Opet o mome prijateju Žoržu
Piše: Jadran Šantić Šangarelo
Puno puti se sitin moga pokojnega prijateja Žorža oliti barba Ante Gudelja. Koji je to bija osebujni čovik mislin da to niko ne bi virova osin oni koji su jemali sriču upoznat ga u dubinu duše a ja san jedan od ti sritnikov.
Moran van spjegat barenko dil njegova životnega puta da bi dobili barenko mali uvid ko je bi i kakav. Ka mlad momak je doša na službu ka policjot u dolinu Neretve točnije u najlipji mali gradić u Dalmaciju Opuzen.
Kako je uvik bi gladan znanja i saznanja bilo ga je svugdi od srca mista do svi močvarni puteva i švercerski staza. U temu poslu ka i u svakemu poslin je bi jako uspješan. Dunkve u temu malemu gradiču je steka lipi prijateji ma gospemi i puno dušmani jerbo je bi pošteni policjot i ka taki se mora judiman zamirat jerbo su judi zviria posebno oni ča živedu na granici zakona.
Ma u temu lipemu Opuzenu je živila i jedna lipa vridna i pametna cura i tote je na prvi pogled pukla velika jubav koja je trajala sve dok moj žorž ni partija bogu na istinu.
Ta lipa cura se zvala Zdravka i rodila je momen prijateju dvoje dice koja su bili blizanci Goranku i Gorana, a u Neretvu se reče da se obliznila.
Kako je poza rata moj Žorž završi velike skule posta je i veliki policjot u Zagreb i onu državu. Kontrolira je ka viši inspektor granice i bi je idejni tvorac i prvi ravnatelj policijske akademije u Zagreb. Dica su resla i završila fakultete ma moj Žorž zajubjen u Neretvu i Opuzen ni moga bez te lipote i u Opuzen je kupi jednu staru kamenu kuču lipo je renovira i svako lito je dolazi doli na godišnji odmor.
Sad bi se niki pitali a ča je čini za gospu doli? Eeee jema je on jednu zanimaciju koja je za njega fetivega Imockega vlaja bila za domaći svit čudo.
Ma kakvo čudo moj ti je Žorž posta vrstan ribar kako na riku tako i na more i svaki minut slobodnega vrimena ča mu ga je Zdravka dala koristi je za ribarščinu. Zarazija se lovon na ciple u riki lovon na peškeje cinke i male somiće u jendekiman, a na more je lovi sve ča se na udicu priko ščapa moglo ulovit na ušču Neretve.
Odsve če je lovi najdraže mu je bilo vadit Bukve uz vječnu opasku …Jadro vidi lijepije bukava.
Kako san ja od mladosti bi prijatej sa čeron mu i sa sinon pogotovu, počeli smo se intenzivnije družit poslin ovega rata. Kako je bi jako načitan sa njin mi je uvik bi festival razgovora kad bismo se uvatili od književni do ini tema. Posebno je volija Andriju Kačića Miošića i njegov „Razgovor ugodni naroda slovinskoga“.
Ja ka neki tekstopisac bi napravi pisanu štoriju zamišljeni razgovori između starca Milovana i prijateja mu Radovana, to ga je uvik oduševljavalo i moran van reč da mi to a i on strašno fali.
Puno me puti uvati tuga kad se sitin kakvi smo odnos nas dva jemali puno puti pustin suzu ma isto ga to ne more vratit a voli bi da se barenko malo vrati oli mi se u snu javi. Sada dok ovo pišen moga bi mu napisat dva tri stiha ka starcu Milovanu.
E moj starče Milovane de se siti na one zemane
Kad smo lipo travaricu pili i o svemu mudro divanili.
Sidili smo na mojoj teraci i bižali o sunca pripeci
A znali smo i tvoj dvor pohodit stihovima o svemu prozborit
Birali smo mi o čemu zborit i pametno s drugiman govorit
Ma uvik si škiva temu jednu pulitiku nisi vidija pravednu
Znali smo mi pametno besjedit marendavat pa i biru popit
Rano si mi napustija dvore i zato me stalno crne misli more
Ritko svratin u Opuzen liti jer se neman kome veseliti
Volija bi bar još jednon sisti i sa tebon lip brudet izisti
Pita bi te kako ti je gori jel ti fale naši razgovori
Meni fali da ti stihom pišem dok ti kuvaš ja brudet mirišem
Eto starče Milovane ti se siti na ove zemane
Nemoj tražit razgovoru mane i pomisli gori diko name
Doli se je svašta dogodilo nebi ni u jednu knjigu stalo
Drugon ču ti zgodon sve to reči da se moreš pulitikon opeči.
Nadan se da ovo nije zadnja štorija o momen prijateju Žoržu jerbo o njemu jema još puno za reč.
Štioci moji zdravi i veseli bili pozdravja vas vaš morski čovik Šangarelo