JEMA ŠTORIJ I IZ VELOGA MISTA

Jadran Šantić Šangarelo
Kako bome svi znate da se ja za zimski san ka medvid Brundo priselin u metropolu di san i sad, i kako mi vrazi nedadu mira moran notat nike štorije i iz metropole.

Ja van nevolin o svakakvin pizdarijan vodit konte a nji najviše jema, vengo volin stavjat na kartu beside o onin stvariman koje me počnedu srbit, pa kad se lipo počešen onda mi odma do možjani dojde sinjal ajde notaj ćakod.

Ma kako jema miljun tema i to dobri koje su u manjini tako i loši kojiman se ne zna broj ni bome ni meni lako, jerbo me sve skupa smanta pa neznan ča bi nota na kartu.

Kako ovi naš Hrvatski glas Berlin po izjavi moga prijateja Emila ne smi bit ni livi ni desni …meni je onda najboje raspalit kaluniman po jedniman i po drugiman.

Evo ja bi odma počeja o vlasti i o njiovin poslušniciman koji su postali politička elita pa su zaboravili obečanja ča su ji dali u onemu famoznemu Planu 21. Zaboravili su i ono ča jin je isprid očiju a to je glad, neimaština, nezaposlenost i opća apatija naroda.

Prvo smo sami usrali svoju vlastitu motku sa famoznin Lex Perković i unda smo morali skakat sebi u justa da nas EU ne stavi klečat u kantun na male piljčiće …joli na zrna kukuruza ka ča su stavjali nekad zločestu dicu u kaznu u skulama.

Poza tin su kupili reoplane za branit naše nebo koji su bili ukradeni, pa je na red došla i kupovina skupi auti za „gospodu“ kako iz vlade tako i za one na puno manjin funkcijaman, jer …jebi ga …svaka šuša buša more jemat merđu i audija pa di bi se pulitičari vozili u manje vridnin autiman ka prešidente Francuske koji se vozi u Citroenu 5.

Evo zadnji primjer kako se dere narodna kasa: županica  Lovrić-Merzel kupuje bome lipu veliku sportsku limuzinu sa sedan brzina od priko šesto ijad kun, a za te se šolde moglo napravit nekolko vrtića i zaposlit barenko 30 teta.

Njezino opravdanje koje ne drži vodu je kako ona svaki dan po svojoj županiji koja je največa najmanje vozi po 250 kilometri i da bi to ča brže prošla …mislin ja …triba ženi jaki športski auto.

Novi poteštat u momen rodnomen gradu Splitu zapošljava puste savitnike …pa za gospu …ča se natjeca za poteštata kad jočito ništa nezna pa ga tribaju pusti stručnjaci savitovat. Oli je linčina i neče sam da da inicijativu.

E sad i ova nova barufa u momen Splitu za obnovu neke kuče koja je pod zaštiton države ka spomenik a koju su kupili furešti ministarstvo naše ministrice Andree Zlatar Violić šakon i kapon dili šolde tin fureštiman umisto da se barenko jednon prošeta kroz get i vidi u kakvomen jadu živedu ti judi i srcu carske palače, pa da onda pod hitno naredi da se tin judiman poprave konduti, letrika… pituraju zidi kako u skalaman tako i u stanovima pa di jadni svit počne živit barenko malo juski.

Moga bi ja nabrajat vake bisere do vika ma vrime je da malo opleten i po oniman koji su bili prije na vlasti.

Evo još se sudi šjor Ivi za pustu marčapiju a on bome mrtav ladan sve svalije na druge a zna se diko i sa sutkinjon zakarat.

Jo judi moji koji đon obraz jema ti čovik a bome jema i muda tako se ponašat. Najpri je on ka vladar života i smrti svi nas Hrvatstanaca opjačka …kako kažu …puste miljune, pokupova puste slike najboji slikari, arčija po nevijorku u najboje otele sa ženon i čeraman, pokupova puste stanove a da bi se bezbrižno vozija kupija je blindiranu bemburu …jerbo ko zna …moga je neko napravit i atentat na šjor Ivu i eto ti belaja.

Moran reć da je posta ka papagalo, jerbo stalno ponavja da je ovo politički montirani proces i obračun njegovi dušmani s njin, ka da smo mi svi mone pa neznamo istinu.

