ŠTORIJE IZ MALOG MISTA
piše: Jadran Šantić Šangarelo
Ma evo bome kako smo ulizli u ove fešte o blagdani, nisan sigur da čedu niki poslin sveta tri kraja moč zapucat na istu bužu kaiš o gača, a mislin i da čedu in i koleti o bili košuj u kojiman gredu u crikvu, oko vrata bit tisni i da in nečedu kolarine lipo stat oko vrata .
Jo judi moji koji je ovo patimenat …koja je ovo pokora koja je ovo muka …ma isto jon niko ne more odolit.
Dunkve na našin prostoriman di je bakalar vlada stolječiman, a posebno u Dalmaciju …sad je ti nesriknji, a jopte dražestan vonj zavlada i gori u Zagreb. Je štioci moji je …živa je istina i tu pomamu za bakalaron nemore se protumačit vengo da se Dalmacija priselila u Zagreb, a napose Split …i da je sada Zagreb glavni grad Dalmacije.
Virujte mi …kleten se u boga da je tako. Kako svi nismo iste dubine žepa oliti iste debjine takujina …tako se ovod u Zagreb di ja živen priko zime moglo kupit svašta. Svi paštroći o bakalara, a bome bilo je i onega najbojega ča mu na tiketi lipo piše …I klasa GADUS MORHUA.
Jo kojega imena da se čovik zlamenuje i pripadne, a jopet mu ništa ni jasno, ma je bogami to oni lipi bakalar ča smo ga prin u doba mraka mogli kupit i to ritki samo u Trieste. Zamotan je lipo i debelu plastiku da mu čuva vonje i lipotu …pa kad za lipo potoča dva tri dana bome nareste za tri puta, pa san se i ja ovi put zajeba.
Ja i žena kupili smo priko jedne prijatejice u Trieste jedan o kila i unda je naresta u točanju na tri kila. Ma neka je …lipo smo sve to sparičali na bjanko oliti na bilo, na brudet, učinili smo paštetu, polpete i pekli u palačinke i sa svin tin pogostili dicu rodbinu i prijateje a jemamo ji bogami obilato.
Žena mi je porjeklon Dalmatinka, a rojena je bome u Zagreb u sri Martićeve ulice i moran van reč da je oka je samenon …postala kuvarica o rišpeta naši lipi dalmatinski delicij da bi jon begenala i moja pokojna mater, a bome i nona kad bi mogle provat ča ona kužina.
Osin te muke Isusove oko blagovanja bakalara …bilo je tu i lipe pečene domaće zagorske tuke …oliti kako ovod reču …purice sa domaćin mlinciman, a to van je ništa drugo vengo domača tanka i po metra za po metra manistra.
Osin tega san dobi o jednega prijateja iz Zagreba 5 kili lipi pizdic koje je doni iz Pule …tako da san ja po moju učini lipu buzaru, a veći dil san napravija Neretvanski brudet i polija lipu crnu manistru o sipe.
I sad ono glavno …sva ta lipa spiza zove i lipe bibite …pa smo mi strunili lipu količinu i bilega a bome i crnega flaširanega vina, a do o kolačiman i ne govorin. Kolači su me dotukli do te mire da san se napuva ka čvrčak prin nego pukne.
I u cilemu tomen konfužjunu zove me moj prijatej Đoko …o moje žene rođak i čestita mi Božić …pa usput …an ča kuvaš, a ja mu lipo ispripovidin o pizdican, a on meni …a evo ja san najpri stavi lipu tuku peč ma kako mi je došla čer i zet iz Subotice mora san prominit pa sada pećen ćurku ma zamisli ti furbarije od tega muzuvira ka da to ni isto.
Moran se ošervat na sve ovo ča san van lipo ispripovidi i napravi ka niku inventuru naši životi i odma moran reč da se naš lipi i šesni Zagreb lipo priobratija na našu dalmatinsku kužinu …ma jako san u velikoj sumnji da čemo doli u Dalmaciju ikad prić na sir i vrhnje, a da o štrukliman i ne govorin …a ča se tiče variva o poriluka i juve o bundeve …bogami če to ispast čudo ako doli zaživi.
Ma šoma dela šoma svaki dil Lipe Naše jema svoje delicije i lipote i to je naše največe bogatsto, a mislin da bi bilo jako lipo da svi jemamo pinez koliko nan triba i da bi onda mogli jemat više fešti o Božića i lipo blagovat.
Do sljedeće prilike stojte mi zdravi i veseli štioci moji i mislimo i na one ča nimadu …pa ako jemate kojega susida takvega …počastite ga učinite dobro dilo a posebno prema dici.
Pozdravja vas vaš morski čovik Šangarelo