Nužda zakona ne zna
autorica: Jadranka Mardešić Komac
–Ajdete dico doli do kuće Arne Maškovića, pa laton pokupite ono gnjoja ča su ga tovari učinili, pognjojit ćemo smokve. Bit će pinez…ajde mala, vazmi vriću, brzo će bot i po!
Svakega dana su tovari odili s veloga Pazara doma u Žrnovnicu. Ni′ nan bilo lako, jerbo smo jemali samo šest godin a već smo jemali nikega rišpeta prama sebi, jerbo nas je bilo sram. Tribalo je brzo pokupi′ to malo gnjoja, da nas Žrnovke, gospodarice o′ tovari ne vididu.
One bi kunjale na umornin tovarima koji su po vrilon zvizdanu pomalo tapkali. Parilo je, ka da stojidu na mistu, a kuće iza nji′ gredu. Pritisnuti vlažnin tilima uznojenih žen′, o′ muke bi napravili potribu tako da bi in za′nje noge bile ištrapane, pa bi stalno mavali repon, tirajući mušice.
U svemu tome vela je bila srića ča bi se šporkica brzo osušila na vrilon suncu. Ja i moj rođak bi se sakrili iza zida u poje Ante Treursića Butrice, joli u Ćulića poje priko puta crjene kuće Maškovića i čekali.
Budno bi pazili razrogačeni′ jočiju ko će prvi ugledat tovara koji se šporkaje, jerbo je temu i pripadala njegova šporkica. Ma radi tega smo se znali i pokarat, a kako i ne bi, jerbo ko bi pri ′ napuni′ vrićicu pri′ bi doša doma na obid. Kad bi se vratili uvik nas je dida isto pita:
-Aaaa, je li van pala kruna s glave?
A ja bi zagrintala:
-A je, svi su nas gledali…
-Pa ča, da su vas gledali, i maška je kraja gledala pa ga se ni bojala, jerbo potriba zakona nima.