piše: Jadran Šantić Šangarelo
Jur san skoro zaudobi vrlo važnu avizu za javnost. Ne isplati se nikakva lupeščina jerbo se otkrije kad se najmanje nadaš.Teško se more zaboravit orkansko jugo od nikidan i sve barufe ča je učinilo ma ima jedna novitada koja mi je skoro utekla iz vidnega poja.
U naše malo misto jemadu dva porta stari porat i novi koji je komercjaliziran. U novemu portu dugo vrimena stoji vezana jedna pasara čini mi se Elanova koja na provu jema okrugli poklopac od pokaporta a vlasnik jon je doda i kabinu.
Svi smo se puno puti pitali čigova je jerbo jon je oznaka mista di je registrirana požmarila pa se ne vidi ni misto ni numer. Nikad niko ni vidi ko je koristi i joli samo stoji na vezu. Puno se u naše malo misto govori da onemu fali mezomariner, onemu sidro, onemu konopi, onemu škarmice za vesla a nikiman i vesla. I sve to se svodi na komentare jo da mi ga je uvatit škinu bi mu slomi gjandule bi mu iščupa prste o ruke bi mu isika nožen i tako daje, ma niko niukad ni lupeža uvati.
I unda ti majka priroda učini barufu o vrimena i na brzinu otkrije da je ta pasara sa kabinon skladište opjačkane robe odnosno svi naši arti. Svi smo se izblesirali za vrime nevrimena i škapulavali svoje i tuđe brode samo se za dana niko ni pojavi za škapulat tu pasaru. Kako su bote bile staršne razbile su nike brode jerbo su bili jako pritegnuti a ovu famoznu pasaru su izbacili na mul jerbo su jon popucali konopi.
Kad se ovi ludi vitar malo stanja izašli smo gledat i zbrajat šćetu, kad na mulu stoji ona pasara slomjena popola i iz nje su poispadali svi dosad ukradeni arti iz drugi brodi. Sad se ka uvik skupila maša pametnajkovića koji su pravili konte i nagađali ko je lopina kojega triba škanjat po ćiverici i vezat ga za stup o bandire na kraju mula. Kontali ne kontali niko nemore povezat nikoga i nasta je jid od očaja jerbo smo našli ukradene arte a neznamo lupeža.
Malo su se smirili duhovi i pasalo je nevrime a unda ka grom iz vedra neba osvane na mulu čovik koji pribire po ostaciman pasare i sam sebi u bradu ronja: “Ajme meni sad čedu me uvatit a nisan uspi ništa prodat, a pusto bogatsvo san bi smisti u brod”.
Ugleda ga jedan naš mjesni ribar i došetavši do njega oslovi ga: “A Mate a ča to radiš a”? Mate se štrecnija i ka izgubjen u svemiru ni zna ča če reč vengo ka iz topa odgovori: “Sve san izgubi sve ča je vridilo ma je da ni bilo moje isto je vridilo”.
Kad je misto doznalo ko je bi lopina tilo ga je obisit ma isto smo se smilovali jerbo je bi beskučnik i sirota ali isto smo mu zabranili da više dolazi u naše malo misto. Od tega dana svi ostavjadu u brodu slobodno vesla, škarmice, sidra, konope, mezomarinere, bez straja da če ji ko ukrest.
Matu san viđa poslin tega na drugemu terenu di operira ma nisan tija nikomen ništa reč jerbo bi ga pribili i moga bi skroz najebat. Neka se u to drugo misto sami škapuladu bez naše pomoći a mi smo zafalili jugu i morskin čudiman na otkriču našega lupeža.
Eto štioci dragi živi i veseli bili pozdravja vas vaš morski čovik Šangarelo.
I neka mi niko ne zamiri ča nisan postupi po zakonu i aviza policjote. Razumite me molin vas. Bidni Mate se samo bori za priživit u nova jebena vrimena a uvik je postoja niki Mate.