MONADE BIVŠIH MOĆNIKA

piše: Jadran Šantić Šangarelo
Evo me opet dragi štioci i nadan se da vas ni ovi put neču umorit mojin notavanjen. Štijen foje i uvik jeman pokraj sebe nike bibite o likarij jerbo mi se dok štijen zna srce uzbibat a zna mi i skočit tlak pa da ne bi otega papke moran uzet likarije za preventivu.

Kupi san Jutarnji i lagašno tražin interesantne naslove pa tako ugledan naslov „Labrador s HRT-a donija mi je turiste“ i ča je najlipje u temu ispod tega naslova slika prižence o žene naše a bome globalno poznate makarke Hloverke Novak Srzić.

“Je brate lipa oma  bi se čovik u nju zajubi“. Vrag mi ne da mira i proštijen kolumnu u jednemu dahu ma bome osta san bez drugega daha jerbo san se izblesira pojedinin djeloviman teksta.

Kaže naša Hlo da je dobila otkaz i bome to ni lipo nikad a nekmoli u ove njezine godine. Ka drugo jemala je problemi sa pinezima i tekući račun u minusu. Jo da mi je znat di su jon ka vjernome političkomen kadru stranke Zna se svršili pinezi o nagrad za vjernost jer bome ona je dobila i čin bez ispaljenega metka i to ne bilo koji vengo koliko se sićan čin bojnika. Ako san se privari u činu neka mi bude oprošteno samo mi nikad ni bilo kjaro sa kojon vojskon su zapovidali u ratu ona i veliki Ćiro jerbo su pokupili oboje činove od pokojnega Franceka i tako postali odličnici našega naroda.

Ma da se vratin na temu kako je naša Hlo mogla napravit kuču od male novinarske plačice a posebno kako je ka osoba pod otkazon i unda ka penšjunat dobila kredite i svemirskon brzinon završila kučicu koja je eto puna turisti koji jon legu šolde. Svaka jon čast je žena snalažljiva i sposobna samo je zaudobila nilke važne činjenice da nismo svi ovce i da niki pante duje od zanji 20 godin pa da nan se ne more servirat kojekakve floskule pa taman i iz just naše dične Hlo.

Dunkve mora bi ovu temu zatvorit i u temu moran reč da san uvik kontra jednostrani otkazi judiman pa bez obzira koji su posal radili. Moran istaknit da je naša dična Hlo uvik apostrofirala ali vrli perfidno svoju desnu orjentaciju ma isto jon se zbog tega ni tribalo dat befel o otkazu. Isto tako je ona dok je drmala ka veliki potresi u svitu Prisavjen radila smjene po pulitičkin naputciman pa su judi bili nezadovojni, a ja bi jon u temu kontekstu da prominu radnega mista odakle ne more uticati na radnu pulitiku a i daje bi primala plaču,ma isto mislin da ona i njen tutor šjor Vrdoljak nisu nikad gledali suptilnu socijalnu stranu vengo tvrdolinijašku podobnost. Pa da sa ovin završin ovakove pisanije u dnevnin fojiman  u kojiman se difamira jude a sebe se proglašava jedin bezgrešnon dušon puno je pa kad je i od naše Hlo.

Moran se dotaknit i naše dične i drčne prisidnice koja je funkciju prešidenta države pritvorila u  relti shou pa je se more vidit u nikoliko razni požicjuni u jednemu danu od mužnje krav do postavjanja pločic ma bome triba reć da je bila i na požarištu me ne u onemu najžeščemu vengo gori u Istri di jin je i fameja a ko jebe Pelješčane i njiove vinograde i kuče, i zašto bi Hrvatska tribala jemat zaštičene brendove vina i u Istriu i na Palješcu  pa bismo mogli ponoviti onu šta južnije to tužnije a naša prva dama neka samo obilazi sila i fešte jebe se njon za tragedije naroda.

Uvik su stari govorili da triba nevoja da ujedini sve snage pa tako i naše pulitičke. Moja pokojna nona Ivka Parmačuša je uvik meni govorila okani se sine slovenac a slovenke jubi i pivaj in serenade jerbo neviruj slovencu ka zimskemu suncu. Bome moran reč da je bila u pravu. Osin dobri slovenki nisan nikad volija sve slovence a jeman meju njiman i dobri prijateji i moran ji spomenit po dobremu.

