Dalmaciju ka regiju nima niko na bandiru
piše: Jadran Šantić Šangarelo
Evo judi moji i dragi štioci koji je to štrapac kad greš ništo radit a najradije bi se odmara kako fizički tako i psihički, ma jopet nemoreš jerbo ti đava ne da mira.
Sidin lipo u momen radnemu kantunu u pridsobje i štijen foje i to najpri Slobodnu Dalmaciju a poza tin i Jutarnji list. Puno puti san jidan priskoči štit Jutarnji jerbo san se totalno izneredija zbog pizdarij i muke koju san skupija u prsi štijući Slobodnu, ma ovi put san lipo vazedja bokun karte i da ne bi zaboravi od jida ča bi tija notat napravi san mojin švrakopison oni kako se reče šalabahter.
E i sad bi lipo tija počet ma odma me ništo tuče u možjane i ka da mi sinjaje samo mirno budi pun pacijence i notaj na kartu sve lipo i pametno jerbo kakva su vrimena došla svak te more tužit za pizdariju pa ti onda dokažiji da nisi nikoga vriđa.
Jutros bome ka i svako jutro otvaran Slobodnu kad u najavi na naslovnoj satranici oni mladi biskup Košić ča jema glavu za ligu naroda daje veliki intervju sa naslovon: OVA VLAST NIJE UZ NAROD JERBO PROVODI TUĐE INTERESE.
Meni odma udre krv u možjane pa se sitin da su nan uvik servirani joli vanjski joli unutarnji neprijateji i naš ti vrli biskup Košić udri po vlasti da nije narodna a meni unda ništa ni kjaro pa ko je tu vlast u našu državu izabra. Da nije čarobnjak Merlin od kraja Artura i vitezovi okruglega stola umiša prste jer bi samo on ka veliki čarobnjak to moga napravit.
Ajde da i ja ne laprdan svašta triban se okrenit notanju jerbo kad nisan doli na more u Dalmaciju i nima štorij iz malega mista moran notat štorije iz velega mista bome.
I da krenen …naš ti vrli biskup Košić koji slovi ka vođa desne frakcije u crkve o Hrvata udri kukon i motikon kontra našega dičnega Don Ivana Grubišića koji se zamislite drznija otvoreno baviti pulitikon pa su ga biskupi odma šuperali iz crkvene hijerarhije ka velikoga dušmanina dok isti naš vrli biskup Košić drži velike pulitičke tribine i to zagovarajući „ tradiciju“ pod velon rigidne desne orjentacije i gle vraga niko ga ne stavja na stup srama i ne izbacije ga iz crkvenoga reda zato ča on javno prinosi ono ča ostali biskupi misle.
I sad pitanje Don Ivan je ostavi životnega traga ka svečenik u kojon god je župi ordinira i živi je skromnin životon dok naš biskup Košić i ostale hrvatske crkvene velmože uživaju blagodati Tuđmanova sporazuma sa Sveton stolicon koji je na grbači hrvatskoga puka i poreza koji uz vjernike plačaju svi i ateisti i agnostici ma i oni ča viruju u druge boge i svece, a taki ugovor nima ni jedna država na cilomen svitu. Pa za zar to ne kazije da su Hrvati veći katolici od samega Pape?
Ovod se postavja pitanje zar nije degutantno da ne rečen sramotno da dok narod nima ča jist crkveni pastiri živedu puni luši a bome i voze skupe aute ma raji ne vračaju ništa osin poticanja na netrpeljivost da ne rečen ča teže i poticanja na istupe kontra legalno izabrane vlasti.
Naš biskup se javno zalaže za svaki vid bojkota HRT-a kojega svi plačamo a ne kaže da bi tribalo barenko revidirat ugovore sa Vatikanon kojega isto svi plačamo da bi povlaštena manjina uživala i širila svoji rič a ne božiju svomen narodu.
