EVO SAN SE VRATI ORAN ZA RABOTU

piše: Jadran Šantić Šangarelo
Bija san cilo lito na more i moran van spjegat da san bi jako kuntentan kako sa vrimenon tako i sa ribarščinon jerbo san nalovi ribe ka nikad u moji 66 god. I došlo je vrime povratka i obilaženja pusti likari da me vižitadu i rečedu oču li brzo partit joli jeman još vrimena za potrošit.

Za sada sve gre dobro nisu me još počeli otpisivat ma moran reč da ne zaudobin dokle god jema rezervni djelov za jusko tilo more se produživat rok trajanja.

Lipo san se akomodira u metropolu jerbo su i ovod lipa vrimena pa nisan pa u depru da bi pensa o temu ča ču radit joli ča ču notavat na kartu. Kako vrime gre naprid ja san se skroz unina u kolotečinu i nisan misli na ništa pametno a samo san is kraja gleda ča pulitika čini. Na dane skroz snervavalo da bi popizdiva i mislija pa ko je ove jude bira sad i prije za zastupnike pa to su samo licemjeri, egoisti i pokvarenjaci koji se znaju skalavat na najniže skaline juskega morala da bi druge izvriđali i bavili se svin mogučin podmetanjiman.

Jo judi moji kad jema ovake mržnje dok smo u miru ča bi bilo da smo u ratu pa to bi bilo krvi do kolinjerbo bi judi ginili o ružni riči i zločesti jezikov.

Več se dugo promišljan dali uopće čakod notat joli ne jerbo ispada da notaješ  uzalud joli samo zato da bi te mogli gadit vriđat i napadat. Malo san se umori od svega oko mene i to najpri o života pa od krize pa od pulitike i sad od ovega terorizma koji nan svon forcon ne kuca vengo šakan lupa na vrata.

Nemojte mislit da ja to priuveličavanje, ne, ne, jerbo san bija meju njiman živija i radija pa san na izvoru upozna njihov mentalni sklop i zato virujte ne bi tija širit paniku ma isto triba ovo sve jako ozbiljno svatit. Evo kvragu počeja san naopako jerbo san tija dat malo ošervacije na naše famozne izbore.

Neznan koliko se pouk more iz svega izvuč ma ja ka stari čovik uvik tražin ono izmeju redak. Dunkveka prvo ča če bit bit če i tu ja ka ni mnogi od nas nemoremo jemat upliva. Narod je izaša na izbore i svak je nota svoje a na kraju je ispalo da malo karikiran da nas u našoj lipoj zemji jema po a po i to po koji drukaju za crne i po koji drukaju za crven pa ajde ti sada učini vladu. Jo koja bito mišanca bila koji kupus a ne mogu ni zamislit koji bi to škandali u saboru bili.

Majko moja volija bi da se varan i da nan sa velikon koalicijon koja gre priko mosta teče med i mliko. Ovi naši nadobudni ča stalno gredu tin svojin moston malo su polupali lončiće jerbo izač sa idejon o velikoj koaliciji je oli su politički slipi joli su berlavi ko to more sparit ovako velike neistomišljenike i jude različiti svjetonazora pa i kulturni pedigrea.

Moran malo povezat izbore za prešidenta o države i izbore za parlament. Kad je šjora Kolinda došla na misto prešidenta države i kad se moglo vidit goste u svečanoj loži na inauguraciji unda san odma  reka da ni dobro jerbo da ne očekujen od nje iste aršine za svi i da če ona otvoreno drukat ka na utakmicu za stranku Zna se, iako to ka prešidente ne smi.

Vidili ste i sami da san bi u pravu i da se ni potegla jaka polemika priko foji i drugi medij skoro je provela u dilo da če dat mandat onomen koje dobi izbore a ne onome ko jon donese potpise sabornikov za večinu u sabor. Evo ka najnovija batuda je osvanilo u foje kako je vlast joli USKOK u prežun stavija onega Mamića njegova sina i ostalu bulumentu a koji je ka paun paradira na inauguraciji naše lipuškaste prisidnice  i to je dokaz o kakvin VIP gostima je bila rič.

