriji koju piše niko drugi vengo jedan slovenac kojega ja ne poznajen.
Odma san počeja još zornije štit da mi koja misal ne pobigne i moran van reč da onemu nevirniku koji se spominje u štoiriji moran poručit .“ Nisu sve ribarske priče napuvane i pune laži vengo i jema i istiniti ka ča je i ona moja o mome pokojnomen prijateju Žoržu i kišnin ovčicaman oliti arkajiman.
Ma bogami moran zafalit šjor ANDREJU BALANČU ča me je vazeja u zaštitu i ča viruje mojoj štoriji.
Puno van fala šjor ANDREJ i ovin napison ste mi vratili viru u Slovence jerbo san jema jako loša iskustva sa Slovenciman osin časni iznimki baš iz Maribora i jednega moga dragega prijateja ANDREJA KRANČANA iz Zreča kojega san upozna prin više od 30 godin i uvik smo ostali prijateji. A bome prijateji smo ostali jerbo smo se upoznali ka izviđači oli kako se to danas reče Skauti a ta prijatejstva trajedu do smrti.
Ma da se vratin na ovega drugega Andreja iz Maribora, ni mi kjaro kako se on služi našin dalmatinskin besidan oli mu je ko u rodu Dalmatinac ka Nona oli Nono jerbo neznan di je naući naše beside.
Dunkve kad čovik koji voli more i ribarščinu izajde na more odma se je odluči na strpjivost oliti ga pacencu a uz to i patimenat ako ni ribe i takve jude triba stimavat i virovat jin jerbo oni ritko lažu o svojin uloviman. Oni ča na ribe gredu iz zajebancije i kojiman to ni u krvi ti su fločuni i lažovi a njiove ribe restu sve dok jin priče traju i na kraju ispade da su lovili kitove a ne naše lipe priobalne ribe meju kojiman zna bit bome i lipi komadi koji se po današnju zovedu kapitalci.
Evo za onega nevirnoga iz početka štorije o šjor Andreja iz Maribora podatak koji če kod njega opet izazvat neviricu i njegovo omalovažavanje.
U prvoj vali našega malega a lipega mista GRADAC na makarskoj rivijeri i to skroz na južnu bandu jedan doseljeni a promučurni bosanac Dragan je potopi jedan brod od niki 30-40 metri da bi ga koristija ka poštu za ronitelje i oni ča poznaju more znaju da je to vrlo brzo posta „BRAK“ oli dobra pošta za lovit ribu iz kajića.
Na tu poštu mi je drago odit jerbo ne moran bacivat sidro jebo me boli škina kad ga moran izvadit vengo se vežen za njiovu bovu. Nikidan san pri ovi jebenu bura koja je puvala dabi 8 ndan iša lovit i lipo me krenilo, uvati san 8-9 bukvi skoro 3 kila u njiman i onda mi se dogodila dežgracija.
Lipo san na dvi udice nadija dvi lipe kozice oli kako ji ovod zovemo kocke i skala do dna. Ništa. Prođe 5-10 minuti ništa i odjednon mi ništo zamuze šćap priko bande o broda a ja udri kontru ma gospe mi ne mogu motat rolu jerbo ništo veliko drži i potiže mi šćap u more.
Malo san na kočnicu laška krenu i jopet kontrira ma je boga jokina ništa i tako san se borija niki 20 munuti dok mi to čudo doli ni skoro slomilo šćap ma isto mi je prikinilo krenu od 0,45 i odnilo udice i olovo.
Osin ča san se infota muka me uvatila jerbo neznan ča me to izludilo. Taj dan mi se to dogodilo dva puta. Niki kažu da je veliki ugor drugi da je hoba treći da je sigurno lampuga četvrti da je bi veliki gof peti da je pagar a ja ni danas nezna ča je.
Poslin par dan san vodija i moju dragu ženu na ribarščinu jerbo ona voli lovit a naskoli lignje e to jon gre od ruke. Poza neki po ure i njon se dogodila ista stvar ka i meni ni mogla izvuč ništa i ja san joj srčano skočija u pomoč ma ke a to ča ni mogla izvuč jon je prikinilo krenu i odnilo udice i olovo. Jo da me vidit tu beštiju samo da znan pa ne moran je nikad ni ulovit.
Da bi nadopunija ovu štoriju moran pojasnit kako san ja sa Mariboron vezan. Od moje žene rođak je nekad bi dobar fuzbališta i izgra je fuzbal u NK MARIBOR Kako je tamo upozna jednu smišnu i dragu štajerku Jozicu bome se i oženi i cili svoj vik otad žive u Maribor. Ja volin doč kod nji u vižite jerbo su mi oboje dragi a šjora štajerka i dobro kuva jerbo jon je mater jemala gostionu oliti gostilnu i upozna san jedno lipo društvo u gostionu PRI LOVCU pa ovu prigodu koristin za pozdravit rođaka od moje žene Slobodana Bobu Filipovića i njegovu ekipu.
Eto ovo bi bilo sve a poseban pozdrav šjor Andreju i ako ga puti nosu na jug neka se javi volija bi ga upoznat i počastit pićen. Sad kad smo i mi se vratili u EU di smo uvik spadali a di su nan zapinjali noge Slovenci iz njiove pulitike drago me da jema i pošteni Slovanac ka i oni ča ji ja poznajen.
Živiu i veseli bili pozdravja vas vaš morski čovik Šangarelo.