ŠTORIJE IZ MALOG MISTA
piše: Jadran Šantić Šangarelo
Kako je i mene ćapalo lito i litnje zanimacije a to oče reč ribaršćina a malo i točavanje u lipemu moru skoro san izgubi voju za išta notavat na kartu. Ma opet nemoreš proč priko rive i Solina da ti se ćakod ne zalipi u pamet i onda po mome moraš to notat na kartu ka pravi kroničar o zajebancij. Znan da će uvik bit oni dežurni grintavac koji ćedu ronjat a ko si ti ko te je ovlasti da pišeš zajebancije na tuđi račun i još za gospu svakakvi sovki na moj račun, ma ja to ne bendan i ka tovar tvrdoglavo gren i pišen za svoj gušt a oni ća in se ne sviđa neka ne čitadu.
Dunkve jutros san u Karaki koja je planetarni kafić svi koji rano ujutru pijedu kafu čuja dvi lipe za notat. Iz moji štorij od prije poznajete moga prijateja Šimu Rosinoga koji je rođak od moga prijateja Mačka a bome ste i njega upoznali kroz moje štorije i najnovija barufa Šimina je dakako vezana ka i uvik za vino i pijanstvo. Jutros mi je Mačak za dobro jutro počeja štoriju o Šimi. Šime van jema u Bačinu staru kuču koja mu služi ka vikendica u kojoj se arči ždere i loče kako on sa svojin pajtašiman tako mu sin i zetovi sa svojiman.Jema on okolo i lipe vrtle a u kuči je bome i gustirna oliti čatrnja u kojoj je voda za prat sude. Moj ti je šime nikidan bija sa jednon mašon na marendu koja se bome protegla priko načina dugo i kad su svi digli sidro i partili dobro pošprucani doma moj ti je Šime prisauga sa vinon u crveno i nako dobro pripit iša prat sude.
Sve je to bilo dobro i sudi oprani škovace bačene u bačvu za škovace na kojoj lipin velikin sloviman bile boje piše „ BACAJ UME „ ća je to Šimina umotvorina i naš je Šime seja u svoga Tvinga i polako parti doma . Nebi ovod bilo ništa nenormalno da sutra nije doša zet Mate i naša poplavu o vode za koju ni zna okle je. Ma kad je uša u dvor jema je ća i vidit, naš je Šime dan ranije nako pripit otvori kanelu o vode za oprat sude i ni je zatvori pa je voda točila cili dan i noč i bome se gustirna ispraznila. Kako je nastala frka oko tega kako sad prat sude naš se je junak Šime mudro dositi i ka iz topa jin je spjega da mu je i onako bilo dopizdilo prat sude i čaše a ova tragedija i ni loša jerbo če sad svi jist i pit iz plastični pjati i čaša samo neznan jemali teča za kuvat o plastike koje se bacijedu.
I dok san ovo sluša jedan prijatej Stipe sa Debeloga briga počne priču oko pranja sudi da bi se nadoveza na Šiminu štoriju i ispriča nan kako Rude sa grmea to van je dil našega malega mista ma u brdu prin puno godišć ni pra sude svaki dan vengo bi ji stivava vanka na dvoru sve dok se svi sudi iz kuče ne bi šporkali a onda bi ji posuja praškon za pranje i čeka kišu da obavi svoj posal. A kako je ovod poanta o vodi i pranju puka bi ka čvrčak da van ne kažen i jednu tajnu koja mi sad udrila u možjane jednega moga prijateja pomorca kapetana duge plovidbe.
U ona vrimena pri 30 , 40 godin kad su stari brodi još bili bez makinj za pranje robe moj bi prijatej ma nesmin ga imentovat kupi u Egipat oli u Ameriku po 50 pari midanat i maja na špaline i kad bi ji šporka on bi s njiman odma u škovace jerbo ko bi bija lud prat bjenkariju na ruke i to za gospu muško a još i na brodu prikooceanskemu.
Eto štioci moji dragi da nebiste pomislili da san zaboravi na vas sritni i veseli bili pozdravja vas vaš morski čovik Šangarelo.