ŠTORIJE IZ MALOG MISTA
piše: Jadran Šantić Šangarelo
More bit da će mi niki dežurni grintavci pribotunat …ma kakva je to štorija o moru kad je štorija o praoni o šporke robe.
Je jemali bi u jednu ruku prav ma u drugu …neznan, jerbo je ovo štorija o svin našin stariman nonama lavanderama. Ma isto ovu štoriju triba ispripovidit i notat u foje. Gradac je jedno smišno dalmatinsko misto koje je pri dva godišća proslavilo 100 godin o turizma.
I morete li virovat nije nikad jemalo ni kemijsku čistionu ma ni praonu o šporke robe.
Kako je liti Gradac pun o turisti u oteliman, a bome i u privatnome smještaju …cili ti iznajmjivački svit nije jema di oprat robu vengo se sve to radilo doma i to pored svi ostali zajebancij koje čovik jema kad iznajmjije turistiman kamare i apartmane.
E bome onda se jedan jako simpatičan i drag čovik dositija da bi tribalo otvorit praonu o šporke robe ma bi se unutra pružala i usluga sumprešavanja tako da bi to bilo na evropskemu nivou.
Kako svak imalo pametan zna da je aviza oliti reklama po posla …ovi naš dragi čovik je napravi udarni reklamni letak koji je jedno jutro osvani zalipjen na svin važnin mistiman u Gradac.
Dunkve na temu reklamnemu letku pisalo je vako:
PRAONA ROBE „U PORTU”
( Željka i Duple )
Stari porat 6 – City of Gradac
Mob.091/5888208( uvik je u žepu )
PEREMO A BOME I SUMPREŠAVAMO
VAŠE
Šporke lancune Šporke kotule
Šporke intimele Šporke košuje
Šporke tavaje Šporke kalcete
Šporke tavajole Šporke majice
Šporke kanavace Šporke kombinete
Šporke faculete Šporke piđame
Šporke mudante ( ženske a bome i muške )
Šporke ređipete Šporke koltrine
Šporke šugamane Šporke trliše
Ma bome peremo i svu ostalu šporku bjenkariju samo ne moremo oprat šporke jezike.
I da znate da vi nemorete toliko šporkat robe koliko je mi moremo oprat i sumprešat.
I ća se dogodilo u temu malome mistu?
Ma kako je u nas svit pun sumnji na sve novitade ..odma se naglas počelo kontat kolike če bit cine.
Bit će to skupo i išlo se u stari porat u Duple po cjenik, pa kad su se saznale cine koje su bile jako niske …narod je navalija i tome našemu Dupli je posal lipo krenija.
E onda su počele barufe …jerbo žene ća afitaju nisu više mogle bižat o bračni obavez sa škužon da se umorne …da su prale šumprešavale, inkolavale… jerbo se to sad sve radilo u Duple.
Bome muški su postali zadovojniji jerbo su se mogli bavit sa ženan, a žene su bile jako kuntente. Kako je veliki dil svita muškega u Gradac okrenuto ribarščini …tija bi ovod naglasit da bi niko poduzetan moga otvorit butigu o ribarski arti …jerbo je najbliža 15 km daleko i to u Ploče.
Poslovni prostori prazni jema koliko očete i ta bome na lipin mistima i to ne bi bi problem.
Ma tija bi za kraj dragi štioci još dvi beside. Jeste vidili plakat a, kako je to lipo sa našin starin besidan napisano.
I zato priporučan …triba naš lipi starei Dalmatinski govor ća više duperat i o zaborava ga ukrest.
Još jednon da rečen jeste li vidili kako u naša mala mista jema pametni i poduzetni judi koji su puni dobri ideja ma samo jin fali pinez.
E kad bi se to moglo sparit ideje i šoldi a di bi nan bi kraj. Sritni i veseli bili dragi štioci. Vaš morski čovik Šangarelo,