DALMATINAC NA SMUČKANJU

ŠTORIJE IZ MALOG MISTA
piše: Jadran Šantić Šangarelo 
Je judi moji …ovo van je štorija iz malega mista. Malega mista na ijadu i po metri nadmorske visine. Malega mista di se samo radi lipi staz za smučkanje (ća bi mi dalmatinci rekli) …beredu pusti pinezi. Je, je! …dobro ste proštili, a moran van spjegat i jednu važnu informaciju da su na toj lipoj lokaciji i na svin okolnin mistiman Hrvati najbrojniji gosti i da svaku godinu u prvi misec jema hrvatska šetemana di se sviri hrvatska glazba i hrvatske pisme i to tuta forca.

Znan da čedu niki pogodit …ma da vas više ne mučin …to van je na Kron Platzu, a misto di san bi ka u raju je San Vigilio di Marebe.

Ovu godinu me je žena i njezina sestra natirala da gremo na snig kojega nima ma isto smo se smućkali i to priko mire. Po noći topovi o sniga tučedu tuta forca, a niki gusjenićari ča ji zovedu ratraci …sve to lipo razvozu ravnaju i nabijadu tako da ujutro dojdete na stazu koja je liša ka da je jedan veliki parket samo ča je bilega kolura.

Je judi moji ovo van je prava istina. Temperatura bi ujutro bila oko nule a u podne 12 -13 stupnji …i tada je već ča bi se skijaški reklo snig juva …oliti po taljansku …brodo.

Prikineš se smućkat i di ćeš vengo u gostionu na lipi bibit, a kako je gostiona ma ne jedna vengo više nji …odma uz stazu di san ja bi, a zove se Miara …jemate puno izbora.

Jedan lipi liker u koji san se zajubi zove se Prunja, a serviraju ga sa jednon velikon suvon šljivon na štikadentu koja se toćala u temu likeru na vrj bićerina.

Kako ja nisan neki profesionalni skijaš …ja san sebi da regulu da se smućkan do podne i finito.

E sad dolazi ono najboje. Nemoreš ti tu popit samo jedan bibit vengo barenko 3 i bome izist porciju pomfrita da ne umreš od debulece dok čekaš obid u apartaman.

I lipo dok sidiš u zavitrini …svučeš se i sunčaš, jerbo u zavitrini fibra zna bit i do 25 stupnji na suncu. I sad ti je to cirkus svućijedu se ženske leva, leva a jema ji bome svi kalibri i sa miljun mali način o donje robe oću reć maje i ređipeti svi se mažedu sa nikin kremama…i sunćadu se okrenuti faca u nebo dok ne izgoru, ma moran reć da san i ja bome izgori po ćeli i nosu i to ka indijanac.

Viče žena name …nesriknjače cili češ se popšrištit a moreš dobit i rak o kože, maži se!

Ma kakvo mazanje mi u Dalmaciji se nikad nismo mazali i ništa nan ni bilo.

Ako bismo i izgorili onda bi se ogulili i jopet nanovo.

Vidija san judi moji svi moguću raca na ovemu svitu na tomen snigu, svi mogući kostumi i koluri …ma su me najviše dojmila malešna dićica od 3-4 godine koji se ućidu smućkat.

To je judi moji čudo kako ta dica bez straja brzo nauću upravjat skijama ,a kako su smišno obučeni ćovik bi ji izi o dragosti.

Zaboravi san reć da san bi sa ženon njezinon sestron i dvi njiove prijatejice. Lipo su me tetošile, ranile i držale me ka malo vode na dlanu. Bogami moga bi se ja na to brzo naviknit ma za nevoju brzo projdu ti lipi dani i onda na rikverc pa doma u Zagreb.

Svi 8 dan smo jemali litnje vrime i moran reć da je i gori lipo …ma isto me već počela srbit guzica za odletit na more.

Je jema moran priznat svašta lipega po svitu ma Jadransko more je lipota nad lipotaman.

Eto da završin ovu štoriju i da rečen da se nisan slomi i da me je jako drago bilo ča me žena nagovorila, a gori san vidi da nisan bi najstariji jerbo je na snig bilo i judi o osandeset godin.

Nadan se da ču dogodine vodit unuke i dat ji u skulu da nauče smućkat, jerbo smo mi Splićani najluđi svit na baloti zamajskoj i na smućkanje gremo ćoporativno svugdi po svitu.

Eto dragi štioci ovo van je bila štorija ka jena turistička kartolina i nadan se da nisan bi dosadan.

Zdravi i veseli bili pozdravja vas vaš morski čovik Šangarelo.