piše: Jadran Šantić Šangarelo
Evo moran odma počet sa nikon grinton i to me baš ne sladi jerbo bi voli notavat na kartu čako lipo jušto po miri sritni judi a ne nesriknajci ka ča smo mi ovod u Ervasku.
Ka prvo moran reč da me ni nikako drago ča se ova nazovi gospoda i gospoja prin ikakve utrke za prisidnika Ervatistana tučedu teškin besidan, uvridaman i tvrdnjaman bez osnova kontra drugi, a jopet mi se čini da je šjor Ive Josipović jedini zadrža onu jusku i gosposku notu smirenosti i uvažavanja drugi.
More bit da mu diko izleti nika barufa u smislu odgovora puna funcutarije ma bezopasne i neuvridjive dok oni šjor žestoki vlaj iz Ivan Begovine koji je zadrža oni tvrdi vlaški dijalekt ne bira ni teme a ni uvride nego tuče kalunima po sadašnjen prisidniku. Bogami neznan kako če ovo do kraja završit.
Ma bija bi tovar o čovika kad ne bi naglasi da me u duši drago ča sva tri muška kandidata zagovaraju lipu našu na 5-8 regij jer bi se tada ka lavina o sniga strmoglavija broj oni koji čičadu sisu manjamukte o države a ne radidu ništa jerbo su ionako stranački uhljebi kako se to lipo reče u nas da se ne bi ni nji uvridilo jerbo te mogu tužit za uvride i duševne boli pa se ti unda vadi.
Ma judi moji jeste li vidili kako se pomoču trikov Jamerika brzinon munje priselila u otel Westin i lipoj našoj šjora gospoji priženci stranke Zna Se osigurala potporu pusti stonin ijad ako ne i miljun kun od naši pošteni, vrli, vridni bogatuni.
Ma isto je šjora Jelena lovrić našla da bome svi jemadu lipega masla na glavan i da se ne moredu ukrcat njanka ni blizu u zanji vagon o ferate di se vozidu pošteni Ervati. A čačemo sad a. Lipo je šjor diplomant Vaso naredija da na tu skupu večeru dojdu samo pravi i pošteni članovi, i kad sad sve zbrojite ispada da je ovod niko lud i da poštenje kod svakoga jema drugo značenje.
Ma judi moji ovod jebe lud zbunjenoga pa ča ispade.
Evo jučer se vračan tonobilon doma sa fizikalne terapije kad tamo promet skroz krola nemore se ni naprid ni nase. Ja se odma snerva i neznan jeli ko koga satra auton i koliko ji je izgubilo život, joli je ko učini velike demonštracjune i kad san se posli dobri tri kvarta o ure proveza jušto 5 i po kilometri jedna mi pristravjena gospoja iz susidstva sva u straju kažije je moj gospon prošli sa kažu braniteji svi u crne monture sa velikin križon na prsiman a zada sa još večin upitnikon i lipo su ingropali promet od savske di stoluju več skoro dva miseca pa sve do ispo konja našega dičnega povjesnoga Bana Jelačića. Jopet se tražila pravica ka u doba Matije Gupca jopet se prozivala demokratski izabrana vlast i njiovi prvaci i jopet ma jako odvažno se pripritilo da če oni, braniteji kad dođu na Markov trg otamo potirat one ča vladaju kojiman nisu zadovojni.
Niki su procjenili da je bilo barenko 3000 do 4000 svita i sad meni ništo ni kjaro, ako nisu kako kažu od nikoga izmanipulirani i ako ji niko ne daje potporu od spize do pića i drva za ložit ognjei svega ostalega ko je izfinancira te puste monture ( koje prosti bože budu uspomene na jednega strašnega zvjerskega i krvavega vrimena i oni spodoba koji su nosile crne maonture ) i njiovu štampu u bilemu koluru na crnin majan a za to je bome tribalo dat barenko blizu miljun kun. Ja gospemi neznan ko danas jema toliko pinez možda jedino jema istine u temu ča judi na ulican šapju šakreto da stranka Zna se jema u temu umišane prste. Neznan ča bi mislija možda je ti narod sa ulice i u pravu ko zna.
Ma jopet da sve nije tako crno potrudi se jedan lipuškasti mladi pametni svečenik dotur znanosti sa Bogoslovije iz Splita koji je svomen kolegi poznatemu spletkarošu duga jazika jubiteja samo desne strane i anarhije posla otvoreno pismo. Ti mladi svečenik se zove Don Marijo Volarević i ča san iščita u fojiman ( koje ne kupujen vengo bacin oko u nji kad diko dospiju na stol o kafića ) a zovedu se Večernji list lipo je bome opra Miklenića i ka pravi istinski pastir o iskona zaštiti dignitet svoga puka koji je demonstrira u Splitu kontra onega saveza o fuzbališti kojega vode lopine a ne pravi judi koji volidu više šport o vlastitega takujina.
Ma bravo mladiću i naslov je odličan jerbo je napisa Dile nas Nepravda i Lopov, a ne Orjuna jerbo je orjuna davno partila nebu pod oblake tako da danas nima njanka nijednega blesonje koji je sljedbenik.
Krepa bi da se još malo ne taknen kurbe pulitike i loši i popkvareni pulitičari. Dunkve Oni moj ministar iz Splita ča uvik puno govori a ne reče njanka ništa Grčić i daje prodaje maglu misleči da če je judi popit pa barenko bila mukte, je boga jokina svit je posta oprezan i njemu ne viruje ništa.
Unda oni mali bračanin ča jema bezime Bauk ča san virova u njega jerbo su bračani škrtuni i vridni i pošteni judi kaže da se neče naša jadna država podilit na regije ( iako bi to spasilo proračun ) ni za ove a ni za mandata nike druge vlasti pa jeli on popizi cili svit bi to u lipu našu tija a on kaže da nemore. Ajde lipo kvrago on i cilo mu ninistarsvo.
Kako san naprid nota da se Jamerika priselila tako je oni naš sudac Turudić sa debelon cigaron ča je dugo bila zabranjena u Jamerike diga dreku na policjotei bacija se drvjen i kamenjen na nji jerbo su navodno uznemirili tri suca koje su došli provjerit di stojidu a kako so ovi možda u hibernacijika lički medvidi ni to tribalo doma vengo ji je tribalo uznemirt na posal di lavuraju.
I na kraju ništo me palo na pamet. Lipo je štit u foje koliko se novi restorani u metropoli otvorilo u zanje vrime i svi nudidu interesantnu spizu koja ni ni skupa u normalna vrimena ma kako je u nas jad bjeda i besparica neznan koliko čedu izdurat da ne propadu a možda ja i naznan koliko narod jema pinez jer kako kažu statistike i izjave našega premijera unatoč recesji živemo boje i zadovojniji smo o po evrope.
Živi i veseli bili štioci dragi, pozdravja vas vaš morski čovik Šangarelo koji je posta stari grinteša.