ŠTORIJE IZ MALOG MISTA
piše: Jadran Šantić Šangarelo
Nadan se štioci moji da će te se sitit ovega čovika ča ga spominjen u naslovu, jerbo san ga barenko dva puta spominja u mojin štorijaman iz malega mista.
Dunkve bilo je vako: U naše lipo i šesno malo misto Gradac u Makarsko primorje, žive jedan, po svomen životu, jako interesantan i osebujni čovik …pivač, ribolovac, bivši Galeb i da sve ne spominjen, jerbo bi se mogle otvorit nikiman i jute rane a zove se Mate Peko zvani Škaja.
Moglo bi se o temu čoviku napisat libri a ne jedna vako malešna štorija, jerbo je njegov život pripun dogodovštin,zajebancij a nadasve pun pisme i mužike koja ga prati evo puni osna desetljeći.
Ti moj dragi prijatej Mate Škaja je jedan vrstan ribar a napose lignjolovac. U njegovomen opusu o ribarščine jema parangali, vrši, tunj i bome peškafondi.
U dalmaciju se znalo stotine godin da se na posebnin poštan i u posebna vrimena lovidu lignje a napose zimi. Znalo se u stara vrimena da se lignje najboje lovidu od kraja devetoga miseca do kraja veljače, ma te je stare navade moj dragi prijatej Škaja svojin postupcima bacija u škovace.
Zašto? Zato jerbo on lovi lignje svaki božiji dan u godini i nikad se ni vrati doma bez lignji, uvik je doša u porat barenko sa jednon i to ako je veća u plastičnoj vričici pa u žepu o jakete …a ako je malešna uvik u škatulu o španjuleti.
Kad bi se moglo izračunat ispalo bi da je moj prijatej Škaja najboji lignjolovac na svitu jerbo on godišnje ulovi najmanje 365 liganj jušto i koliko jema i dan u godini. Jema on i zeta sa kojin bacije vrše i tu on zna ćapat lipi bokuni a zna se trefit samo za pofrigat .
Ma jema Škaja svoje mote o ribanja i niko mu ne more ništa pribotunat, more mu se samo begenat. Kako ova priča ni o lignjan i vršaman vengo o parangalu …triba počet i o tomen pisat.
Ovo ča ču van pripovidit i ovod notat nije friškega datuma ma oni ča gleda u malo …malo i vridi.
Dunkve moj prijate Škaja je jednega grubega dana lani u kasnu jesen za punega miseca baci u more parangal o 100 udic na koje je nadija sardele i to friške. Svak na more zna da se moli lovidu za misečine i to da je dobra ješka friška sardela.
Puno nas je znalo bacivat parangele sa brojen udic po propisiman ma bome i vanka nji i prošle godine ni bilo nikoga velikega ulova. Ma moj prijatej Škaja je jednon u te grube jesenje dane baci svoji 100 udic nadiveni sa friškin sardelan za punega miseca na niku svoju poštu i sutra dan o ranega jutra on i njegov zet gredu vadit parangal. Dežurni šufištiki u porat su odma počeli brontulat …bilo bi boje da smo sardele ispekli na gradele, jerbo moli nima a drugi …učini si sebi dvi štete …prvo ča si baci sardele a drugo ča si potroši benzinu i vrime za bacivat i sad za dizat parangal. A treći …oni ča su najjači su mu govorili: -sve ča ti uloviš ja ču na prsiman ispeč na gradele …i tako daje sami biseri do bisera judske gluposti.
Kako moj prijatej Škaja nima ni jednega zuba u justiman …ni moga pokazat zube ma jin je odmiri o šake do lakta i partija na more.
Poslin nikega vrimena more bit ura ma i ura i po vrača se moj Mate Škaja i akošta ispri kuče na mulić. Zet je lipo veza kajić i počeli su vadit arte ma i kante o jupola u kojiman je bila riba. I dok su oni bili zauzeti svojin poslon došlo je par dežurni pametnjakovići i grinteša da vide ća je Škaja ulovi.
Skoro ji je udri kolap kad su vidili skoro pune dvi kante o jupola veliki moli. Gledadu oni u čudu i mučidu …ma mući i Škaja da bi poslin par minuti iskrenili kante na rivu i on i zet ka da nečedu počeli brojit mole.
Kad su završili ispalo je da su na 100 udic ulovili 80 komadi lipi moli i sviman začepili čunku.
Nisu se ti dežurni muzuviri više pačali u Škajine ribolovne pohode jerbo sa njin nikad ni sve kjaro.
Eto dragi moji štioci ovo van je sve živa istina i da na kraju rečen moj prijatej Mete Škaja je ne samo najboji lignjolovac vengo i parangališta o formata a i danas mu je uvik drago zapivat i čekinjaman se udvarat.
Živi i veseli bili štioci moji pozdravja vas vaš morski čovik Šangarelo.