ŠEMPJA O` JEZIKA

Vanja Škrobica
neka nikome ni palo
na pamet da me uči
kojin jazikon triban govorit
ja san Slatinka
prababe, babe i mater
rodile su se i udale
za jude u istemu mistu

istina je da san
slatinski bokun
iskvarila životon u Splitu,
skulon u Zagrebu
i pokupila nike
tuje beside od
judi koji su
ulizli u moj život

ja san nikakovi
homo duplex:
Slatinka sa Put porta 6
iako mi je adresa spli’ska

dvanaest godin san provela
na škoju di počivadu
moji mrtvi
di mi još živi rodbina
i čeka me
kamena kuća
od stotinu lit’

moj govor će vavik vonjat
po kaduji i ruzmarinu
zibjat će ga ribarsko
šotovoče u portu
jerbo moj jazik
jema koluru
smokve crljenice
ukus uja od maslin s Glavice
snagu vesla i ponos jarbola

od kad moje matere više nima
polako gubin ono lipo “ča”
pa kad san sama
pričan ka šempja
sama sa sebon
nike beside u libar notajen
da i’ ne zaudobin

neka moj jazik
plovi slobodno
bala po valan i kalan
ustaje i liježe s menon
nisu mi ga dale skule
i ne ubijan se gramatikon

i baš ću govorit onako
kako su me doma učili
u spomen
na jude i škoj di san resla

ko ‘oće slušat,
razumit će me

2019.