tekst: Tonči Ćepernić
Ni mi drogo. A čo? Puno tega. E jemon san nonu. Nikor joj ni bi rovan. Žestoka, borac, a morala je tako, mižerija je u ono doba bila. Nisi se smi ćapat sa njom, to ka nisi smija svađat se sa njom.
Kad bi koji put ubrala porež u koji tuji vrtal, ni za zamirit, dica mola a triboju jist. I kad bi joj to spomeni vlasnik vrtla mora je bižat isprid nje. A će mislite, jedva bi jadan izvuko živu glovu.
A meni drogo, nona je bogu fala dobro i zdravo u formi. E,e. Ma kad je moja nona postala dobra mirna i ni se svađala, ni mi bilo drogo, Partila je moja droga nona. Bog joj da pokoj.
Moja drogo Ma jema crtu moje none. Čin primi račun za čistoću od komunalne firme iz gornjeg Humca uvećan za dvadeset posto… ona im petaje roge. Na objašnjenje da je to direktiva EU, ona će njima u brk:
“Jebala vas EU!” A meni drago.
“Ma će ti je to drogo?”, ona će meni.
Kad joj ovi Plenki poveća penšjun za trideset kun ona beštimo na njega,
“Pizdo evo tebi ovih trideset kun pa ti ploćoj račune!” A meni drogo.
“Ma će ti je drogo Braco, uvik zajeboješ.”
“Moja Ma je u top formi, bog joj do zdrovje.”
Kad san diza plaću sa Sberb banke za pasoni misec, službenica meni isplati cili plaću,
A jo ću njoj: “Anči ni mi drogo,”
“A čo to šjor Toni, nimote ovrhe ovi misec.”
A jo opet: “Ma ni mi drogo.” Ni me razumila.
Jutros me fermala policija.
“Dobar dan šjor Toni”
“A i vama dobri don, premda mi ni drogo.”
“Vozili ste sto a dozvoljeno vam je pedeset.”
“E ii?”
“A to van je iljadu kun.”
“A će mogu.”
“Ma ne sekirojte se”, govori on meni, “Nimote prošlih kazni, pa ne morate ništa plotit.”
“A ni mi drogo”
“Ma vi niste normalni šjor Toni, ni van drogo a jo vas oslobođon kazne.”
“E moj sinko, kad je moja nona postala dobra i ni se svađala, portila je. Kad država postaje dobra i ne naplaćije ovrhe i kazne, ni mi drogo. Bojin se ne doj Bože da i ona porti. Neka je moja Ma ašperta i žestoka drogo mi je. Eee.”