piše: Jadran Šantić Šangarelo
Dragi moji i lipi štioci najpri da vas lipo i o srca pozdravin i da van se škužan ča se nisan dugo javja. Ovo prošlo lito je bilo puno pritunbavanja i razni loši škerci da jednostavno nisan moga ništa notavat na kartu.
Ka največa pegula naman na moru je bila ta ča je kiša padala jušto 40 dan pa nan nisu ni turisti bili kuntenti a da ne govorimo mi koji se bavimo ribarščinon. Sve se okrenilo naopako pa da mi je pokojna nona živa rekla bi sinko došla je sodoma i gomora.
Dobro ni baš tako ma je isto sve bilo naopako.
Poza te dežgracije da nisan moga svaki dan na more uvatila me i dežgracija sa ovin livin kolinon ča mi je unutra stavilo protezu o niki plemeniti legura ma jopet ni izgleda na dobro ispalo. Evo san se vrati u Zagreb misec i po prin nego san planira jerbo san mora u doturi na vižite. Moran van na veliko priznat je na more najlipje ma ovi naš Zagreb to van je metropola po miri čovika ni privelik ma bome ni ni malešan a sve u njemu jemate najboje i to od butigi ,oteli ma najboji su likari i samo ča ne moredu mrtvega čovika oživit.
Moran van pripovidit pjačku i lupeščinu koju san doživi u naš lipi Dubrovnik.Tamo jema jedna lipa nova klinika koja se zove Marin di dolazidu razni likari špecjališti iz Zagreba ma i iz drugi misti. Kako mi je u vižite bi jedan moj dragi prijatej sa svojon ženon kad me tokala ova napast od bolesti kolina odma su mi njegova žena i on priporučili hitno u Dubrovnik tamo dolazi jedan specjališta iz Zagreba i on če te vižitat. Nisan tija jerbo san tija radije u moj lipi Split ma moja žena i oni ka za napast navalili name i ja lipo pojden u Dubrovnik.
Dovelo me u tu lipu i novu kliniku kod tega likara kad za gospu vidin ja poznatu facu i to sa TV a to van je oni likar ča na TV reklamira i priporuča kušine i štramce. Majko moja odma me ništo zazeblo oko srca i bi san u pravu ti likar a zove se MIŠKULIN mi je utira niku veliku inekciju i kopa po kolinu da bi izvadija pune dvi tube sukrvice i za svoj trud odnosno vižitu i rengen mi je naplati 1860,00 kun. Poza tin više nisan moga na nogu stat i tako da san u posteju proveja skoro misec dan dok me ni malo molalo da mogu vozit tonobil do Zagreba.
Kad san momen likaru špecjališti u kliniiku na Šalati lipo sve spjega on se uvati za glavu i počeja je sipat beštimje. Omar san zna da sa bi u pravu kad san tega likara nazva šarlatanon koji judiman krede šolde. Ti nazovi likar kurbin sin mi je ukreja misec i po dan mora ribanja i banji u more di san liči ovu moju betežnu nogu.
Mi smo u naše malo misto jemali ovo lito lipi fjeri od brudetijade do noči teatra iz Sarajeva pa koncerta di je kanta Tedy Spalato koji je priznati prijatej našega malega mista a bilo je bome ka i uvik i baruf koje ne moredu nas dalmatince mimoić joli mitit ča se u nas doli reče.
Najpri smo spašavali jednega čeka koji je dičijin kajičon koji se napušije za vrime velike bure iša po drugi kajič ča mu ga je bura odnila i on ti se lipo zaputi na dičija vesla. Uvati je on odnešeni kajič ma kad je parti da se vrati u porat mažina on vesliman sve u šesnet ma ni pedja ne gre naprid. Mi koji smo bili kibici u kultni kafić Karaka koji je odma u portu molali smoga da se najpri dobro umori a onda smo ga išli spašavat. Kad smo ga u tegalj doveli u porat ča od sriće ča od umora ni zna če reč vengo nas je sve pozva na piće. Jo ludega čovika više ga je doša račun za bibite vengo da je iša kupit novi umisto onega škapulanega kajiča.
Osin tega jemali smo i tgakmičenje u ribarščini koje je postalo tradicija i koje svake godine lipo uspije a sva riba i lignje koje se uvatidu poslin vaganje se sparičaju za takmičare a bome po našemen običaju i za psdobrance koji uvik jema više nego nas takmičara. Pala je lipa pisma svirila je i kitara tako da je to bilo ka kruna sezone.
