piše: Jadran šantić Šangarelo
Jo judi moji ča je nama dalmatincima lito komplicirano i pomalo za izludit!
Mi koji živemo priko zime u metropolu oli u niko drugo misto u unutrašnjosti kad se na kalendaru pojavi misec Marač več nas guzica počne srbit jerbo bi tili ča pri partit na more.
Za razliku od nas oni ča živedu na moru počnedu razbijat luduru kako će proć priko sezone, koliko će pinez zaradit, oćeli bit dovoljno za mirno prizimit a oni ća jemadu veće kapacitete o posteji i apartmani odma stavjadu račun unaprid i planiraju koliko će jin ostat za meknit na bandu i to joli u banku joli nigdi u štramac.
Ma zgrišija bi puno kad bi priskoći i još jednu vrlo interesantnu kategoriju Dalmatinac a to su oni stariji grintaviji koji se isto bavidu turizmon i koji isto afitavaju kočete u kamaran i apartmane samo oni računaju da bi jin se najviše isplatilo da jin šoldi lipo ligaju na račun a da jin se turisti ne vrtidu po kući jo koji bi to godimenat bi.
E, a di se tu ja uklapan pa ka turistički pregalac nigdi jerbo moja draga žena i ja ne afitajemo a za druge zanimacije san ostari. Kad san bi mlaji za oko 35 godišć sa 30 kili manje i bez sidi vlasi i sa kako ženske znaju reč sa pločican na stumiku bi san jedan od žešći propagatora našega turizma i lipe naše jerbo san kažu bi veliki galeb, a dans san malo ocva pa se mogu samo sičat otizi vrimen i uzdisat jerbo su uspomene žive a sa druge bande nemoč je zavladala iako je danas ponuda veča a konkurencija slabija jerbo ovi mlaji beš ne vole korteđavanje a ni teški posal Galeba.
Ma za gospu milu jema u temu mome prošlomen životu svega ča ja mogu unucima ispripovidit i to od lipi njemic priko šesni čekinj, talijanki koje cvrkuću ka grdelini, francuzic sa onin lipin uvu zavodjivin jezikon i puno još nacij koje su kuntente odile doma sa lipin uspomenan sa Jadranskega mora i sa lipin znanjen o našoj dragoj domaji.
Zašto san van učini ovoliki uvod, zato jerbo san se siti jednega moga poznanika koji je ti bit galeb i kad je uvati obilati sedandeset banki u guzicu. Ti moj poznanik živija je u Stari Grad na lipemu i najsunčanijemu otoku Hvaru. Ni on bi domaći vengo furešti koji je rano iz Šumadije doša trbujon za kruvon na more i zajubi se u more a i u jednu našu bodulicu i tako je osta u Paiz ( ča oče reč Stari Grad).
Nikad nisa dozna a nisan ga ni pita za ime jerbo smo ga svi zvali Žika. Dugo je on vridno radi u građevinu i zasluži je penšjun ma je ka ora oli jastreb pratija nas domače Galebe i vrlo pomno je uči sve naše škerce a bome je sam uči i jezike. Poduku su mu uglavnon na ispravjanju govora davale strankinje a on bi priko zime ućija iz libri ma najviše beside a gramatiku je zna ka Tarzan.
U nika doba ga je žena napustila i priselila se bogu na istinu a on je pod stare dane dobi krila i počeja je žešče nego kad je bi malji osvajat srca svi strankinj koje su mu se na nišanu pojavile ni on bira godine vengo je sviman ulića pa ča bude. Ni bi ružan a ni bi ni niki lipotan ma je jema onu stvar ka buzdovan i uvik je svoje osvojene dame vodi na najbližu nudističku plažu da bi jin nako usput ka da ni njegov posal pokaza svoj alat pa da se one odluče.
Ti naš Galeb- Šumadinac je napravija i svoj stil tako da je zimi priprema od maslinova uja i Gospine trave Kantarionovo uje koje je jako zdravo pa bi svoje trofeje ženskega roda lipo maza i masira da ča pri pocrnu a da jin koža ne izgori. Jednon prilikon je doša u osvajanje na nudističku plažu i ugledala ga je jedna švabica roba od niki 60 godin ma bogami očuvana, njegovana i propju lipa gospoja ma za ničiji ukus možda malo punija ma niki bi rekli boje da juja nego da žuja i kad je ona našega Žiku vidila nako golega i obilatoga alata pala je u afan.
Žika je skoći ka momčić proliva je ladnin moren i lipo je cilu milova dok nije došla sebi a ona kad se vratila u žive na očigled sviju mu je zafalivala na brizi i nježno stiskala njegov buzdovan sva ozarena i posli malo vrimena ga pozvala u more a tamo su učinili oni posal čin su doplivali iza prve sike. Trajala je ta seansa bome i više od po ure i na kraju se naš Žika jedva vrati a ona cila procvitala.
Kako je to bila obostrana jubav na prvi pogled naš se Žika u te dane dok je bi s njon ni zanima ni za koju drugu deboto dvi šetemane. Posli ti lipi dan dan kad se njon završava ti litnji vijađ ona je lipo u jednu konobu koja se zove Jurin Podrum zaprosila našega Žiku. Ovi je izbeči oči od iznenađenja bi se i on zagrija ma jopet je misli da je jubav samo za mlaje ma jopet ni se puno pridomišlja i već sutra dan su partili u trajekton za naš lipi Split i daje lipin velikin Merđon u Franfurkt am majne u njemačku di i sada živedu.
Jako se dobro slažedu i naš je junak naući lipo po tudešku govorit i svako lito dolazidu u njegovu kuću u Paiz koju su lipo i šesno renovirali iako bi mogli u svaki boji otel jerbo gospoja jema puste pineze. Naš Žika uvik kad arivaju u Paiz poslin par dan lipo počasti sve one sa kojiman je bi u dobre a one druge samo lipo pozdravi. Neznan baš da li je Žika još moćan na alatu ma bogami je zasluži boji život a i zaradi ga je pošteno sa svojin alaton i znanjen.
Eto štioci moji jedna kratka priča iz moje mladosti koja je oslikala mnoge Galebarske živote iz onega vrimena. Jako san žalostan kad danas vidin ove mlaje samo govoridu na mobilete ćićaju Coca colu i druge bibite stalno se oblejavaju i strankinje kad se vračaju svojin kućan gredu žalosne jerbo nisu jemale nikakve avanture .
To je najlošija reklama za našu najjaču proizvodnu granu turizam!
Jo da mi se vratit u ona vrimena i oviman danas držat pištulu kako se stvara imidž dobri jubavnici i kako se reklamira naše najlipje more na svitu .
Živi i veseli bili pozdravja vas vaš morski čovik Šangarelo!