Današnje vrime nan je donilo puste zajebe sa slovenske strane, od rata koji Slovenija nije ni čutila jerbo se ka kurba sa Srbima i JNA dogovorila do krađe našega teritorija i to od Sv. Gere do Savudrijske vale a da ne spominjen pusto podmečanje nog pri ulasku u EU kad su se služili pustin ucjenan ka da su zanat ispekli kod stari Venecijanac.

Kako ni svako zlo za zlo tako ni ovo, moran reč da me jako drago da se pulitička scena barenko oko jednega pitanja okupila pod istu bandiru i da če nadan se složno donit odluku o istupanju iz arbitraže o Savudrijskoj vali. Neznan koje nekidan reka da naš Sabor pod hitno triba donit odluku o istupanju iz arbitraže i proglasit naše teritorijalno more, to bi bilo jedino ispravno i sa mudima napravjeno kontra sviman u svitu i da vidu da smo mi država od svoga stava i zaštite svoji dobara.

Bilo bi nepošteno ne dodirnit se našega Vase. Njegova upitna diploma je došla do tega da su se usijale sudske odluke u kojiman niko normalan ne more predvidit rješenje. Ako je naš dični Vaso ka i šjor Đapić od ukupno par ijad riči iz nečijega rada pripisa više od dvi trečine unda je to po našoj narodnoj pameti privara i falcifikat pa me u glavu ne gre kako to naši dični suci nemoredu tako okvalificirat vengo izmišljadu teplu vodu i bacaju narodu lug u oči.

Ja sa ovega mista a poučen u zanje vrime sa puno slučajeva falci diplom priporučan da ukinemo sve fakultete i da otvorimo mista javni notari po selima i gradovima koji če ovjeravat svjedođbe i diplome kako komen odgovara i tada ni jedan sud neče jemat sa tin posla a ni u fojiman se nikoge neče sramotit i optuživat za plagijate jerbo nikor neče morat jemat ništa napisano osin žeje da postane dotur nauk, likar joli inženjer . E to ja pridlažen.

Kako san dragovojac Domovinskega rata i HRVI moran se ošervat na sva sranja koja su se u zanju godinu dogodila. Ona naša bratija u Savskoj koju državne jasle rane uporno radi proti svoje krave muzare. Štijen u zanju da oni neče ić na mimohod u Zagreb vengo u Knin ka da je to novost, pa to svi repci na granan znaju oduvik.

Naša dična gospoda Klem, Glogoški i oni Đakić ča vodi državnu HVIDR-u su uvik bili dušon i tilon kontra svi koji ne podržavaju stranku Zna se a bogami su se dobro svi fudrali i jebe se njiman za sve one braniteje koji ne daju da ji se izmanipulira.

Ja osobno smatran da se dvi fešte nisu smile dogodit a isto tako smatran da je tribalo jednu feštu učinit i to u glavni grad svi Rvata posebnoi ča smo u vrimenima besparice.

Moran ka zrija i odgovoran pobornik live opcije iz svi kaluna napast vlast jerbo se razbacije onin šoldiman koje nima a sa druge strane ukidaju se likovi, proteze invalidiman i da ne spominjen sve jerbo ne bi stalo na svu kartu u državi.

Da san za povratak stranke Zna se nisan jerbo su nas uvalili niki njiovi u govna za pet stolječa ma isto mislin da ni ovi na vlasti ne zaslužiju produžetke i ča unda? Koga izabrat?

Mladi intelektualci su postali uškopjeni i nimadu muda udrit šakon u stol i ponudit svoju pamet a znan da je jema i priko mire jerbo bižidu vanka i prodajedu pamet svitu za lipe šolde zato san u duši nesritan jerbo nisan toliko pametan da ponudin rješenje svega. Evo štioci moji srce mi se uzbibalo a tlak me skoći na 180/120 moran fermat popit bibite i mislit o još malo sritni starački dan ako i bude.

Došli su mi unuci i to mi je veseje i nadan se da če me odvuč od mračni misli o našoj budučnosti. Ja na horizontu još ne vidin ni jedno pulitičko ime koje bi moglo postat lider i potegnit usporenu feratu naše vlasti i dovest je do izlaza iz tunela u kojemu se sada nalazimo.

Dragi štioci pozdravja vas vaš morski čovik Šangarelo.

Živi i veseli bili i sritno pribrodili ove paklene litnje vručine.