Moran odma skrenit od zajebancije u pulitiku i to kako, lipo bome na vas gas jerbo je pulitika u nas postala najkurbanskije zanimanje koje vodidu lupeži, nesposobnjakovići, karijeristi i svaki drugi šljam. Kad pogledan isto smo mi svi krivi zato jerbo smo ji na izborima notali a oni ča nisu izašli na izbore učinili su još gori škerac jerbo su ove pustili lišo u vlast.
Evo nima ministra prosti bože u čije ministarstvo nima marčapije i kjriminala. Nima ministra koji nije jema koju maču na imenu i bezimenu, neznan bi li izbrojija nji tri koji su čista čela a prisidnik vlade je štorija zase.
Naš premijer ka da žive ka noj, ukopa je glavu u glib i ne vidi ništa pa kad več ne vidi ništa nemore ništa ni pametno učinit a ako čako i učini ispade bože sačuvaj opet niki škandal a on je poznat ka tip koji je autokrata i smatra da je bogon dan, kako da nije. Jemamo jednega u pulitiku koji se je puno vrimena sakriva i ni doša pod mač pravde ma gospe mi skuvana mu je manistra i kako štijen u foje ove dane i ti šjor Kalmeta je doša izgleda na red, pa ako bude boga i pravde triba bi vratit sve ča je proarčija državni šolad i zatvorit ga u bajbokanu dovika.
Čovik se ne more otet dojmu da smo mi narod u kojega se najviše na svitu iska pravda i to sve sa nikin čudnin referendumima. Ona bokun debja šjora Željka Markić je uz pomoč „ dičnega“ klera u Hrvata na čelu sa šjor Bozanićen, Bogovićen i ostalon desno orjentiranon bulumenton uizbunila narod i vodi ga jopet u nike bolesne podile pa to nima ni u tunguziju, a HDZ jon daje svaku moralnu i materijalnu podršku.
Oni kojiman se sudi za sve pjačke u Lipoj Našoj i čiji su izvrsnici po prežuniman sada na čelu bivšega prvega i najškolovanijeg špijuna šjor Karamarka i velikega Vase oče ponovo na vlast jerbo jin je sigurno blagajna prišušila pa jin triba nova „Pomoč „ iz državne blagajne. Moran reč da nisu puno ostavili poza sebon a ovi ča su na vlasti proarčili su i ono malo ča je bilo oli su lošin poteziman sve uništili. Mislin da bi ovemu našemu narodu jednon za svagda tribalo doč iz guzice u glavu da se dovedu u red i da jin nikakve političke stranke ne krojidu sudbinu vengo bi tribali pametno birat samo stručne i poštene jude koji če vodit državu i izvuč je iz govan, normalno ako taki judi još jema.
Da bi potkripija onu tvrdnju da su popi u Hrvata desni čitan u foje da je dični šjor Davorko Vidovič u znak demonštracjuna napusti skup di je jedan pop umisto mise drža pulitičke govore kontra od naroda izabrane vlasti ( Kakva je takva je ) ma niko ga od viši pastira ni uvati za rogove i veza mu brnjicu.
Da bi zaokruži sliku moran se dotač i naši odličnika u Evropskemu parlamentu i to posebno jedne naočite i obilate gospođe Šujice kojon je zasmetala pisma bandijera roša pisma koju su pivali proleteri siromaji i partizani koji su i toj šjori gospoji dali ono ča jema danas. Jebe me se za onu slovenku ma isto tu pismu niko ne bi smija kritizirat.
Moran priznat da mi je teško pofalit čovika za kojega su napravili karikaturu sa noson od Pinokija i sa kojin se nikad nisan slaga jerbo je zame bi jako falaš i voli je lagat. Čitan danas u foje kako je da svoju oservaciju na onega pokvarenoga četnika lisičije face Andriju Rašetu di ga je prikaza u pravemu svitlu a onega židova ča nan je pomaga u prigovoriman sa četniciman napa da nije reka istinu i da dotični četnik nije čovik rosa fijore vengo notorni i pokvareni negativac. Bravo šjor Hebrang ako vako nastavite bit če mi drago jerbo uvik mislin da se čovik more popravit pa i vi.
Zagreb je u ove jesenje dane lipo okupan suncen i gušta čovik odit kroz kale i uživat ma ja bi isto bi u moju Dalmaciju i uživa u drugin koluriman i drugemu pajsažu. Eto štioci moji dragi još jednon škužajte ča nisan ništa notava a obečajen da ču sada ovod u metropolu pokušat pratit sve ako me negdi drugo ne odvede nemirni duh moje drage žene koja bi samo putovala i điravala po baloti zemajhskon.
Živi i veseli bili pozdravja vas vaš morski čovik Šangarelo.