piše: Jadran Šantić Šangarelo
Evo štioci dragi uskrsa san izgleda ka i Lazar poza puno vrimena. Kako? Pa bome lipo jerbo se nisan javja jušto 5 miseci, pet dugi miseci šutnje ča meni baš ne leži.
Ma kvragu reka san dosta san prin laja pa su me i neki pjucali pa san sada puno muča i mislin da bi triba probudit one ča su se ujujali i zaboravili name i možda ču jopet čakod zalajat a oni če jemat škužu da me popjuvaju. Ajmo vidit.
Kroz ovi pet miseci u lipu našu se događa taki cirkus da bi se po njemu moglo snimit barenko nikoliko filmova samo di se narod ne bi smija vengo plaka. Za upelit je da nebi bilo dobro dat da te filmove režira šjor Antun Vrdoljak ni oni Muzuvir Jakov Sedlar ča stalno koketira sa oštron desnicon i koji je pupčanon vrpcon vezan sa novon i staron ustašijon vengo neki mlaji mulac neopterečen pulitikon. Eno šjor Vrdoljak snima film General o mome bivšemu zapovjedniku i najkompletnijem časniku i ratniku HV-a Anti Gotovini za kojin bi srcen i dušon opet otiša u rat. Drago me da je film o ČOVIKU koji to i zaslužuje.
E pa ovod bi se moglo pripovidat o puno tega ma po onu iz Veloga mista „ jema puno lipi stvari samo ne smin reč,e e jema puno lipi stvari samo ne smin kazat“. Ja ču gospemi o svemu ča mi pade na pamet. Evo več me srbi prst od pomisli na onega muzuvira Hasanbegovića. Sila o čovika pun je force kad triba promovirat u rukavican a bome i javno desnicu ma ni mi jasno kako to ni jema force lipo otić u rat ka mlad i drčan pa steč ugled i onda lupat šakon o stol a ne lupetat pizdarije. Bila se malo probudila mladost u prosvjedima kontra njega ma sve je to bilo šupji balun. Mislija san da če oni lisac Plenković srčanije se ogradit od ove trule desnice ma i on je ka i oni jerbo nikad dosad ni javno izreka osudu ustaštva i NDH vengo to uvik umata u celofan osude svi totalitarni režima. Ma jemamo mi zato našu vrlu prisidnicu koja nota bene na isti način biži od osuda ustašije i NDH ma zato jema muda otić na oni plac u Ameriku isprid bile kuče i sa njega di i svi ostali mali judi govoru lipo u kameru reč da je bome potrošila državne šolde za doći ovemu novemu prešidentu Trumpu pomoč na izradi međunarodne pulitike. Ma judi moji koja je to čast i dika o naše Kolinde koja je to rekla isprid željezne ograde bile kuče a zamislite da je bila unutra kod Trumpa di bi jon bija kraj u izjavan.
Kako san prin 5 miseci napa onega zvrkana Milanovića i novega bezveznjaka Bernardića bija san u pravu ovi novi mali nima muda za ništa učinit doli osramotit svojin izjavan i poteziman SDP. Nije mi kjaro kako ovi HNS sa tek 2% glasova more bezočno zajebavat svoga koalicijskega partnera i ucjenjivat ga, pa judi moji ovi Vrdoljak Ivan ( da ko ne promisli ta govorin o šjor Antunu) je posta lisac nad lisciman i primazan je bome sa svin ujiman i maščukama i on Bernardića voda ka na povocu kako oče. Po meni bi tribalo pokrenit opoziv prisidnika SDP-a i izabrat onega braćanina Ranka Ostojića jerbo je ka peča čovika jema stav a bome i ni ga straj reč ča misli i to ne zazire od nikoga. On bi bi pravi koji bi moga podignit SDP iz totalne letargije i izličit SDP od ove anemije ča ga je uvatila.
