piše: Jadran Šantić Šangarelo
Jo judi moji ča je lipo u naše malo misto kad zapuva bura oli učini koji drugi neverin.
Eto bogami i ovi dan je udrilo iz neba i zemje od kiše pusti gromi i munja do strašne buretine. I sve je to bilo začinjeno raznin barufan i štorijama o ribarščini a bome i drugin zajebancijaman.
Kako naš centralni kafić KARAKA u kojemu se ispripovida više laži i izmišjotin vengo prin ispod kostele di su sidili sad sve pokojni zajebanti i fločuni.
Ti naš kafić jema ceradu okolo naokolo pa se svi za neverina skupimo u tu plastičnu ćibu i unda gre lajanje.
Jo gospe moja da je moguče sve uvatit i notat bilo bi više laži vengo u pokojnega Minhauzena. Tu su se pripovidale razne lovaške o ugoriman od 40 kili do komarči od 8 kili, pa o obotnicama koje su u vršan izile 35 cipli a u nji 4 je bilo 36 kili i da van sve ne notajen jerbo ne bi bilo mista za sve.
Sad ču malo prominit temu ma isto ču se brzo vratit ovemu ča san nota u uvodu.
Kako u naše malo misto cilo lito obitaje naš dragi profešur doktor o plastične kirurgije Neven Olivari koji inače žive u Njemačku svaku godinu on učini veliku feštu za Oluju i počasti borce i invalide iz Domovinskega rata.
Svaku godinu je bi mišani jelovnik o ribe brudetadi crni rižoti i liganj na gradele a da ne govorin i o pizdicam joli pedočiman na buzaru pa se ton ponudi i pridružidu i pečeni janjci joli kozlini.
Ovu godinu je ti naš vrsni likar učini feštu o sami pečeni kozlini i lipega sataraša koji bome po našu Dalmatinsku i gre uz pečeno i lešo a posebno uz janjce i kozline.
Lipo se u staremu portu digla bandira zasvirila je i Lipa naša himna a na posebnu kuku sa obisilo i prigodni vjenac sa porukaman na trakice.
Bogami lipo se blagovalo i govoriman se odala počast onima ča su dali život za lipu našu ma isto se pobunbila i lipa mira kako bilega tako i crnega, i da nebi puno dujija o ozbiljnin teman moran se vratit na Karaku.
U društvu je bi Vedran Stipić, moja malenkost, Vedranov rođak iz Brista Frane, naš dotur Olivari i još niki oko nas koji su slušali beside i dobacivali svoje upjuvke i batude.
Štorije su išle o tega kako je ništo veliko u letu na po dubine izilo više o pola velikega šnjura na udici ,pa kako su niki izgubili cile Panule jerbo jin je nika beštija prigrizla debele krene i odnila varalice, pa do upadice Olivarijeve kako njemu nikad ništa ni uteklo jerbo on sve solidno i lipo lovi na puntu o takujina. Od ti tema se prišlo i na spizu pa kako se kuva ovo i ono od brudeti do crnega rižota pa do salati o prilipak i volak.
Puno nji se slaže da se na salatu najboje učinu prilipci joli lupari a da nisu loši ni volci koji su ujedno i najboja ješka za lovit komarče jarbo su tvrdi a komarče volidu tvrđu ješku.
I dok se tako raspravjalo uleti Frane sa svojon upadicon i pitanjen a kako ulovit volke jerbo on nezna di i kako volci plivadu joli na dnu joli na po dubine. Svi smo se zacenili o smija i ka smo Frani objasnili kako volak gre sam po dnu bome ka i svaki puž, Frane se zableušija jerbo to ni zna a od svega je zna samo jist dobre bokune pa i te „plivajuće volke“.
Kako ja gren svako jutro na ribarščinu a Frane ka novi kapetan iz Brista gre svojin Garbinon (tako mu se zove lipi brod ča ga je kupija lani) na kafu u naše malo misto lipo se ujutro pozdravjamo mavajući jedan drugemu a bogami zna Frane nako sam u svomen kajiču i zapivat pa mu tako brže proleti vrime o Brista do Graca.
Poslin svi zajebancij na Franin račun niki su dali ideju da se trg Soline di je Frane ovjekovječija da volci plivadu obiluži sa kamenon pločon di čedu notat „Trg plivajući volak„.
Eto štioci dragi nadajmo se da neće niko u skoro vrime pronać neku morsku beštiju i umisto peraji pritakat jon noge pa umisto da pliva sada gre po dnu, joli če niko vidit jpoli ulovit sipu veliku ka obotnica i možda još koja beštija ka da je zalutala iz iz Vernovi romana a pposebno onega 20000 milja šoto mora.
Ma ako se to i dogodi a ja o temu dobijen avizu sve ču ja to uredno notat i vaman dat da lipo u miru proštijete u naše lipe foje „Otvoreno more“.
Živi i veseli bili! Pozdravja vas vaš morski čovik Šangarelo.