ŠTORIJE IZ MALOG MISTA
piše: Jadran Šantić Šangarelo
Ma palo me napamet da van nisan ispripovidija jednu štoriju o ciplima putnicima. U doba ovega nesriknjega rata živija san u Paiz (a to je za one ća neznaju Stari grad oliti Pharos na drugemu Braču oliti Hvaru). Ka ratni vojni invalid san dobija na korištenje jednu srpsku vikendicu skoroz devastiranu ma za reć je da su je devastirali lokalni štakori, a ja san je uredija i sa gušton živija u Paiz di živedu jako duševni i smišni judi. Kako nisan jema svoj kajić posudila mi je jedna dajnja rodica svoj tako da san moga odit na more i na ribe. Lovija san sa šćapon bome jerbo nisan jema nike druge arte dok nisan napravi jednu obilatu vršu. Jemala je dimenzije metar i dvadeset u dužinu devedeset centimetri u širinu i bila je visoka jušto šezdeset i pet centimetri.
Lipo ja bacijen tu vršu na nika nepoznata mista i bome ulovi se 2,3 adiko i 5 kili sitne ribe, i ja to uredno pdilin a najviše mojoj dragoj susidi teti Dese koja je živila uzame a bila je iz Selaca. Ona voli ka i ja friganu ribu a ja nevolin čistit i mi smo udružili svoje snage da bi guštali u friganoj ribi i brudetima. Ma jedan put kaže meni teta Dese, ajde reci mi di ti to baciješ voršu? Kad san joj reka ona će meni ščeto neto ni ti je to dobro ja ču ti kazat misto di san ja sa mojin nonon i papon bacivala vorše ma moraš je donit da je vidin kakva je.
Oden ja kajićen na more izvadin vršu i donesen je isprid kuće u dvor a teta Dese je pogleda ništa ne reče i ode iz dvora. Gospe moja mislin se ja ća jon se dogodilo? Prođe desetak petnajst minuti i evo ti teta Dese nosi naramak granćic o rogača i baci pridame, pa mi reče e sad ćemo je lipo pokrit i napravit lipi lad jerbo i riba voli doć u lad.
Tako ja opleten vršu sa granćican i odemo mi na more sa vršon ka da je kamuflirana za ratovat.U nju san meka dva kila kruva i malo ribjega brašna u žensku bičvu ća san obisi u vršu. Odvede mene teta Dese na poštu bacin ja lipo vršu uzmen orjentire za nać je a sinjale nismo stavjali da je lupeži ne ukredu oli bar pripomistu.
Sutra dan ja oko sedan uri oden dignit vršu, nađen je zakačin je lipin malin sidron o rosfraja ma vrša neće da se odlipi o dna. Potižen ja i najedno oče gori. Gospe moja kad san je jedva diza i doša ndo metra ispod površine skoro me je kolpalo .Ajme majko ča je ovo?
Vrije u vrši o ribe. Jedva san je istega na provu ka jema san ća i vidit puna cipli putnici oni lipi sa žuto flekon sa svake bande o glave. Istresa ja to u kajić, vratin vršu sa novin kruvon na isto misto i gas u porat. Kako mi je vez bi isprid luške kapetanije dođen ja i vičen Braco Braco (a to mi je bi prijatej luški kapetan) dojdi vidit ovo i donesi plastičnu vrećicu.
Dojde Braco i pita a ća je ovo? Ja mu lipo spjegan izvadi san vršu a on pita a koliko vrši si izvadi. kad san reka jednu ni virova. Ja san u njega posudi jednu baju za odnit ribu doma i onda san je izvaga bez onega ća san da njemu bilo je jušto 37 kili cipli i da mi nebi rekli da san laga ja san sve ciple stiva na šatorsko krilo i moj sin Vibor me je slika sa ribon ka dokaz da nisan laga. Sutra dan se ponovila ista stvar i prikosutra opet ma četvrti put vadin ja vršu a u njoj skoro četrdeset kili hobotnice i na dnu vrše pedeset šezdeset kosturi o cipli.
Nikad mi se ovako nešto ni dogodilo a moja draga susida teta Dese je bome guštala i u velikoj ribi.Eto dragi moji štioci sve van je baš sve ovo istina a bome još jema svidoci koji ovo mogu i potvrdit.
Živi i veseli bili i sritno lovili pa makar i više o mene. Lipo vas pozdravja Jadran Šantić Šangarelo „MORSKI ĆOVIK“
Gradac 03.07.2010 g.