KOME  ĆEMO  PODNIT  RAČUNE

Piše: Jadran Šantić  Šangarelo

Dugo san se mučija u misliman oču li jopet čakod notat joli ne.

Nisan vidija smisa vengo samo još više jala i muke koja koja ti zatruje dušu i tilo. Od zanjega moga javjanja prošlo je oko dva miseca a u lipoj našoj ni nedostajalo škandali, vriđanja, mutni posli, pulitički likvidacij i da sve ne nabrajan jerbo mogu ikspast dosadan. Dunkve dargi štioci neznan okle bi započeja jer od svake teme koje bi se čovik moga dotaknit sve je puno smrada.

Ni to samo smrad koji te izujida za nos vengo su i oni koji ga proizvodu pravi smradovi. Ma jopet kad se sitin pokojnega strica Smoje i veloga mista uvik me udre prin pisanja u možjane ona misal sa poznaton izrekon …“ je je jema puno lipi stvari samo nesmin reč a bome je jema puno puno lipi stvari samo nesmin kazat e.“Ma ajmo mi malo okolo naokolo.

Evo kako svi več znate da je stranka Zna se priko jednega lokalnega malešnega „Mosta“ utrčala u dvore o vlasti misleći da je uvatila boga za bradu i da sa tin malešnin Moston more po sistemu lako čemo. Malo morgen.

Nisu računali da je ti malešni most projekat našega barba Luke koji je bi i osta veliki igrač. Ispalo je da je  put po temu malešnemu Mostu pun naopako zabijeni brokav i da svaki korak ča ga učini Stranka Zna se bude zabilužen pravin izbužanin tabaniman a ni tada nije sigurno oče li ti njiov korak uspit.

Do sada u ovi skoro dva miseca obnašanja jalove vlasti stranci Zna se tabani su puni ran i ožiljak koje su dobili pokušavajući pritrčati priko mosta. Kako su prin izbori justa sviman bila puna obečanji o velikin i hitnin reforman u justa jin ni ništa drugo moglo stat i sad kad su malo stali, na reforme zaboravili i jopet zinili sada su jin justa puna fotelji, ministarstava, vlasti, dužnosnički beneficij, a u reforme u koje su se kleli niko više ne viruje.

Ma za gospu blaženu ni mi kjaro iz kojega velebnega inkubatora stranka Znase izvučije svoje veleuvažene kandidate za funkcije ministara i pomoćnika.

Ispostavja se da kad dojdedu na vlast da jin je rok trajanja vako malešan. Nemoredu njanka ni fotelju guzican uteplit i več dobijedu šup karete, a o skandaliman oko ti uvaženi osob da i ne govorin.

Naš najškolovaniji bivši špijun se u nji klete i u njiovo poštenje pari mi se ka da je šjor Bozanić proglasi cilu regimentu svetaca za ministre a vadi ji se ka iz šešira jerbo za neke niko nikad ni čuja a za druge se čulo priko foji iz crni rubrik.

Moran još naglasit da smo specifična zemja u kojoj u saboru side osobe proustaški joli profašistički orjentirane i nikomen ništa. Iste te osobe kako bi se reklo danas modernin rječnikon kontaminiraju Judski i politički prostor svojin ikonografskin ispadiman a naš premijer svojin „građevinaman“ ne daje nadu u boje sutra i njanci ne spominje svoje nepodobne članove vlade i parlamenta a sa njin mišljenje dili i šjor dotur Rainer koji je i sam zakukurika o izmjenama naziva Sabora a bome i o drugin nepodopštinan svoji parlamentarac  na čeli sa elegantno popunjenin šjor Šukeron i onin stamenin junakon koji obnaša dužnost potprisidnika Sabora a koji maršira ina čelu kolone uz drčno dizanje ruke u ariju sa „ za dom spremni“.

Kako se ne bi povijesne revanšističke navade minjale nova vlast je odma hitro počela političke smjene i brzi odstrel ka da pucadu na glinene golube a glinene golube ne triba zaštičivat pa jin je sve ravno. E sad malo i o onemu ča se več zna. Grupa braniteji koji sebe zovedu pridstavniciman svi braniteji uzurpirali su pusto vrime najprometniju ulicu metropole, dizali bune, najavjivali rušenje nenarodne vlasti i to sve pod krinkon časni judi ma gospemi još se nisu izborili ni za svoga ministra u vladi jerbo je šjor Crnoja radi svoji „ časni rabota“ odletija u nepoznato odakle je i doša.

