Ivan Dobra Žirjanin
Ka’ se čovik svega prikoviše štufa
i ka’ se naidi na ženu ol’ dicu,
a ozgor se počne taljati barufa,
pacencije nima ni za mrzlu ticu.
.
Unda se izmuli, vičuć izdaleka
da mu se, dok dojde, istepli tikula,
i puf u tuvernu, di ga društvo čeka,
i di će ga smirit za stolun briškula.
Tote se trunbeta, nikon se i šćuca;
petaju se rozi, gubica iskrivi;
po stolu se buba, na lišine pljuca;
ako lipa fali, drugi su ti krivi …
Uz dim, vino, pismu, svi bi briškulali,
samo kako ne bi uz komine stali.