tekst: Jadran Šantić Šangarelo
Evala štioci dragi evo me jopet sa nikin mojin novitadama. Znan da mnogi od vas neznadu koji su to gušti odit na more zimi u lov na pravu ribu.
Je odma če se nač grinteše koji če me napast kako more bit lipo kad je ladno puno vlage u ariju a bome i zna učinit i loše vrime. Zna se i more dignit i ako nimaš dobar brod odnija vrag šalu. Je sve to stoji ma danas čovik jema svako malo prognozu. More pratit sve ča oni strukovnjaci o vrimena balidu po radiju i televiziji i uvik zna ča ga čeka pa ni mona da gre na more užežin nevere.
Ma sve je ovo ka božiji libar ma isto vrag neda mira i uvik misliš neče mene zajebat uteču ja na vrime ako krene neverin. Jedno pozapodne san se maka sa veza iz porta jerbo je bilo lipo sunčano vrime samo je malo bilo oblaci doli oko Visa. Nisan obadava jerbo mi se činilo da je daleko a more je bilo kalma bonaca. Kako u brodu jeman šest samolovki vazani za plastične kante i sa velikin udican na koje san sa pokojnin prijatejo Dojlon zvani Đek lovi ugore odlučija san bacit svi 6 samolovki sa volciman na udicu. Kako jeman brz brod skala san se u podanak Pelješca i po komodu razmistija samolovke koje jemadu na kraju piz od olova i to od kila. Razmak san učini od par stotin metri između samolovki poza tin san se surga na sidro di mi je sonder da pozicjun o nekoga braka i sa lipin repiman o kozic počeja lovit sa šćapon podase.
U prvi po ure ništa se doli ni događalo ma unda san osjeti batudu, jedan dva tri i ja trznen sa ščapon i motan makinju. Ma bogami lipo na obe udice dva lipa fratra skoro svaki od 30 deki. Mislin ja ajde ni loše i ponovin skalavanje udic. Prođe malo a ono još žešče udre dva puta, ja kontriran i motan kad ono jedva da se miće put gori i poza neki deset minuti jeman ča i vidit zinila škrpina justiman je bogani ako ni 25 centtimetri promjera a na udici ispod nje jedna manja.
Cili san se stresa, udrija me adrenalin i nisan moga dočekat da ponovo kalan ješku. Ma zaudobi san reč da je u večoj škrpini bilo obilata tri kila a u manjoj oko dva i to je bome lipa porcija za niti uru lova. Držin ja ščap i čekan kad je ništo zagucalo i skoro mi ukrelo ščap iz ruke, ma nisan ni ja od jučer pa malo nategnen i opustin rolu pa udri motaj malo ja vučen gori a niki vrag potiže doli i tako dvadesetak minuti dok nisan ugleda beštiju ugora debjega o moje ruke.
Ajme meni a špurtil mi je pod provu, a ča ču sad starj me pribacivat ga u brod a on jut mlati repn po bandi o broda ka da je ispanpana joli ti poludija. Mislin ja i ti bi da te niko drži na udicu a nemoš uteč. Sriča da mi je rampin bi u kuvertu vanka pa san ga iz trečega puta uspi zakačit i uvuč priko bande, unda je nasta rusvaj, sve je u kuvertu pomeja repon, mene je dva puta lipo opizdija i skoro me ugriza, ma isto san uspija jednon staron krpoga uvatit ga i pričepit dok san mu zabija nož u glavu i tek se poza trečin ubodon malo ka smirija. Drčen ja cili od napetosti kad eto ti vraga diga se majštral, ajde kapetane diži sidro i gremo doma.
A, e, a di su samolovke neču ji gospe mi ostavit i onda for gas do prve. Vataj mezomarineron prvu kantu i vadi konop, ništa ni taklo meso od volka. Ajde vadi drugu jopet ništa na trečoj sa jema malo borbe sa još jednin ugoron od oko dva i po kila ma na četvrtoj san zapeja.
Diga se lipi vitar a i more je počelo radit zakačin ja četvrtu samolovku ma neda se kanta u brod. Vučen ja vuče i mišto doli a more pjuska li pjuska i puni mi kajić. Uspi san uvuč kantu i uvatija san se u koštac sa ovin nečastivin doli i koji ne obada kako je meni, šiba vitar more vaja i pjuska a ja ka Hemingvejov ribar vodin borbu i mislin se ako ne uspijen za deset minuti izvuč vraga vratit ču kantu u more i sutra doč po nju.
Za pravo reč nisan ja čovik za bacit jeman priko sto kili a kažu da su mi ruke ka mengele i ja potižen li potižen i jeman na kraju ča i vidig, ulovi san zubaca krunaša od šesnaest kili i biž u porat za škapulat se. Kad san veza kajić gledan ko če mi pomoč do auta odnit ribu ma ka za pegulu nigdi nikoga pasalo je pet uri i smrkava se nima nego jedno po jedno i u auto.
Kad san doša doma ženu mi skoro afanalo ni mogla očiman virovat a ja jon lipo spjegan da drugi put ne ronja jerbo sad vidi da se i zimi da lipo proč na ribarščini. Zna more koja je to barufa zimi na moru i ja uvik govorin more če te nagradit za taki trud i muku i tako je i mene nagradilo ma isto nisan iša drugi put u ribarščinu u zimu samo kad je lipi sunčan dan i po bonaci.
Od veloga san ugora izriza na fete od dva tri centa i peka na gradele glavušu i vrat na brudet zubaca na fete i u dubokopa pomalo gradelada dok san o glave i repa da ženi da sparića lipu juvu, manjega ugora glavu i do pupka na brudet a fratre bome na gradela. Jo judi ća se guštalo ma isto moran reč da su škrpine rasplaščene pa na gradele bile najboje a jeli se ponovilo a e enikad više vako.
Eto štioci moji živi i veseli bili pa na puntu od portafoja po ribu. Šalan se ja znan da i meju vaman jema pravi ribari stojte mi dobro do druge štorije pozdravja vas vaš morski čovik Šangarelo.