SVETI OGENJ

Ljerka Pukec
Rastova  škrinja
f nje rubača  bela
nesil ju je japica
polek nje poculica
babičina kapica
licitar  črleni
f črnom škrljaku  spi
okol  trobojnica stoji
Na zidu  bisernica
mala tamburica
Vani pred drvenu ižu
Smejeju se črlena ličeka
lepa  kak licitarska  srčeka.
Najemput  odnekud
doleti veter
zaziblje  na vuglu
moje šenično  polje
podraga  na  male iže
črlenu belu i plavu boju
veselje  obijde dušu moju
Imame ju!  Čuvame ju!
Čuvame  domaču reč
i ogenj naš sveti
to nam nišče
nigdar  nemre zeti.