Poslin njega opet velika afera sa HAC-om i njegovim direturiman i ostalon bandon koji su sve svoje marčapije radili kako kažu u novine pod paskon šjor Kalmete koji je bome veliki politički igrač …ma sve mi se pari da se i njemu kuva manistra, pa če i on lipo sist prid suce.

Bilo bi najboje kad bi čovik moga živit ka nepismen jerbo bi se onda puno manje sekira. Nebi čita foje i bi bi manje informiran a samin tin bi i boje spava pa bi život bi boji i kvalitetniji, ma nemore se tako.

Evo san se siti još jednega bisera. Nikidan san iša iz našega malega mista u Split na rođendan moga unuka Bruna i gledan koliko se mali porti i muliča svi dužina na crno napravilo, bez i jedne karte o planovi i dozvola, samo se nije ništa ni legalno a ni ilegalno napravilo u naše malo misto jerbo tamo niko ni zainteresiran za napravi malo veći porat pa i malu marinu, a svake godine ispadu skandali radi vezov jerbo judi kupuju nove brode a nimaju te iste brode di vezat.

Aajde ti sad budi pametan. Tilo bi se u lokalnu kasu ulit bome ča više pinez ma za ostvarit uvjete niko nema voje ni petlje.

Nikidan mi je umra još jedan prijatej, kapetan Dragan Miro Jurić i to čovik koji je živija za učinit veći i boji porat …ma kako je u naše malo misto na vlasti …zna se ko …da ne izgubu izbore neće da naplačijedu vezarinu sviman vengo samo nikima i to jin naplačije Županijska lučka uprava, a u blagajnu mista? Šipak!

Moran naglasit da vlast ni zbog svoga legalizma opstruirala ideje za bespravno nasipanje novega mula iako je kamen sa Dalmatine bi deboto mukte vengo naše malo misto nemore naprid dok ga ne vodi fetivi miščanin.

Niman ništa kontra sadašnjega načelnika ma on ni domaći i jebe ga se ča če bit kad on sađe sa trona. E ma za gospu skoro san zaudobi …Puležani bi tili da jin šjor Čačić ka veliki poduzetnik ka bome ča je i bija pomogne u radu vlasti a ne da lipo za svoje gušte igra Golf u prežunu.

Judi moji di to jema, čovika koji je auton ubija i za to okrivjen …naši pametni Istrijani bi ga iskoristili i ne bi mu davali apanažu za posa joliti plaču jerbo je on u pržunu i oni bi ga samo posudili.

Tija bi ovo javjanje završit sa ošervacijon na famozne tabele o plastike joli od mesinga ča su postale najtraženija sirovina u našemu gradu heroju Vukovaru. Ja san legalista i ako je na popisu postotak srbijanskega živja taki da jin se mora dat ploče sa  našin i njiovin pismon …dajmo jin.

Ma judi moji sve to lipo triba napravit po danu za radnrega vrimena a ne šakreto po noći. E to je bila jako velika triska koju je vlada sama sebi opizdila i mislin se da jin se obraz od tega još crveni.

Prin 4 godine je HDZ, sa HSP-om i SDSS-om, doni uredbu o pločaman i natpisiman na oba jezika da bi danas ista ta bulumenta, ovi put bez SDSS-a donila novi gradski statut kontra svoje stare odluke.

Pa ko je ode lud, a čini mi se da ode jebe lud zbunjenoga pa ča bude.

Famozni stožer najavjuje da neče primit domačinski vlast ka de je Vukovar njiova prčija a ne hrvatski grad Heroj. I onda blebetenje o dvi kolone ka da su Vukovar branili dragovojci  u dvi kolone.

To su sve nebuloze a mislin da je i tu dobro i smišljeno umišala  prste i prošla vlast koja na ovi način oče skinit kukurikavce sa vlasti i kako se oni nadaju unatoč dokazanin marčapijan  jopet sist u fotelje.

Evo dragi štioci moji …umori san se od svega ovega a ovo je samo dil onega ča bi tija reč samo niman više force.

Zdravi i veseli bili pozdravja vas vaš morski čovik Šangarelo.