No da stvar bude i gora uz crkveni blagoslov inicijativa u ime obitelji nan glatko iz proračuna ukrede 50 miljuni kunica a naš vrli biskup traži ostavku cile nenarodne državne vlasti ,pa judi moji to nima nigdi osin ovod u nas u „ Hrvatistanu“
U jednemu dilu intervjua biskup apelira na etičnost koje nima kod vlasti a ja bi mu poručija da se zamisli nad svojon etičnošču koja je dala blagoslov onoj šačici militanata u crne jakete da se u Vukovaru ponizi cili državni vrj zajedno sa diplomatskin koron.
Ako je po biskupu vlada ponizila branitelje u ča sumnjan ni mi jasno ko je ponizija Mladega Jastreba, Freda Matića, Antu Kotromanovića i druge dokazane domoljube i branitelje u vukovaru koji su bili u koloni kojoj je zapriječen prolaz perfidnim manipulacijama koordiniranim sa voki tokijima.
I tako dak čitan ove veleumne izjave prisvitlega biskupa Košiča udrila me lampa u možjane i jedva san dočeka okrenit list od foji na druge teme. Ugledan lipotu o napisa novinara Vukovića iz sela Krstatica iz Imotske krajine i odma san se siti moga pokojnega prijateja barba Ante Gudelja zvanega Žorž koji je bi jedan o veči intelektualaca iz Krstatica.
Poznat i priznat di je ko bija. Jo ča je ovo lipi intervju, baš ono po narodnu pun humora i vlaške funcutarije iz naše prilipe Dalmatinske zagore.
Bogami je naš novinar naša osebujnega čovika za glavnega protagonista Ljubu Ivanovića zvanega Roša poznatega bikara i velikega meštra o klanja ,oču reč o kolinja koji je lipin vlaškin besidan sve lipo spjega ča čini i kako.
Ispalo je da se njemu jebe ča EU propisije jerbo se izjasni sa stručnin komentaron da oni ča su propise učinili nikad nisu vidili a troke klali prasca, ča lako more bit i istina jerbo i u nas zakone o moru činidu zadrti prašinari koji o moru i rbanju nimaju nikakve veze.
Gren naprid sa čitanjen i odma me u oči udrija napis Mladena Krnića „ Dalmaciju ka regiju nima niko na bandiru“
Je u pravu je Krnić ma ja mislin da je sminit sve županijske vladare u Dalmaciju koji su liston iz stranke ZNA SE da bi se stanje prominilo i da bi ona naša lipa tri žuta leoparda na plavoj pozadini našega mora i neba vijorila na bandiran ponosne regije Dalmacije.
Pa judi moji zar ni poznata povjesna činjenica da je Dalmacija najstarija pokrajina u Hrvata i da se bome zato ona tri leoparda kočopere na vrju Hrvatskega grba.
Lako je meni notavat a ni lako ostat bez pinez koje daje krava muzara RH za pusta rukovodeča politička i činovnička radna mista u županijan i ka kulmin svega lako je ništa ne radit a bit ka Lički medvid zaštičen i još za ti nerad uredno primat plaču.
Moran van reč da je u nas u Split davno puštena u svit izreka „BRAVURA JE ŽIVIT BEZ LAVURA“
Ovod san se na ovi tekst malo smiri i gren daje kad na slidečoj stranici …moja draga Anita Belak Krile udrila sa talambasima kritike po bidnemu šjor Karamarku. Pa za gospu blaženu zar mu ni dosta sramote koju je skupija skačući sebi u justa zbog potpisivanja pristanka na referendum o čirilici i povlačenja potpisa pod pritiskon svoji mentori iz EU vengo ga triba razapet.
Z ar se ne vidi kolko je vjerodostojan ka čovik i pulitičar posebno kad je njegova rič u pitanju.
Odlista san foje do zadje stranice i moga san van još čakod spjegat gledano iz moga kantuna ma i ovo je dosta. Približiju se lipi blagdani a nikiman je sveti Mikula več doni daroive ma ja van od srca želin puno sriče i zdravja pa vas uz moje žeje i pozdravjan .
Vaš morski čovik Šangarelo.