piše: Jadran Šantić Šangarelo
Evo me vrag tanta da još jednon notajen pizdarije iz svita najveće kurbe u povijesti juski života a to je kurba pulitika. Pulitika je ka jedan nesvačeni teatar di se stalno minjadu plejade glumac koji ka u filmskin rolaman minjadu svit a sve u korist svojega života i takujina dok ji za narod boli ona stvar.
Lipo san bi odredija da više neču taknit u pulitiku a posebno u stranku Zna se ma to van je ka da ste to lipo notali na led pa ti led pritakali na sunce i unda odnija vrag sve če ste notali, ka da se niko popiša na sve rečeno. I stvarno sve da i nečeš moraš se ošervat na tu stranku Zna se jerbo se u njiovu kokošinjcu stalno legu jaja koja postanu mučki. Ipak se iz ti mučaka izlegu pivci sa lošin karman i onda samo kokodaču i govore pizdarije a jako su skloni i iz tuđega kokošinjca krest sve ča najdu.
HDZ je stranka kojon je ka karma zadano da proizvodi afere i to iz svake garniture vlade sa kojon provodi vlast u lipon našon. Od Tuđmanove marčapije prilkon falše kupovine kuće u Nazorovoj pa predstavjanja ideje o 200 bogati fameji po priko pritvorbe i privatizacije do današnjega Agrokora stalno su oni ka pritplačeni proizvođači lopovluka i marčapijanja državnoga i narodnoga vlasništva.
Onda se čovik zapita kakvi je to narod kojega kredu a on isto glasa za nji i postavja ji vlast? Mislija san da je Sanader vrj lupeškega briga ma ispada po novomen da je on bi diletant prema ovemu imotskemu vlaju Todoriću.
Judi moji do sada je ispalo da su na čelu fronte lupeži i privaranti ka i pripisivači i falsifikatori diploma sve ili naši stameni vlaji joli dični ercegovci i i pridstavnici bosanske posavine. Moran reč da su se meju nji umišali i moji dalmatinci i da su i oni dobro omastili brke a jema tu i slavonac pa da ni ličane ne zaboravin i gle vraga sad ispada da smo mi ka narod svi lopine.
Bila bi nepravda ne spomenit našega dičnega gradonačelnika metropole, ma koji je to igrač a. Jema ga na svaku poziciju čas je u napadu čas u obrani a jako je dobar i niko ga ne more zaustavit ma njanka ga se ne more faulirat koliko je dobar dribler svaka mu čast.
Moran se dotaknit i ovi naši jadnika na livoj bandi. Ispada da su oni spretni samo sebe faulirat i zaskočit ma moran reč da smo krolali skroz okad je na čelu ovo mlitavi i besprizorni mali Bero. Jo judi moji tija je bit faraon ma mu to ni prošlo jerbo mu je podapeja nogu mali bračanin a veliki Bauk. A ča da van daje spjegajen sve bi bilo kontraproduktivno i jopet se neče ništa dovest u pozitivu jerbo su nan prežuni puni a kakvo nan je pravosuđe kad iz prežuna izađu glavni igrači i počnu tužakat državu e na tin tužban i oštetan če ervatska bankrotirat. Jerbo u nas je poznata institucija PROCEDURALNA GREŠKA i na njoj suci gradu sve oslobađajuče presude kako o lopinama tako i o ZDS „POZNATOMEN POVJESNOM POZDRAVU“ i onda se brče sa svojin stavoviman oni Hasanbegović i njegova desna bulumenta. Ajme li nan naman budu li nan oni ikad krojili sudbinu, a možda nan je jedina srića ča su oni iz poznatega ustaškega doba svi umrli pa se ne mogu vratit na vlasta ovi njiovi surogati dobro laju ma isto mislin da su jin rozi otpilani.
Jo dragi štioci ča me bilo lipo po godine na moru. I tamo san štija foje svaki dan ma čini mi se da me je ribarščina čuvala od pulitičkega belaja a ode u metropoli nima me ča škapulat vengo me po cile dane ovi događaji lupaju u možjane. Ovo je za poludit.
Evo se malo smirija oni Hasanbegovićev kupleraj oko druga Tita pa je unda bidni Ivo Lola Ribar osvanija par puti u koluriman uz obavezki ušati U u koji su utakli križ da ji vidi Isukrst sam bi se jopet pribija na križ. Čudi me samo da nije haranga krenila prema drugin imeniman iz prošlega vrimena jerbo se nezna ko je tin novin revolucionariman na pameti i na koji če način uvodit desno čudoređe meju narod.
Nikidan san u našu lipu i šesnu Slobodnu Dalmaciju proštija napis iz pera Vedrana Sršena „Kako je papinski zavod u Rim u dobija hrvatsko ime“. Jako lipo štivo i pravo san gušta dok san ga proštija a mislin da bi bilo lipo da se oni na desnoj bandi informiraju o temu i da prosvitle svoje vizure u kojiman sada vlada sama mračina.
Skoro san zaudobija onega muzuvira biskupa Košića jerbo mi je skoro proleti ispod radara. Jo judi moji oko njega stalna proizvodnja svega čega se naš vrli papa Frane bori. Ni mi jasno da ga još niko ni klepnija po luduri a mislin da i neće dok je ovi Bozanić njemu šef jerbo oba misle isto.
Eto štioci moji dragi moga bi ja još tega notat am sve me to štufalo pa da me ne zabole možjani lipo vas pozdravja vaš morski čovik Šangarelo