Velika uzdanica stranke Zna se bija je i njezin vrli tajnik šjor Vaso ma on je jopet kako kaže prisidnik vlade pokaza karakter i da ostavku prin nego ga je i notalo za ministra a u njegovoj pozadini šjor Glogoški drčno daje izjave kako ja spreman još se žrtvovat za braniteje i lipšu našu.

Nikor još nezna kad če ova trakavica svršit. Moran reč da je lista čekanja za fotelju ministra o braniteji bogami dobro duga pa čoviku pade na pamet da se od velikega prometa i male zarade joli koristi neče časno privest kraju izbor jake, poštene i sposobne osobe koja če časno obnašat funkciju ministra braniteji. Skoro san zaudobi da je jako važno istaći još nike momente hajdučije koja izlazi iz skuta nove vlasti.

Tribalo je priuzet HTV jerbo je informacija narodu najvažnija kako za privaru tako i za vladanje a vladat se ne more bez dobro smišljeni parola i lažni obečanja i ko če to prinosit vengo nacionalna „dalekovidnica“. Makli su ekspresno Radmana ( ma moran reč da ni meni ni bija drag) a poza njin cilu regimentu judi sa odgovorni misti i ispada da je HTV  jedan veliki inkubator di mudre političke kokoši nosidu jaja a tamo ji pritvaraju u sposobne kadrove i uvik ji jema u rezervi lipo spavadu i primadu velike šolde dok ji se ne pozove na djelovanje.

Naš novi ministar o kulture kojega su ulovili spušteni gač sa ustaškon kapon na glavi kroji svoju „čistu“ kulturnjačku pulitiku. Veliki prijatej naše prisidnice i njezin počasni gost na inauguraciji a poznat po aferi di ga je uvatilo sa drogon a bome i sa ministron kulture na sliki iz Splita uzimje sebi pravo da jednu veliku gospoju Mirjanu Rakić novinarku od formata proglašava četnikušon, poklanja jon šajkaču sa kokardon i tira je iz lipe naše.

Frljiču su i njegovon curi lopine opjačkale i provalile u stanove ka slučajno, a onega Pupovca kojega ni ja ne volin ma isto ga niman prav tirat priko Drine naš šjor Vaso lipo svituje da promini državu jerbo če tamo nigdi bit siguniji.

Nastoja san uvik bit koliko je moguće pošten i kritično se osvrnit na live i desne pa i ovon zgodon moran van spjegat da nisan očekiva vako velike uvride i niske udarce u predizborno stranačko vrime u SDP jerbo san mislija da su oni uljuđeniji od desni. A e?!?!!

Oni bivši premijer je svojin nepromišljenin poteziman dovaje HDZ i Most na vlast pa je samin tin činon zavija zemju u crno i sad bi tija u svojon stranci reizbor bez ukora i kazne mislin da nemore.

Mislin da SDP triba ka veliku stranku unapridit kultivirat i demokratizirat jerbo u njoj nesmi bit autokracije i despotskog vođenja stranke.

Na SDP- ovim članoviman je da donesedu sud  i da stranka krene u svitliju budućnost sa novin judiman na čelu i možda opet narodu dojde iz guzice u glavu pa ji dovedu ponovo na vlast.

Moran još ošervat se na prijateja od naše prisidnice zara kojega je ona hitro potpisala smjenu šjor Lozančića najškolovanijeg čovika na funkciji koju obnaša jerbo ko smi za gospu blaženu nju pratit kad se ona druži sa svojin časnin prijatejiman kojiman je kriminal usputno zanimanje.

Ja mislin da je ona tribala izdat befel da se velikega dinamova bosa ostavi na miru jerbo ako ga uapse ko če jon organizirat rođendane.

Znan  da san puno tega priskočija ma ostavija san za drugi put pa vas dragi štici lipo pozdravjan vaš morski čovik Šangarelo.