Crikva na čelu sa onin veleumnin biskupon Košićen je uvik bila skroz desna pa to i ne iznenađuje, ma isto mislin da bi on ka pastir o imena i funkcije svomen stadu triba dilit lipje objave a ne samo o mržnji i netrpejivosti. Sveti otac Frane bi triba njiman u crkvenoj hijerarhiji bit uzdanica i zvizda vodilja ma isto me straj za njega. Ne bi me bilo drago da mu se čakod dogodi joli da se sumnjivo razboli.

A isto me malo teplo pri duši kad po rezultatiman izbora vidin da nismo baš drastično zastranili u desno i da za ovi narod jema nade za jubav toleranciju i poštivanje različitosti. Drago mi je čut da ova šarena gospoda iz Mosta koja držidu nožice o političkega sukna u svojin rukan tražidu jake reforme jerbo sa i ja sa tin slažen. Triba reč kjaro i bogatije zemje ne bi mogle ranit ovoliki broj činovnikov koji ništa ne rade osin ča prvega o miseca dižu lipu poputbinu. Triba i to odma ka prvu miru pa ko god bude na vlast srizat županije, općine i državu formirat sa tri do pet regija a moredu se zvat i županije.

I ka šlag na tortu moran reč da me jako žaj šjor dotura Prgometa jerbo su ga istirali iz stranke a to  ni bija baš tolerantan i razuman čin. Uvik triba čut obe strane za pravedan zakjučak donit. Eno u uvodu san van nota kakvi smo mi narod pun zala i opačine judske zavisti i zloče. Zašto san van ovo reka? Proštija san da je oni mladi dotur iz Mosta kupi kuču sa šoldiman koje mu je da oni bivši Nuncij štovani biskup Vidović koji je jako omiljen u Vatikan a posebno kod Papa i to bez kamat, pa ča unda šjor biskup je izgleda bogat i lovaš a po krščansku je davat sveti čin. Ipak  iako stoji zapis da se velikodostojnici iz crkvenega visokega KRUGA MORAJU ISTICAT SKROMNOŠČU I SIROMAŠTVON to je samo naučna fantastika. Sičate se nikidan je u foje dimilo o onemu velikodostojniku koji je u svoj Belvedere stan ulupa puste miljune šoldi iz crkvene muzine.

Ma sve mi se čini da je to reka joli nota na niku kartu davno „niki bleso„ jerbo su se vrimena a bome i judi iz crikve prominili. Moj pokojni barba fratar fra Bernardo Buljević je meni govori “moj sine ni ovi habit i šandale na meni nisu moje vengo božije”.

Mislin da ne triba malega Božu osuđivat jerbo ni ukreja a dug je pošten vratit če ga za 20 godin pa ni to grij jerbo ji jema u Metković koji su sebi napunili muzine državnin šoldiman i uživaju boga svoga pa ništa. Jema ji jema znan ja..

I eto izgleda da triba o judiman govorit samo ono loše ka da dobrega nigdi nima. Neču vas puno davit samo bi još tija dotaknit suce ustavnega suda na čelu sa onon šjora gospopjon Jasnon Omejac. Toliko su pravni pizdarij napravili, javni skandali potegli privare i pripisivanje diplomski radov učinili da je javnost s razlogon popizdila i da su se pravni stručnjaci i profešuri uzjogunili. Iz njezinega imena i bezimena se more zakjučit da je ona ka sudac jasno omejena od niki judi od pravosuđa a da o pulitičkin strankan ne govorin.

Pa judi moji za gospu blaženu tamo su pripisivači, prevarnti, uhljebi i judi bez skrupula kad moredu donosit nake prisude. To je zbilja sramota za jednu pravnu državu.  Ajmo malo sad bit u miru i čekat očemo li brzo dobit vladu sa kojon čemo naprid u boje sutra  za svi nas i našu dicu.

Ajte stojte mi dobro i živi i veseli bili pozdravja vas vač morski čovik Šangarelo.