MORE RIBA I UMIRANJE

Piše: Jadran Šantić Šangarelo
Kako svaki dan čitan barenko dva dnevna foja u zanje vrime nisan sigur jeli ja to razumin ča čitan oli mene i cilu Hrvasku niko jebe u zdrave možjane. Svugdi na svitu se na sva zvona govori da judi moraju jist više ribe jerbo je riba najzdravija a napose u konbinaciji sa pravi maslinovin ujen i dalmatinsko mediteranskin začiniman.

Je prav za prav mi Dalmatinci radi tega živemo duje i zdravije a bome smo i viši i korpulentniji o drugi.

I sad da krenen o onemu ča san tija pisat. Ka prvo uvik san zagovara tezu da ministarstvo o MORA jedino more bit u Split ka u centru o Jadranskoga mora navigavanja i ribarščine. E u tome grmu ča bi rekli leži onio jebeni zec.

Osin pokojnega Vice koji je bi prvi ministar mora poza onega drugega rata i koji je ustoliči ministarstvo o mora u Split nikad više ni jedna vlast to ni tila učinit.

Postavja se pitanje jeli to bilo iz vlastite gluposti jerbo je put o pametni ideja iz guzice do glave jako dug oli nisu tili iz dešpeta.I za vrime vlasti o HDZ-a san pisa pisma ministarstvu mora o problemiman,pridlaga (bar san ja mislija) pametne ideje ma ke njanka ni odgovor nisan dobi.

I evo ti ga na jutros opet o moru uništavanju Jabučke kotline i osuđivanju svi rib na izumiranje. Je moran pošteno priznat da san glasa za ove na vlasti, jer san misli da če bit barenko za pinku pametniji, razumniji i na kraju ispravit nepravde i greške one vlasti.

Je šipak …jerbo opet činidu pizdarije i ubivaju nan ono najlipje ča jemamo a to je more i ribarščina.

Dobro je govori Dr. Tonći Tadić da smo svin silan tribali napravit ZERP i da smo ga poslušali danas nebismo jemali 10 taljanski veliki ribaric da nan oru more i podmorje ka da su oni veliki traktori u Slavoniju ča ji jemadu oni „jadni ratari“ ča uporno glume sirotinju a svaki traktor košta ka najboji Ferari.

Ma maka san se o bitnega. Prin niki 5-6 godin je bi oni ribar iz Istre ča je bi največi borac za naše more i ribanje ma način je uša u vlast odma je oboli od totalne amnezije ko je okle je i če je bi.

Danas se je upalilo veliko svitlo o alaruma koje zove upomoč i to pamet i jubav za Jadranskin moren.Bidni Dr. Soldo če na kraju morat pobić iz ove jadne i napačene zemje jerbo če ga počet proganjat zbog njegovega tvrdoglavoga zahtjevanja da se spasi naše more.da se Taljanima zbrani ovolika ribarščina i da se uvedi ciklusne zabrane izlova pojedini vrsta ribe.

Znate ča me najviše čudi da ovi naš prisidnik države ka fetivi Dalmatinac ništa ne čini ča mu je u nasljeđe dato samim porjeklon.

Da je oni mali brački Bauk i on je posta ka mutav, a oni Siniša Dončić ka da jema bakule u glavu i jebe se njemu ča če bit sa najlipjin moren na svitu.

Da je po momen ja bi odma zatražija referendum o temu da samo Dalmacija jema pravo i bome obavezu da rukovodi moren i ja van se kleten u sve na svitu da bismo onda jemali i ZERP i sve nove zakone o ribarščini a da o zaštiti mora i ne govorin a da bi mi Dalmatinci donili zakon o kaznan da nikome ne bi palo na pamet da više i pomisli loše o moru.

Ove ču dane opet pisat pismo ministru o mora iako znan da je zaludu majopet moran radi sebe samega i svoje savjesti, a nadam se da čemo uspit spasit more i sa ovega mista molin doktora Soldu i dokrora Tonča Tadiča da se još žešče suprostave vlastiman ne bili ovinam gori došlo iz guzice u možjane barenko malo pameti.

Eto toli ovega puta, bilo bi i više da me moja draga žena ni nervala ča pišeš moreš sa otin otrat guzicu i tako daje da sve ne iznosin.

Živi i veseli bili štioci moji pozdravja vas vaš morski šovik Šangarelo.