piše: Josip Šantić Šangarelo
Evo bome okad san doša na more a partija je misec i po stalno mislin čako notat. Kako se dogodi koja barufa a ja priskočin ti dan sutra san zaudobija i nisan stiga ništa notat.
Čitan i poruke moga prijateja Emila i Sonje da jin pošajen kartulinu sa mora pa da judi jemadu barenko ništo za proštit a ako je ča i smišno moredu se i nasmijat.
U naše malo misto jema bome svakakvi baruf a najviše oni ča su vezane za ribarščinu i more i oni ča su vezane za masline. Kako ni lako uvik izvuč pravu štoriju jerbo uvik falidu niki datalji ostaje meni staremu kenjcu da ja te buže popunin.
A kako i sa čin?
Evo počet ču sa jednon staron barufon koju su mulci učinili jednemu naše miščaninu. Ti naš čovik jema ženu iz Kaštili jušto iz Kambelovca a njezina mater je iz Lušića. Zašto je to važno bilo naglasit znat če te brzo.
Kako svi znate nadan da trišnje sazoru od početka šestoga miseca pa traju nike i do kraja naš ti čovik u to vrime priseli u Kaštila jerbo mu punica a i žena ča je dobila od pokojnega Pape jema puno trišanj i ako se to u par dan ne obere pada cina a i propadaju. Kako su funcuti svugdi isti tako je i u Kaštila ma tamo su gospe mi najžešči.
Stari kaštelani su znali u moje vrime mladosti dok san živi u Sućurac napunit lovačke puške sa krupnon soli pucat u lupeže. Jo judi koje su to muke a rane nikako da zarestu. Tako je i ovi naš malomiščanin vazeja svoju bokericu jerbo je lovac i sa njon je ti pucat u ariju nebi li pripa lupeže. Ni njemu krivo da se izi kil dva pet vengo neda da se bere na veliko i sutra na Pazar da se prodaju jegove trišnje.
Jednu večer se skupilo pet šest farabuti i uputili se u njegove trišnje jerbo su bile največe i najslaje. Svaki o nji je nabavi jeftine male lampadine i kad su došli meju trišnje oko desetak uri navečer vidu oni u mraku našega junaka kako lipo sidi ispo trišnje puška meju noge i lipo čića španjulet. Razvukla se mularija oko njega na pet šest metri i ka na komandu svaki upali svoje lampadine i to blizu obe da pari ka da svitlidu neke oči. Niki su jemali bilo svitlo neki crveno i bome ni to bilo lipo vidit. Svitlidu iz mraka oči niki beštij a nima glasa.
Naš je junak najpri sta ka inkantan jerbo se bi pripa na smrt. Kad je doša sebi posli par minuti opali je iz puške u ariju ma svitla ni makac. Opali je on i drugu patronu i kad je posta svjestan da je bez municije u cijevi od straja ni se moga maknit. Svitlidu mularija oko njega a on se samo vrti u mistu. Poslin par minuti nika se svitla počela micat i penjat se na stabla a nika su se počela vrtit oko njega a on jadan se o straja usra u gače i počeja bižat doma priko poja. Mulci su se najili trišanj a bome su po komodu ubrali i po plastičnu vrečicu za doma.
Dok je sutra naš junak priča kako su ga napali svemirci dok je bidan čuva trišnje o lupeži i da je puca u nji ma njiman ništa ni bilo puno nji je znalo ča se dogodilo jerbo su naša mala mista puna „radio Mileva“ pa se sve bome brzo dozna. Dozna san da je ženi zapriti največin škandalon ako samo izusti još koji put da gredu u Kaštila čuvat i brat trišnje. Neka jon mater i dva brata odradu svoje a on će platit dvi dnevnice da niko drugi bere misto njega.
Poslin nikoga vrimena mularija je naresla i partila svak svojin puten u život ma jednega je put nanija u naše malo misto i u istoimenu gostionu i kad se malo pošpruca ispriča je ovu barufu. Naš miščanin je skoro dobi afan kad je sazna da je sve bila zajebancija. Ni se puno najuti jerbo je pasalo dosta vrimena ali je ka pravi „Đek „ plati temu momku piče jer kako je reka i njega je niko uspi zajebat a on je misli da to samo on more.
Evo počela je ona ča reču največa konfužjinada o baluna i to druge najvažnije stvari na svitu i to svitsko prvenstvo. Kako se to dogaja svake 4 godine ni to mala stvar. Svi poludu i odaju ka zombiji skroz inberlani ,sa balunon se diži i sa balunon gredu spat.
U naše malo misto su bile parvu večer za otvaranje i utakmicu izmeju nas i oni Brazilac organizirane bakanalije . Na rivu isprid kafiča Karaka i drugi treštila je mužika vonjale su delicije sa gradel palile su se bengalke drukalo se sve u šesnest žderalo i lokalo. Kako nemoredu svi isto drukat niki su vrlo brzo izgubili dobar glas ka stare kurbe a svi su pustili sve moguče beštimje u ariju kad nas je elferon kaznija oni lupež Japanež. Ja san ka veliki jubitej borilački vještin a i sam san niki majstor mislija da svi pošteno u Japan živedu po kodeksu Bušido ma je šipak i tamo jema lupeži sudac ka i u nas. Mi smo naše nike strpali u bajbokanu a oče li ko ovega kaznit nisan sigur. Kako uvik jema pojedinac koje ne zanima balun vengo ostali sadržaji a posebno vino i spiza ma i drugi bibiti od alkohola jebe se nji ko je tuka a ko izgubija.
Tako je jedan naš čudan lik koji samo gre po našemu malemu mistu i njuši di se ča kuva tu večer kad nas je tuka oni ružni Japanež doša na svoje i bome mukte jija i pija dok se ni dobro pošpruca i u malešne ure partija doma na počinak poza tako teškega rada. Sutra dan di si se god zateka svak priča i komentira našu tragediju i žalost a njemu nije baš sve kjaro. Tija bi i on znat o čemu govoridu i uz to svi suju pa se litreta uz jednu mašu koja je bila najžešča u raspravi.
Pitaju ga oni a di si ti bi sinoć a on ka iz topa a bome na rivu di se ilo i pilo. Pa jesi li vidi kako su naši fuzbaleri igrali i kako nan je kurbin sin Japaneški sudac kurbanjski ukreja utakmicu. Sta on ozbiljno i zamislija se gleda u nji i kako mu ništa ni kjaro udrija je kontru. Koga vi zajebajete ovod an? Ni na rivu niko igra na veliki balun jerbo je riva uska pa se nemore igrat balun i ni bilo nikakve krađe o baluna samo bome dobra spiza i vino. Ja san se bome tome oda do kraja i ajte kvragu svi pa najdite koga drugega zajebavat o utakmican balunu i suciman Japanežiman. Ma judi moji da ste rekli da je sudac bi Englez joli Nijemac i Taljanež možda bi i upa u vašu barufu a oni Japanež odnija vrag vas i Japaneže.
Eto i ovako se u naše malo misto pratidu zorno utakmice ma niko o baluna a niko o spize.
Nadan se da su van ove dvi kratke štorije za sada basta.
Živi i veseli bili štioci moji pozdravja vas vaš Morski čovik Šangarelo.