Sve me ništo bocka da skočin notavat ništo o Todoriću ma ne bi tija priskakat. Od jake desnice u vladi pojavija se još jedan koji voli pripisivat od drugi oni šjor Barišić iz Splita za kojega se Plenković borija ka tigar zubiman i noktiman. Neznan zašto je sebe osramotija a napose kad je svojin postupcim natira časnoga dotura i profešura Ivana Đikića da se pokupi iz lipe naše i svoju pamet upregne u tuđa kola. E sad moran taknit i časnu Imotsku krajinu i ministra zdravstva Kujunđića koji je lipo popjuca kolege likare i nazva ji linčinan a da ne govorin kako je junački potira onega likara iz KBC Dubrava koji je otuka pusta bojišta i za kojega svi u bolnici tvrde da je OK samo nesmu ništa reč jerbo če dobit šup kartu pa ti majstore traži danas posal.
I da ne zaudobin onu lipuškastu Brunu Esih koja, a jema i prav samu sebe kandidira za poteštata Zagreba i kojon podršku daje iz sve snage a ko drugi vengo oni dični mladić ča se slikava sa „posuđenon crnon kapon„ po Splitu za vrime rata šjor Hasanbegović. Poslin ovi pusti peripetij oko poteštata stranka Zna se izabrala je povratnika judu dotura Prgometa za svoga službenog kandidata kome jopet podršku i to javno neda Hasanbegović. Jo judi ča je to jak čovik i koji se nikoga ne boji,a na pitanje Plenkovića daje li podršku doturu Prgometu fiškalski je izjavija da stranka jema samo jednega kandidata. Ma zamislite muzuvira a?
Ne bi bilo pošteno da se ne dotaknen i našega dičnega generala Glasnovića, pa judi moji taj je zaluta u pulitiku i svojin nastupima vriđa sve od reda evala mu kad more. Ma da sve ne bi bila čista mutna pulitika dogodi nan se poslin Lex Perkovića i Lex Todorić. Prin nego je sve osvanilo na vidilo bija san blizu jednega društva na neku marendu di san čuja kako jedan nepoznati čovik govori da je Todorić instalira Marića za ministra financij jerbo je zna ča se sprema i na taj je način tija sredit sebi odstupnicu i kad sad malo boje pogledate jema ovo logike.
Mada ne bi tija da me se krivo razumi ma naš je Imotski dobrotvor u jeku sveopče gungule i raspada sistema odlučija svoju zemju i svoj narod darivat, i to sa čin a bome sa Agrokoron ma ništo je zaudobija spomenit puste miljarde kun dugova kome je nji ostavija a to je več poznato. Majko moja koji su to vrhunski prefriganci, neka mi oproste časni imočani ma ovo je moga samo njiov rod izumislit. I eto do sada jemamo tri časna primjera dične imotske krajine šjor Antuna Vrdoljaka, dr. Kujunđića i šjor Todorića a gospe mi paridu ka sveto trojstvo.
Dok se ovo događalo normalno su tekli sudski postupci kontra Sanadera, kontra Nadana Vidoševića i pari ka da svi plako gredu ka zastaraman jerbo ji vodi oni“ šlang“ fiškal Čedo Prodanović tako da jemamo pravilo koje glasi: “nemoj platit misečne režije i gre ti ovrha stana a ako marčapijaš miljune greš u zastaru”. Jedino je najeba oni bidni Čobi kojega su uvalili u govna sa kumpiriman.
Ma i to je prošla tako da nan za Tuđmanovu Hrvatsku 200 bogati obiteji ostaje ka podsjetnik. Kutle se nakra i ni osuđen bome i Sanader ni pokupija mrvice i on greput zastare a isto tako i Nadan Vidošević kojeme je mater o pensije uštedila puste miljune. Bogami je štedljivija i škrtija od malega bračanina bivšega ministra Bauka.
Moran još spomenit našu heroinu šjoru Kolindu i to po lipemu jerbo je stesala liniju ma čini mi se da je sve kile viška prinila na svoga Jakova. Boje kile vengo ništo drugo a mora bit da jon je u temu jako pomoglo ča u zanje vrime đipa okolo u razne posjete pa je to sigurno iscrpi. Bidna ona do kraja mandata bi mogla bit ka Tvigi.
Evo su nan i lokalni izbori na vrata i več čujen da se po malin mistaiman vode rovovske bitke a ča če na kraju bit ZNA SE.
Štioci dragi ovo je zanji befel iz metropole jerbo selin na more pa se onda čujemo sa morskin štorijan.
Živi i veseli bili. Pozdravja vas vaš morski čovik Šangarelo.