ŠTORIJE IZ MALOG MISTA
piše: Jadran Šantić Šangarelo
Evo me u Zagreb, sidin u kabinetu za svojin stolon i gledan kroz ponistru kako snig sitno prši. Uvatilo me za pisat a bogami jeman materijala od moji prijateji iz Graca tako da mi je največa muka izabrat najboje barufe i stavit ji na kartu.
Jutros me javilo da u Gradac pada snig ka lud cilo jutro pa di je tu poštenje na more snig misto sunca i bura a u Zagreb jedva da ga se vidi kako pada.
Eto koja je ovo luda klima sve če nas vrag odnit, propašće nam na more sve pa če onda kumpravende po zlato prodavat sve na Pazar.
Jo judi ko ovo more razumit. Ma da ne dujin doli u Gradac moja ekipa žive jednin napornin i teškin životon tako da se nezna jeli to dobro oli nije. Eto svaki dan jeman friške novitadi ma sve se svodi na zajebanciju i na novosti ća se skuvalo izilo i popilo a napose di su se te bakanalije pravile.
Ka poznate i priznate destinacije to su Bačina, Mljačići, Osvitova kuća i Šimina konoba. Čujen da su temu teškomen poslu najviše angažirani Osvit Radić poznati ugostitej i vlasnik kultne gostione „Naše malo misto“, Mali Lazo, poznati Grački Sarajlija a more i Sarajevski Gračanin, Šime Rosin poznati vaterpolista, aktivni penšjunat i veliki poljoprivrednik koji jema najboju raštiku na svitu, i naš svepoznati maslinar, vlasnik uljare i dugogodišnji turistički djelatnik Danilo Radelić, a zna se uz nji još ekipe ukrcat.
Na drugu bandu tu je i Jakov Šimin zvani Jale i njegova mlaja ekipa koja se more skroz mirit sa onima prije spomenutima kako u spizi ma mislin da su i jači u piću. Zima je svugdi bome zajebana a najviše u nas u Dalmaciji ma ovi moji doli ne dajedu da ji zima sputaje vengo od onega litnjega elana nastavjaju čopat forcu zimi i frajaju sve u šesnaest.
Ja mislin da se je ove zime doli skuvalo i izilo do sada da bi se moglo priranit jedno omanje selo a da o vinu i ne govorin. Jo da ga je bilo prodat a ne popit lipi bi se pinezi bili skupili a mislin da se moglo napunit bačve če ji je vozija oni trabakul od Dalmacija vina, koliko su ti moji trudbenici popili.
Ima jedna velika novost i to o jednome vijađu ća ga je Đorđi Viskić zvani Đoko učinija do Zagreba. Dunkve ti veliki i poznati ribar nebi izaša iz Graca daje Ploča di lavura u Lučku kapetaniju, da ga stavjadu na muke …i tribalo ga je nagovarat puste godine da odvijađa za metropolu di su mu čere na skulan.
Lipo se smistija sa ženon u Vedrana Mirka Fifija njegova najbojega prijateja koji žive u Zagreb priko zime a priko lita je u Gradac jerbo je i on fetivi gračanin. E kad san dozna da je doša a on se ni javija lipo san ji vazeja pod svoje i kako san jema naše prave lipe Neretvanske liske …bome san ji ka pravi prijatej zva na obid.
A kako maša nije cila bez moga prijateja Mladena Stipića zvani Mačak isto iz Graca na temu obidu smo dunkve bili nas četiri ka četiri mušketira. Kako svi ne pijemo ista pića mora san u provištu i to za Đoku pivo (nesmin reč koliko), za Mačka i Fifija bilo za činit gemište (opet nesmin reč koliko) …i bome zame crno …jerbo ja pijen samo crno.
Počeli smo blagovat oko dvi ure i nastavili pomalo jist i bumbit do devet navečer, a važno je spomenit da nan se pridružija oko pet ipo Ivo Sršen Gračanin mleje generacije ma dobre je mire u svemu pa smo pojačali sa pršuton i na kraju završili u kafiću kraj kuče di je bogami pala i pisma.
Sve je bilo lipo i veselo ma sutra su se brojili mrtvi. Osin Mačka i Iva od kojega neman informacije o zdravju Fifi i Đoko su se cili dan ličili, a nisan ni ja bija na cviće u glavi mi je rebunbavalo ka da san u badnju. Eto tako smo i mi prinili morske užance iz Graca u Zagreb i moran reč da njima doli zavidin, nije bogami loše dimit po dobroj spizi i piću.
U ove dane se održava sajam o brodi …nije doduše bija ka pri velik …ma isto je bilo ća za vidit ma moja maša nije jemala force za odit pa smo ostali doma. Moran reč da bi se bilo lako prišaltat na češče lipu spizu i vino i nebi jema ništa protiv a kad je društvo pravo di bi nan bila granica.
Ma skoro san zaboravi da je oni naš prijatej Danilo Radelić …pored svi svoji zanimanja koja san pri naveja posta i nesuđeni sudski vještak za masline ma o temu ču drugi put.
Živi i veseli bili štioci moji pozdravja vas vaš morski čovik Šangarelo.