ŠTORIJA O SNIGU

Jadran Šantić Šangarelo
Gledan kroz caklo o balkonski vrata i priko puta puca pogled na Neretvansko-Pelješki kanal i idilično misto Trpanj. Na sridnjemu dilu Pelješca je misto na brdu di se vežiju ka magneton oblaci i mi to zovemo kapa, pa dok je god kapa vezana za Pelješac nima lipega ni stabilnega vrimena.

Evo ova zanja dva dana je bilo i lipega sunca samo puše ludo jugo pa te skroz izblesira a posebno one koji su meteopati ka ča san ja. Kako san cili smantan a svi me ožiljci bolidu kako stari tako i ovi najnoviji ne mogu bome ni pošteno mislit.

Ma isto vrag ne da mira i padnu ti kojekakve pizdarije napamet koje za boga miloga triba notat da se ne bi zaudobilo ča oče reć zaboravilo. Dok san još bi gori u metropolu dobi san od moga glavnega izvora informacij o zajebima Mačka jako zanimjivu štoriju o njegovomen netjaku Juri Šutiću zvanemu RAMBO.

Ti RAMBO je jedan tvrdokorni funcut, a moglo bi se reć i da je ka plesač po žici jerbo je često sa svojin postupciman na granici dozvoljenog i nedozvoljenog …ma o tomen drugi put.

Kako mu je prid par godišč umrla žena, a bila je dobra ka kruv i ostavila je RAMBA sa tri ćere koje mu je čuvala mater Ernita tribalo je ništo prominit. Kako je i mater u godine, RAMBO je mora pod hitno dovest novu ženu da bi mater a bome i samoga sebe rasteretija.

I tako ti naš junak lipo ka stari galeb ulovi jednu strankinju iz Slovačke koju je priveja doma na provu.  Zašto na provu? Zato da bi se vidilo oče li bit kuntenta sa cilon famejoj a posebno sa dicon i ča je najvažnije kako će se obiknit živit priko zime, jerbo lako je liti ma kad u Dalmaciju zapušedu buretine i gnjila juga triba to priživit.

Još jedna vrlo važna stvar je kako će se ona divertit sa Rambon i očedu li pasat jedno drugemu u onin stvariman ća se činidu u posteju, a bome svi znadete da su jesenske i zimske noći duge pa i to triba izdržat.

Sve je lipo krenilo i ka da su svi bili kuntenti ma triba i njoj ugodit a jedna od ti ugoda je i vižita njeziniman u Slovačku. Ovu zimu je naš junak RAMBO odluči partit na put u Slovačku do njezini da bi je zadovojija. Kako jema dobrega đipa …Mercedesa a nima zimske gume ka ni jedan Dalmatinac bogami se on okurađa i partija u Evropu.

Svrati je lipo do tetka Mačka u Zagreb pa onda u Slovačku i tamo je učini jednu šetemanu i kad je misli da je lišo proša udrija snig a on jema đipa ma nezna kako ukjučit sva 4 kola u pogon da bi se sritno vrati doma i tu je nastala barufa. Sitija se on da njegov bađo Lenko u naše malo misto jema đipa ka i on i naš ti RAMBO udri po mobitelu da bi dobi instrukcije iz prve ruke, jerbo se triba vratit doma u Dalmaciju.

Sriča da je Lenko jema debele živce i dok je objasnija svu tehniku vožnje đipa sa pogonon na četri kola skoro je afana. Naš je RAMBO sa svojon dragon sritno i zdravo ariva doma ma ja bi puka ka čvrčak da nisan objavija ovu njegovu sramotu , jerbo kupit đipa i držat ga u dvoru divit mu se i guštat kako drugiman zubi činidu vodu pri pogledu na Merđu, a neznat s njin upravjat nije baš za pofalit se.

Naš RAMBO slovi ka čejade koje se u svašta razumi …ma bogami je na snigu pa na ispitu a ovo je za naše malo misto ka najboja delicija za zajebanciju, jerbo je dosad RAMBO bi uvik oni koji je zajebava druge.

I ovi se put potvrdilo da je dobra ona izreka sve se vrača sve se plača pa i u zajebiman.

Eto štioci dragi ovi put samo kratka štorija živi i veseli bili …pozdravja vas vaš morski čovik Šangarelo.

0 0 votes
Article Rating

Related Post

Subscribe
Notify of
guest
0 Comments
Inline Feedbacks
View all comments